باشوری کوردستان ئەو پنتە گرنگەی کوردبوونە کەهەمووان وەک دەلاقەی ڕزگاری و سەربەخۆیی لێدەڕوانین.
کۆمەڵگای مرۆڤدۆستی کوردی لە باشوری کوردستان، لە ڕۆژگاری ئەمرۆدا لەگەڵ تاقمو باندێکی مەرگدۆستدا دەرگیرین، ئەوان باهۆزێک لە تاریکستانەوە هێناونی، لە سەردەمی ئەمرۆماندا کەڕەووتی پێشکەوتنی مرۆڤایەتی زانست و ڕۆشنبیریی و پەروەردە بەخێرایی ڕووناکی بەروپێش دەچێت، لێ تاقمێکی سەرلێشێواو بەناوی ڕۆشبیر و ڕووناکبیر! لە ژێر پەردەی پەرۆشی و پەرێشانی بۆ پتەوکاریی! بەناوی یاخیبوونەوە کار بۆ دروستکردنی شێوەیەکی تری کۆیلایەتی دەکەن، لە دەروون و ڕۆحی مرۆڤی کوردا تۆووی بێ هیوای دەچێنن، لە هەناوی کۆمەڵگای کوردستاندا سەرگەرمی دروستکردنی دەلاقەیەکی گەورەی وێنرانکارین کە دەکرێت ناوی بنێین(رۆحی کۆیلایەتی نوێ)، ئەوان کە سەرگەرمی برەودانن بە فیکری پوچگەرایی، بەرهەم و هەوڵیان بە لاڕێدابردنی کۆمەڵگایە، لە ڕێگەی وەرگێرانی بەرهەمی بفدروای نووسەرانێک کە بە نیشتمان و کۆمەڵگای خۆییان نامۆن، نووسەران و ئەدیبانێکی بێفەڕ و مەرگدۆست کەلە کۆمەڵگا پێشکەوتووەکان نەک هەر گرنگی و بایەخیان پێنادرێت بەڵکو شوێنیکیاننیە جگە لە لۆمەکردن و پشتخوارکردنەوەی بۆچوونەکانیان نیە.
خودایە ئەوانە چ بوونەوەرێکن کە ئەزموونی کوردی لە کەدار دەکەن بە خاتری دوژمن، ئەزموونی کوردی بە خراپترین ئەزموونی مرۆڤایەتی دەزانن! خۆیان بە بچووکترین بوونەوەری دونیا دەبینن و دەزانن و دەناسن، هەموو دەم و ساتێک بۆ ئەوان دەرفەتێکە بۆ لەکەدارکردن و بەدناوکردنی کورد، هەموو ڕووداوێک بەهانەیەکە بۆ هێرشێکی نارەوا، خودایە دەروونی شکاوی ئەمبوونەوەرانە بەچی چاک دەبێتەوە، بەچی دەبنەوە بە مرۆ؟! بە چی دەبنەوە بە شۆڕشگێر و نیشتمانپەروەرو کوردپەروەر؟!
ئەوانەی گۆشکراوی کوردایەتین و باوەڕمان بە دۆزی ڕەوای گەلی کوردستان هەیە، بەر لەهەرشتێک باوەڕمان بە کوردستان هەیە و ئەو سنورە دەستکردانە ڕەت دەکەینەوە کە دوژمنانی ئازادی و گەلی کوردستان کێشاونی و سەپاندونی، بۆمن هەولێر و سنە جیاوازییان چیە؟ بۆ تۆی کوردپەروەر دهۆک و مهاباد و قامیشلۆ جیاوازییان چیە؟ ئەو سۆزەی بۆ هاوشارییەکانم لە سلێمانی هەیە، هامان سۆز و خۆشەویستیم بۆ کوردانی ئامەد و وان و دێرسیم هەیە، کوردێک لەم سەر زەمینە ئازادبێت منیش لەگەڵی ئازادم، لە هەرشوێنێک لەسەر کوردبوون کوردێک دیل و یەخسیربێت لەگەڵی دیل و یەخسیرم.

