د دیرۆکا گەلێ کورد دا و ژ کوردان ژی ب تایبەتی کوردێن هەرێما کوردستانێ ئەڤرازی و نشیڤیێن مەزن دیتینە. هەر ژ خەباتا پارتیزانی تا ب دەستڤەئینانا ڤێ هەرێما نوکە هەی چەندین جۆرێن قوربانیان هاتنە بەخشین ژ پێخەمەت ژیانەک ژ هەژی. کورد ب گشتی ئارمانجا تیرێن"نەتەوەپەرێس،ئاینپەرێس،مەزهەبپەڕێس و کلتوور پەرێس"ێن چار دەوری خوە بووینە.
جارنا ب ناڤێ جیهادێ هاتینە شەهیدکرن جارنا لژێر پەردا ئیسلاما سیاسی هاتینە ئەنفالکرن و خوینا مە هاتییە حەلالکرن جارنا ژی ببەهانەیێن جودا جودا هاتینە قڕکرن. هیچ دەردەسەریەک نەمایە خەلکێ خێر ل خوە نەدیتیێ ڤێ هەرێمێ نەدیتی!.لێ وەک مە ئاماژەپێکری ب جۆرەها قوربانیدانان قوناغێن ب زەحمەت هاتنە دەربازکرن هەتا ئێک ژ رژێمێن دکتاتۆر هەر سەر دەستێن قارەمانێن کورد و ل گەل هێزێن وەڵاتێن هەڤپەیمان هاتییە لادان و ژناڤبرن. ئومێدێن خەلکێ ڤێ هەرێمێ ب عیراقەکا نوی گەش بووین. بتنێ کێمتر ژ دەهـ ساڵان پشتی ژناڤبرنا "رژێما بەعس" کوردستان ب سایا سەرێ خەلک و حوکمڕانێن کوردستانێ مینا گولەک بوهاری ب خەمل کەفت و د زۆربەیا بواراندا گەشەیەکا ئێکجار مەزن ب خوەڤە دیت.
هەر چەندە د ڤی ماوەیێ کورتژی دا دوژمنێن کوردستانێ چەندین بەرپێک دانە پێشکەفتنا کوردستانێ. سەرباری هەموو بەرپێکێن دوژمنان،کاروانێ پێشڤەچوونێ ب لەزاتییەک ئێکجار مەزن بەرەف گۆپیتکێ دچوو. لێ یا جهێ داخێ ئەو بوو سەردەستێن بەغدایێ و پاشی دوژمنێن مرۆڤایەتیێ رێکخراوا تیرورستی"داعش" بوونە بەربەستێن ئارامی و پێشکەفتنا کوردستانێ. نە ژ دوور بەلکو بەریا چەند ساڵێن کێم چەندین جۆرێن قەیرانان ب سەر هەرێما کوردستانێدا هاتن کو هندەک ژ وان بێی حەق ب سەر ڤێ هەرێمێ دا هاتنە سەپاندن. هەر ژ برینا بەشە بودجەیا هەرێمێ ژ لایێ بەغداڤە و هاتنا مەزنترین رێکخراوا تیرورستی بۆ سەر ئاخا هەرێمێ و نزمبوونا بوهایێ نەفتێ، پاشی گرتنا دەروازەیان ب سەر هەرێمێ و جۆرەها گڤاشتنێن"ئابووری،سیاسی و سەربازی...هتد.
د ڤی ماوەیدا دوژمن و هەڤهزرێن دوژمنان چاڤ ل کەفتنا ئێکجاری یا ڤی کیانێ نوکە هەی بوون.خەون ب خوە ب دەستڤە بەردانا خەلک و سەرکردایەتیا کوردیڤە د دیتن.دیسان د ڤی ماوەیدا هەڤالێن بەرتەنگیا و هەڤالێن "سفرا ئامادە" ژی دیاربوون. د دەمەکیدا کو سەرۆکێ هەرێمێ یێ وی دەمی "مەسعود بارزانی" مل ب ملێ پێشمەرگەیێن قارەمان ل سەنگەرێن بەرەڤانیێ دوژمن دشکاند، و سەرۆکێ حکوومەتێ یێ وی دەمی کو دبیتە سەرۆکێ نها یێ هەرێما کوردستانێ "نێچیرڤان بارزانی"، ب هەمی وێرەکیڤە و خوە ب بەرپرسیار زانینڤە مل ب ملێ هەژارێن ڤێ هەرێمێ سینگێ خوە دا بەر قەیرانان و پلان دادنان کو ڤان بەربەستێن مە ئاماژە پێکری ژ ناڤببەت، لێ هندەک کوردێن ب ناڤ کورد داخازا حکوومەتێن رزگارکەر و کار ب رێکەر دکر. بانگەشا بجهـهێللانا خەباتکەران دکر...هتد!
لێ ل دووماهیێ ژ بلی روویێ خوە یێ راستەقینە نیشا هەڤوەڵاتیێن هەرێمێ دان و ل هەلبژاردنان باجا بێ هەلویستی و ژ بەرپرسیار رەڤینیا خوە ددا، خەونێن وان ژی ل گەل یێن دوژمنان هاتنە ژ ناڤبرن. قەیران هاتنە تێکشاندن،هەلبەت بۆ ڤێ ئێکێ ژی کوردێن ب ویژدان و هەتا سەرۆک،دیپلۆماتکار،رۆژنامەڤانێن وەڵاتێن رۆژئاڤای ژی دانپێدانێ ب خەمخۆری و کاڕێزماییا "نێچیرڤان بارزانی" دکەن. ئەگەر پیچەک ئەڤساڵە ل گەل دوو سێ ساڵێن بەرێ هەفبەر بکەین دێ بۆ مە دیاربیت کو راستە نها ژی کێماسی هەنە و خەلکی گازندە ژ کێمیا هندەک خزمەتگۆزاریان هەنە کو مافێ وانە. لێ تا رادەیەکێ باش قەیدێن قەیرانان هاتینە شکاندن،و قەیرانێن مەزن ل پاش مە مان و پەیوەندیێن ل گەل بەغدا تا رادەیەکێ باش هاتینە ئاسایکرن، هەڤسەنگی ل گەل هێزێن ناڤخوە و وەڵاتێن زلهێز هاتییە راگرتن و ها وەختە کوردستان ب دروستی بکەفتیە سەر رێچکا خوە یا بەری ساڵا "۲۰۱۳" نها ژی پشتی پێکئینانا کابینەیا نەهێ یا حکوومەتا هەرێمێ و یا گرنگتر وەرگرتنا پۆستێ سەرۆکێ هەرێمێ ژ لایێ "نێچیرڤان بارزانی"ڤە پێشهاتێن رۆن و دیارن کو قوناغێن داهاتی دێ قوناغێن باش و باشتر بن هەتا باشتر ژی ژ ژیوارێ نها تێدا دبورین.