بەرپەرێن دیرۆکێ د پڕن ژ وان نەتەوە و کێمەنەتەوەیان یێن بووینە قوربانی (ناسنامە،ئایدولۆژی و بیروباوەرێن خوە). ئێک ژ وان گەل و نەتەوەیان کورد بووینە،کو گەلێ کورد ب گشتی چەندین جاران دەردەسەریێن مەزن دیتینە و دوژمنێن کورد و مرۆڤبوونێ هەر جارێ و ب بەهانەیەکێ ئەڤ گەلە کریە ئارمانجا تیرێن خوە یێن ژەهرکری و هەر چ هۆڤینییا ل دژی هەمی باوەرییان و پڕەنسیپێن مرۆڤبوونێ ل هەمبەر ڤی گەلی ئەنجامداینە. دووماهیک جار ژی هێرشا هۆڤانە یا رێکخراوا تیروری یا داعشێ بوو کو ب دڕندانەترین شێوە هێرشی کوردان ب گشتی و ژ کوردان ژی ئێزدیان ب تایبەت کر. وەک مە ئاماژەپێکری کو بەرکەفتیێن ئێکێ یێن هێرشێ کوردێن ئێزدی و ب تایبەت خەلکێ شنگالێ بوون. رێکخراوا تیرۆرێ "داعش"ب هۆڤانەترین شێوە "زارۆک، پیر،گەنج"کوشتن و کچ و ژن ل گەل پێلا خوە یا رەش برن و پێ ل وژدان و هەموو بەهایێن مرۆڤبوونێ دانان. ب هزاران خۆشک وبرایێن مە یێن ئێزدی ئاوەرەبوون و ب دەهان پێشمەرگەیان جانێ خوە بۆ پاراستنا (خاک،ئالا،زمان و پێکڤەژیانێ)کرە قۆربان.لێ پشتی بورینا پێنج ساڵان ب سەر جینۆسایدا ب سەرێ خەلکێ شنگالێ و دەردوورا وێ هاتی،یا رۆنە کا کێ پشتی روودانا دلئێش خوە ل ئێزدیان کریە خودان و بەردەوامە د خزمەتکرنا وان دا. هەلبەت حکوومەتا هەرێما کوردستانێ ب سەرۆکاتییا سەرۆکێ حکوومەتێ یێ وی دەمی کو "نێچیرڤان بارزانی"بوو هەر زۆ پتر ژ "۲۰"کەمپەیان بۆ خۆیشک و برایێن مە یێن ئێزدی یێن ئاوەرەبووی دروستکرن و هەمی خزمەتگۆزاریێن سەرەتایی بۆ دابینکرن، سەرۆکێ حکوومەتێ لژنەیێن جۆراوجۆر پێکئینان بۆ ب هانا چوونا ئێزدیان،بەردەوام ب پەیوەندیێن خوە یێن دبلۆماسی ل گەل وەڵاتێن هەڤپەیمان ل سەر هێل بوو کو هەڤکارێن گەلێ مە بن، د ڤان پێنج ساڵێن چوویی دا پتر ژ "۳۰۰۰"رەڤاندیێن ئێزدییان یێن کو رێکخراوا تیروری "داعش" رەڤاندین ژ لایێ رێکخراوا کاروبارێن رەڤاندیان کو سەر ب نڤیسینگەها نێچیرڤان بارزانی یە ژ دەستێن "داعش" دەرئینان و بۆ باوەشا خێزانێن وان ڤەگەڕاندن.
