بێدادی و بێویژدانییا سەردەستێن جیهانێ مینا کێکەکێ کوردستان پارچە پارچەکر و ل سەر چوار دەولەتان دابەشکر.گەلێ مە ژی ژ نەچاری کەفتە بن بارێ ژیوارێ سەپاندی. دەما دبێژین گەلێ مە، واتە باس ل کوردێن هەرچوار پارچەیێن کوردستانێ و یێن هەر قۆلاچا جیهانێ دکەین.ل ڤێرە دێ ب کورتی باس ل خۆشک و برایێن خوە یێن باکۆر کەین. چەندین ساڵ بوو ژ پێخەمەت ئازادیێ یا ژ دەستێن وان هاتی کر،هەر ژ شەڕێ بەران تا پێشکێشکرنا جانێ خوە. لێ چ جاران تەمەت وی دەمێ کورت یێ پرۆسەیا ئاشتیێ د ناڤبەرا پەکەکێ و تورکیادا دروست بووی خۆشک و برایێن مە یێن باکۆر د خۆشگۆزەرانیێدا نەژیابوون و نەژیاینە.هەر وەک سەرۆکێ هەرێمێ "نێچیرڤان بارزانی" گۆتی "شەڕ چ کێشەیان چارە ناکەت" ئانکو تا پرۆسەیا ئاشتیێ دەستپێنەکەتە فە ب زەحمەتە کوردێن باکۆر د ژیانەک ئارامدا بژین. پرۆسەیا ئاشتیێ دەرفەتەک زێڕین بوو هەر وەک مە ل هەلبژاردناندا دیتی ب ئاشتیانە پارتیا دیمۆکراتییا گەلان "هەدەپە"یێ رێژەیەکا مەزن ژ کۆرسیێن پەرلەمانێ تورکیا ب دەستخوەڤە ئینان. کو ئەڤە ژی تشتەکێ نوی و بێ وێنەبوو د دیرۆکا دەولەتا تورکیادا.لێ پاشان تەقینا ناڤچەیا " پرسوس"ێ یا سەر ب باژێڕێ روحایێ ڤە بۆ ئەگەر کو پرۆسەیا ئاشتیێ بهێتە بن پێکرن و تورکیا پەکەکە ب ڤێ تەقینێ تومەتبارکر و ئەڤ چەندە و چەند پرسێن دی بوونە ئەگەر کو تورکیا مافی بدەتە خوە ب بەهانەیا پاراستنا ئارامیا وەڵاتی خوە،سەقامگیرکرنا گەشت و گۆزار و ئابوورێ خوە،و پاراستنا سنۆرێن خوە...هتد دووبارە شەڕی ل هەمبەر پەکەکێ دەستپێبکەت و رەوشا قەدەغەکرنێ و دانانا قەیۆمان ل سەر باکۆرێ کوردستانێ بسەپینیت. و د ئەنجامدا زیان فێکەفتیێن ئێکێ کوردێن باکۆر ب گشتی و پارتا "هەدەپە"یێ ب تایبەت بوون. د نهاژیدا ل هەر کوردەکێ کوردپەروەر یێ باکۆرێ کوردستانێ بهێتە پرسین ،خۆشترین دەمێن ژیانا تە چ دەم بوونە، ب باوەرا مە دێ بێژیت:دەمێ پرۆسەیا ئاشتیێ ل تورکیا بەرقەراربووی. ژبەرکو د وی دەمێ کورتدا ئەگەر تا رادەیەکێ کێم ژی بیت لێ کوردێن باکۆرێ کوردستانێ شیان ب کوردی "راببن، بئاخڤن،سەرەدەریێ بکەن،بسترن،بهزرن و بژین"لێ وەک مە ئاماژەپێکری شەڕ دبەرژەوەندا کەسێ دا نییە. لەوما هەدەپە ژی باش دزانیت کو باشترین رێک بۆ ب دەسڤەئینانا مافێن گەلان دێ ب رێکێن دیمۆکراسی و ئاشتیانە بن. بۆ ڤێ مەرەمێ ژی شاندەکێ بلند ژ پارتیا دیمۆکراتییا گەلان "هەدەپە"یێ ب سەرۆکایەتییا "سەزای تەمەللی"هەڤسەرۆکێ "هەدەپە"یێ، سەرەدانا هەرێمێ کر و ل (۲۰۱۹/۹/۸) ل گەل سەرۆکێ هەرێمێ کۆمبوون و پشتی پیرۆزکرنا پۆستێ وی یێ نوی، ژێ خاست کو مینا هەرجار شیانێن خوە و پەیوەندیێن خوە بۆ ڤێ ئێکێ بکاربینیت و ببییتە رێخۆشکەر و پاڵدەر بۆ سەرئێخستنا پرۆسەیا ئاشتیێ ل وەڵاتێ تورکیا، هەلبەت نێچیرڤان بارزانی وتەڤایا بەرژەوەندخازێن گەلێ مە یێ باکۆر پشتەڤانێن ڤێ ئێکێ نە. لەوما ژی نێچیرڤان بارزانی ب دلگەرمییەک برایانە دا دیارکرن کو بۆ سەرئێخستنا پرۆسەیا ئاشتیێ ل تورکیا خەمساریێ ناکەین و چ تشتێ پێدڤی بیت دێ کەین و نابیت هیچ دەرفەتەک بۆ ئاشتێێ بهێتە ژ دەستدان.

لەوما گرنگە هەر تاکەکێ کورد ب لێزانین و عەقلانە سەرەدەریێ ل گەل ژیواری بکەت. ژبەرکو هەر وەک "ناپلیۆن"ی د گۆتنەکا خوەدا گۆتی"راستە سیاسەتێ دل نییە لێ مێشک یێ هەی" لەوما هەر دەمێ عەقل نەهاتە بکارئینان دێ هەر تشت ل دژی وێ روودەت یا مرۆڤی پێ مەبەست.چەوان د پێشتردا سەرکردە و رێبەرێن کوردان ل هەرێما کوردستانێ پشتەڤان،هەڤکار و سەرئێخەرێن ئاشتیێ بوون بۆ تەڤایا ناڤچەیێ ب هەمان شێوە د نهادا سەرۆکێ هەرێمێ بۆ ڤێ مەبەستێ ل سەر هێلە و پێدڤییە بێی بەرچاڤگرتنا "رەنگ،دەنگ،ئایدولۆژی و باوەریێن جۆدا جۆدا" هەموو دەست ل ناڤ دەست پشتەڤانێن سەرۆکێ هەرێمێ بین کو دووبارە ل شوونا رەوشا قەدەغەکرنێ،بارێ نەئاسایی و سەپاندنا قەیومان ل سەر گەلێ مە یێ باکۆر دووبارە بکەڤن د ناڤا ئاشتییێ دا و ئەگەر تەڤایا مافان ژی نەبیت لێ ب هندەک ژ مافێن خوە یێن رەوا شاد ببن.