لە چەرخی نوێدا باشوری کوردستان چەق و چاوگی گوتاری ئازادی و سەربەخۆییە، لە پرسی بوژاندنەوەو سەرهەڵدانی گوتاری ناسیۆنالیزمی کوردیدا، باشوری کوردستان ڕۆڵ و بایەخێکی گەورەی هەیە، بە گەڕانەوە بۆ مێژوو، بۆ ڕووداو و شۆڕش و سەر هەڵدانەکان، بۆ دروستبوونی بزاڤی کۆمەڵایەتی نوێ و سەرهەڵدانی ڕۆژنامەگەری و هەوڵەکانی دروستکردنی پارت و ڕێکخراوی سیاسیی، باشتر لە پێگەو بایەخی باشوری کوردستان تێدەگەین.
باشوری کوردستان بە هەموومانی بەخشیوە و دەبەخشێت، ئەزموونی سێ دەیە خۆبەڕیوەبردنی کوردی و کوردستانی گەلێک ڕوانگەی گەش و ئیجابی هەیە، لەسەرو هەموویانەوە برەوسەندنی پرسی کورد و بەقەزیەکردنی لەسەر ئاستی ناوەندە گرنگ و گەورەکانی جیهان، بە درێژایی مێژوو هیچ کاتێک هێندەی ئەم سەردەمە پرسی چارەسەرکردنی کێشەی کورد بابەتی گەرم و گرنگ و زیندووی قسەلەسەرکردن نەبووە، ئەمرۆ سەرەنجی ڕایگشتی جیهان لەسەر کێشەکانی ڕۆژهەڵاتی ناوەڕاستە و کێشەی کوردیش زیندوترین کێشەی ناوچەکەیە، باشوری کوردستانیش ناوەند و چاوگی دۆزی کوردە و نوێنەرایەتی دۆزەکە دەکات.
لە ماوەی دە ساڵی ڕابردودا باشوری کوردستان پشتیوان و هاوکاری ئەزموونی ڕۆژئاوای کوردستان بووین، لە ڕووی سیاسیی و دیپلۆماسی و سەربازی و مرۆییەوە پشتیوانی سەرخستنی ئەزموونی ڕۆژئاوای کوردستان بووین و دەبین. سەرکەوتنی ڕۆژئاوای کوردستان لامان سەرکەوتنی کوردستانە. ئێمە ئەهلی گەرەک و گوند و ناوچەیەکنین، کوردستان لامان گەرەک و گوند و ناوچەیەک نیە، کوردستان نیشتمانی هەمووانەو ئەرکی پاراستنیشی ئەرێکی بەکۆمەڵە.
خۆر لە باشورەوە هەڵدێت، ئەزموونی ٢٨ ساڵ حکومڕانی کوردی لە باشوری کوردستان دەهێنێت باشتر دیراسە بکرێت و لە ڕوانگە و ڕەهەندە جیاوازەکانی بکۆڵینەوە، ڕاپەڕینی ١٩٩١ و دروستبوونی حکومەتی کوردی و بەردەوامیدان بە ئیدارەکە و سەرئەنجام ڕسکانی ئەزموونێک، ئەزموونی حکومڕانی کوردی لە دوای پرۆسەی ئازادی عێراقەوە لە ساڵی ٢٠٠٣ دەگوازێتەوە بۆ قۆناگێکی گرنگتر، کاتێک هەرێمی کوردستان لە ئەمریی واقیع (دیفاکتۆ)وە دەبێتە هەرێمێکی دەستووری و دانپێدانراو، هاوکاتیش لەسەر زەمین و ژیانی سیاسییدا هەرێمی کوردستان پەل دەهاوێژێت و ئەمری واقیعەکەی گشتگیرتر دەکات و باشتر بنج و بنەما دادەکوتێت.