پەیوەندیێن هەرێما کوردستانێ دگەل جیهانا دەرڤە و ب تایبەت وەلاتێن دەوروبەر رۆژ بۆ رۆژێ بەرەڤ پێشڤە دچن ، نەخاسمە وەلاتەکێ وەکی تورکیا کو بەرژەوەندیێن مەزنێن سیاسی و ئابوری و ئەمنی دناڤبەرا مە و وان دا هەنە . پشتی سالا ۲۰۰۳ یێ پەیوەندیێن هەرێما کوردستانێ و تورکیا وەرارەکا بەرچاڤ بخۆڤە دیت ، ئەڤەژی بوو رێخۆشکەر کو هەرێما کوردستانێ مفایێ ژ وێ پەیوەندیێ وەرگریت بۆ دەستپێکرنا پرۆسەیا ئاشتیێ ل تورکیا ، دناڤبەرا پەکەکەکێ و حکومەتا تورکیا . ل وێ قۆناغێ نێچیرڤان بارزانی سەرۆکێ حکومەتا هەرێمێ بوو ، و رۆلەکێ سەرەکی هەبوو ل بڕێڤەچونا پرۆسا ئاشتیێ و نێڤەندگیریا هەردوو ئالیان ، ئانکو حکومەتا هەرێما کوردستانێ لایەنێ سێ یێ بوو د پرۆسەیا ئاشتیێ دا . ئەڤێ پرۆسێ پێنگاڤێن باش هاڤێتن و د قۆناغا ئێکێدا ئەنجامێن باش هەبوون . لێ کوشتنا دوو پۆلیسێن تورکیا ژلایێ پەکەکێ ڤە ئەڤ پرۆسە راوەستاند و پەیوەندیێن تورکیا و پەکەکێ بەرەڤ ئالۆزیێ ڤە چون و هێزێن ئاسمانیا تورکیا بنگەهێن پەکەکێ بۆردومان کرن . پشتی بورینا چەند سالەکان د نهادا هندەک ئالیێن سیاسیێن تورکیا ، ب تایبەت پارتا دیموکراتیکا گەلان ( هەدەپە ) دخوازن پرسەیا ئاشتیێ دووبارە بهێتە دەستپێکرن ، بۆ ڤێ مەبەستێ ژی شاندەک ژ پەڕلەمانتارێن هەدەپێ ب سەرۆکایەتیا ( سەزای تەمەللی ) هەڤسەرۆکێ هەدەپێ سەرەدانا هەرێما کوردستانێ کر . ئارمانجا سەرەدانا وان ئەو بوو کو داخواز ژ ئالیێن سیاسیێن هەرێما کوردستانێ بکەن هەڤکاربن ژبۆ دووبارە دەستپێکرنا پرۆسەیا ئاشتیێ ل تورکیا . ل دەسپێکێ ئەڤ شاندە دگەل مەسعود بارزانی و پاشی نێچیرڤان بارزانی کۆمبون . ل ڤێ کۆمبونێ دوماهیک گۆڕانکاریێن باکورێ کوردستانێ هاتنە گەنگەشە کرن . هەر لسەر داخوازیا هەدەپێ نێچیرڤان بارزانی سەرۆکێ هەرێما کوردستانێ بەلێنا دەستپێکرنا بزاڤێن خوە بۆ دووبارە کاراکرنا پرۆسەیا ئاشیێ دا . د نهادا ئالیگرێن پرۆسەیا ئاشتیێ ل بەندا پێنگاڤێن سەرۆکێ هەرێمێ نە ژبۆ پرۆسەیا ئاشتیێ . هەلبەت بزاڤێن ڤێ جارێ دێ جوداتربیت ژ جارا چوی ، لێ دێ بۆ هەمان ئارمانج بیت . کاودانێن نها ل تورکێ ژی دخوازیت کو رەوشا ئێمناهیا وەڵاتی ئارام بیت . ب دیتنا چاڤدێرێن سیاسی نها دەمەکێ گونجایە بۆ دووبارە دەستپێکرنا پرۆسەیا ئاشتیێ و نەرمیەک د هەلوێستێ هەردوو ئالیاندا دهێتە دیتن .