ئەزموون و پێشمەرگایەتی و خۆراگری بەرامبەر بە سەختییەكان و لە كاتە سەختەكان ، باشترین بەڵگەی سەركردایەتیكردنی گەلی و میللەتێكن كە قوتابخانەی بارزانیی هەمیشە شوێنی پەروەردەكردنی كەسایەتیی بەهێز و لێهاتووە بووە ، بە دڵنییاییەوە دەستنیشانكردن و راسپاردنی هەر دوو بەرێزان نێچیرڤان بارزانیی و مەسروور بارزانیی بۆ دوو شوێنی هەستیار و گرنگ هەر لە خۆرا نەبووە ، بەڵكو بە پشت بەستن بە كوردپەروەری و نیشتیمانپەروەری و خەسڵەتی ئەو دوو كەسایەتییەن بە تایبەت كە لە ماوەی رابردوو دا زۆر حەكیمانە و ژیرانە توانییان رووبەرووی كێشە كان ببنەوە . هەروەها ئەگەر هەڵوەستەیەكی وردبینانە بكەین ،شەڕی داعش ، پیلانی سرٍینەوەی قەوارەی دەستووری هەرێمی كوردستان و بڕینی بەشە بودجە، مووچەی خەڵكی كوردستان و پیلانگێڕی و كشانەوەی هەندێك لایەن لە كاتێكی زۆر ناسك و هەستیاردا لە حكوومەتەكەی، نەبوونە هۆی ئەوەی جەنابیان لە ئەركە نیشتمانییەكەی ساردبكەنەوە و سەرئەنجام لە ڕووبەڕوبوونەوەی هەموو ئەو گرفت و كێشانەدا سەركەوتوو بوو، هەر ئەمەش وایكرد جەنابیان بە حیكمەت و هێمنی خۆی، بەسەر كۆی ئەو پیلانگێڕیی و پیلانگێڕانەدا زاڵ بێت و دۆخەكەی هەنگاو بە هەنگاو لە گرژی و ئاڵۆزیی و نائومێدییەوە گۆڕی بۆ هیواو و ئومێد و بڕوا بەخۆبوون. بێگومان لەم جیهانەدا هیچ حكوومەت و دەسەڵاتێك بێ كەمووكوڕی نییە و ناشبێت، جێی داخە لە سەردەمی كابینەی هەشتەم هەندێك بەرپرس لە ئاست متمانەی بەرێز نێچیرڤان ئیدریس بارزانی دا نەبوون، بەشێوەیەك لە شێوەكان بەرژەوەندیی كەسیی خۆیان وەپێش بەرژەوەندی میللەت و حزبەوە خست، بوونە جێی ڕەخنەی زۆری هاووڵاتییان بەگشتی و ئەندامانی پارتی دیموكراتی كوردستان بە تایبەتی. ئێستاش كە جەنابیان نزیكە لەوەی ئەم پۆستە جێ بێڵێت و ئەركێكی نیشتمانیانەی گەورەتر وەربگرێت، دەبێت هەمیشە ستایشی خۆڕاگری و ماندووبوونی بەڕێزیان بكەین، چونكە ئەوەی جەنابیان لەم چەند ساڵەی دواییدا كردی و ئەنجامی دا كاری گەورەبوون، بەرانبەر ئەو پیلانگێڕییە زۆرانەی كە دژ بە بەڕێزیان و كابینەكەی لە ئارادابوون. ئەوەی پەیوەستە بە كابینەی نۆیەمیشەوە، تا كاتی نووسینی ئەم چەند دێڕە هیچ ڕووینەداوە و سەرەداوەكانیش تا هەنووكە دەرنەكەوتوون، جیا لە چەند دیدارێك نەبێت، بەڵام پێش دروستبوون و دەستبەكاربوونی ئەم كابینەیە، پێشبینی ئەوە دەكرێت، كە بە دروستبوونی ببێتە یەكێك لە كابینە هەرە سەركەوتووەكان، هەر لە ئێستاشەوە ئەم كابینەیە بووەتە جێگای ستایش و دڵخۆشی زۆری هاونیشتمانیان، بەتایبەتی كە پاڵێوراو بۆ پۆستی سەرۆكی حكوومەت، جەنابی كاك مەسروور بارزانی یە، كە دەرچووی هەمان قوتابخانەی بارزانیی نەمر و ڕۆڵەی بە ئەمەكی جەنابی ڕێبەری گەلی كوردستان كاك مەسعود بارزانییە، لە هەمان كاتیشدا بەو پێیەی بەڕێزیان لە ئەركی پێشووتری وەكو ڕاوێژكاری ئەنجوومەنی ئاسایشی هەرێمی كوردستان زۆر سەركەوتووانە كارەكانی خۆی بە جێ گەیاندووە، هەر بۆیە ئەم دەستنیشانكردنەی بەڕێزیان لەلایەن سەركردایەتی پارتییەوە، بووەتە جێگای ستایشی زۆربەی هەرە زۆری هاووڵاتییان، لە ئێستادا ئومێدەكان بە كابینەی داهاتوو بۆ بەجێ گەیاندنی دروشمەكەی پارتی بەرەو بنیاتنانی كوردستانێكی بەهێز كە برا گەورە سەرپەرشتی دەكات زۆرن. بێشك ئەوەی لە جەنابی كاك مەسروور بارزانی چاوەڕوان دەكرێت ئەوەیە، كە بە دەستێكی پۆڵاین لە هەموو گەندەڵكار و كەمتەرخەمان بدات و ڕێگای ئەوەیان پێ نەدات، گاڵتە بە چارەنووسی گەلەكەمانەوە بكەن و سەروەت و سامان و داهاتی میللەتەكەمان بە بە سوودی خۆیان تەخشان وپەخشان بكەن بە بێ رٍەچاوگرتنی خۆشەویستنی گەل و وڵات كە بەرهەمی خوێنی شەهیدان و ماندووبوونی پێشمەرگە قارەمانەكان و گشت دڵسۆزانی كوردستانە ..
رێبوار حەمەلاو شوانی
