پشتی داعش هێرشی قەزا شنگال و ناڤچەیێن بسەرڤە کری و ب هزاران خەلکێ ئێزدی یێ بێ گوننەھ بووینە قوربانی، ئێزدیان ل وی دەمی بەرێ خوە دا چیایێ شنگالێ ژبەرکو ل هەر دەمەکێ دا چیا دۆستێ مللەتێ مە بوویە و جهێ خوەراگریا ڤی مللەتی یە ل وی دەمی نێزیکا دەھ رۆژان ئێزدی ل چیای دا تەنگاڤ و برسی و تێهنی مان و چ ئالیەکی هاریکاریا وان نەکر و ب ڤێ ئەگەرێ هژمارەکا نەیا کێم ژ زارۆک و دایکێن ئێزدی ژ تێهن و برسا مرن.

لێ پشتی چەند رۆژان ژ زەحمەتی و ئێش و ئازارێن ل چیایی دا رێیەک بۆ چیایی هاتە ڤەکرن ئەو بوو کو نێزیکی 350 هزار کەسێ ئێزدی ژ وێ دەڤەرێ بەرەڤ دەڤەرێن ئارامێن هەرێما کوردستانێ برێکەفتن ئەو بوو کو ل رێکێن دوور و درێژ را گەهشتنە دەروازێ سێمالکا ل وی دەمی خەلکێ شەرەفمەندێ پارێزگەها دهۆکێ ب تایبەتی و یێ هەموو دەڤەرێن هەرێمێ ب گشتی ب یەک دەست و دل و هەستێ برایەتی و هەڤ نەتەوەی رابوون سەر پێیا و ب هاوارا برایێن خوە یێن ئێزدی چوون و پێشەوازیا وان کرن.


ل وی دەمێ ئەو خەلکە گەهشتی سنوورێ هەرێمێ و لسەر داخوازی و فەرمانا جەنابێ سەرۆک نێچیرڤان بارزانی کو وی دەمی سەرۆکێ حکومەتێ بوو ب هەموو شیان و بزاڤێن خوە جهێن حکومی ل پارێزگەها دهۆکێ و هەموو دەڤەرێن دن یێن کو ئاوارە تێدە ماین هەموو جۆرێن هاریکاریێ گەهاندنە خەلکێ ئاوارە و خزمەتا وان هاتە کرن.

هەر وەک هەموو جاران ل وێ تەنگاڤی و کاودانێن نەخوەش دا جارەکا دی خەلکێ پارێزگەها دهۆکێ ب موسلمان و مەسیحی ڤە هاریکاریێن مرۆڤی رۆژانە دگەهاندنا ئاوارێن ئێزدی و مال و حالێن خوە ب نیڤی کرن ژبۆ کو برایێن وان یێن ئێزدی ب ئارامی و خوەشی وان کاودانێن نەخوەش دەربازکن هەتا گەهشتە وی ئاستی کو مزگەفت و دێر لبەر ژی خەلکی هاتنە ڤەکرن و ئاوارە تێدە هاتنە بجھکرن.

لڤێرە ژی و ب دەربازبوونا 5 سالان بسەر ڤێ کۆمکوژیێ را هەتا نهوە ژی پتریا خەلکێ شنگالێ ئاوارەیە و ل کەمپێن ئاوارێن سنوورێ پارێزگەها دهۆکێ دا ئاکنجینە و ب هیمەتا جەنابێ سەرۆک نێچیرڤان بارزانی و رۆلێ وی یێ زێرین و کار و خەبات و پەیوەندیێن وی یێن خورت و بەردەوام ل گەل هەموو دەزگەھ و رێکخراوێن مرۆڤی هاریکاریێن بەردەوام دگەهنە ڤی خەلکی و پێکڤەژیانەکا موکم ل ناڤا ئاوارەیان و خەلکێ خوەجهێ دەڤەرێ دا تێتە دیتن.
????