سەرۆک نێچیرڤان بارزانی نها ژی بەردەوامە د دابینکرنا پێدڤیێن ژیانێ بۆ برایێن مەیێن ئێزدی و بەردەوامە ل گەل سازیێن ناڤنەتەوەیی ژبۆ ب جینۆسایدناساندنا کۆمەڵکوژیا خەلکێ شنگالێ. د دووماهیک گۆتارا خوە یا کو ل دەمێ ساخکرنا بیرەوەریا کۆمەڵکوژیا شنگالێ ل دهۆک پێشکێشکری ب رۆنی دیارکر کو ئێزدی ب گشتی و خەلکێ شنگالێ ب تایبەت ژ هەژی ژیانەک خۆشترن،دڤێت حکوومەتا عیراقێ ژی د بودجەیا ساڵا"۲۰۲۰" ێ دا پشکەکا تایبەت بۆ ئاڤەدانکرنا شنگالێ و قەرەبووکرنا کەس و کارێن قوربانیان تەرخان بکەت.
ب دیتنا مە یا حکوومەتا هەرێمێ و خەلکێ هەرێمێ بۆ کوردێن ئێزدی کری ب هیچ شێوەیەکی نیڤا وێ ژی نە عیراقێ و نە چ لایەنان بۆ نەکریە!.هەر چەندە ئەڤ هاریکاریکرن ئەرکە و نە منەت. چونکی کوردستان ب وەڵاتێ پێکڤەژیانێ هاتییە نیاسین و چ جۆداهی د ناڤبەرا کوردەکێ ئێزدی و ئێکێ مۆسڵمان و مەسیحی...هتد دا نییە مە هەموویان تەمەت ئێک ماف د ژیانا ل سەر خاکا کوردستانێ هەیە.
ب دیتنا مە خالا هەرە باڵکێش و گرنگ یا سەرۆکێ هەرێمێ د گۆتارا خوەدا خویا کری ئەو بوو دەمێ گۆتی: "کوردستان و ئێزدی ژ ئێک ناهێنە جۆداکرن" ئەڤە د دەمەکی دایە کو گەلەک پلان و پیلان هەبووینە و د بەردەوامن کو شنگال نەبیتە شنگالا جاران ،هندەک لایەن و گرۆپێن چەکدار بووینە ئەگەر کو تا ڤی دەمی شنگال نەهاتییە ئاڤەدانکرن و خەلکێ شنگالێ نەشێن ڤەگەڕنە شنگالێ.لێ دڤێت برایێن مە یێن ئێزدی ژی ژ پلانێن دوژمنان هشیار بن. چونکی تاکە لێڤەگەر بۆ ئاڤەدانکرن و پاراستنا ئێزدیان سازیێن فەرمی یێن هەرێمێ نە.
گرنگە ئێدی ئێزدی دۆست و دوژمنێن خوە ژ ئێک ڤاڤێڕن و دەستێن دەرەکی ژی ژ شنگالێ بهێنە دوورکرن، دا دووبارە ئاڤەدانی بۆ شنگالێ بهێتە ڤەگەڕاندن. ئەگەر ئەو گرۆپ و لایەنێن بووینە ئەگەر کو رەوشا شنگالێ جهگیر و ئارام نەبیت،و دبێژن:"ئەم بۆ خەلکێ شنگالێ ل ڤێرەینە!"،( ئاڤەدانی بۆ شنگالێ،ئارامی و خۆشگۆزەرانی بۆ خەلکێ شنگالێ)بڤێت،زێدەتر نابنە رێگر ل هەمبەر سەرۆکێ هەرێمێ و حکوومەتا هەرێمێ. چونکی ب باوەریا مە ئەگەر ئەو رێگریێن ل سەری مە ئاماژەپێکری نەبن، سەرۆکێ هەرێمێ و حکوومەتا هەرێمێ ب رێکا بکارئینانا پەیوەندەیێن خوە یێن دبلۆماسی دێ زێدەتر گڤاشتنان ل سەر جڤاتا ناڤنەتەوەیی کەن و ب رێکا نوونەرێن کورد ل بەغدا دێ گڤاشتنێ ل سەر حکوومەتا عیراقێ ژی کەن ودێ شیانێن خوە یێن ئابووری ژی بکارئینن ژبۆ دووبارە ئاڤەدانکرنا شنگالێ. هەر وەک سەرۆکێ هەرێمێ گۆتی: دێ کارکەین کو شنگال ببیتە پارێزگەهـ.