پێشەرگە ناڤەکێ بەرچاڤ و پیرۆزە دناڤ جڤاکێ کورستانی دا ، ژبەکر پێناسا شۆرەشگێریێ و ئازادی و رزگاریا کورد و کوردستانێ بوویە و بەرەڤانکارێ ماف و ئازادیێن خەلکێ کوردستانێ بوویە ، پشتی ئازادیا کوردستانێ ژی ل سالا ١٩٩١ و پاشان دامەزراندنا پەرلەمان و حکومەتا ھەرێما کوردستانێ ، پێشمەرگە پارێزەرێ ڤان دەسکەفتێن نەتەوی و نشتیمانیێن گەلێ کورد بوویە ، پشتی ژناڤچوونا رژێما بەعسا عیراقێ لسالا ٢٠٠٣ ێ و ئاڤاکرنا سیستەم و سازیێن عیراقا نوو لسەر بنەمایێ فیدرالی و دیموکراسی پێشمەرگە وەکی ھێزەکا رێکخستی و دەستووری ھاتە ناساندن .
ژبەر زیرەکی و قەھرەمانیا پێشمەرگە و تۆمارکنا چەندین داستانان ژپێخەمەت مرۆڤایەتیێ ب درێژاھیا بزاڤا رزگاریخوازیا کوردستانێ ناڤێ پێشمەرگە بوویە ھێما و سومبۆلێ ئازادیێ و ناسناما گەلێ کورد ، پشتی شەبۆلێن ھێرشێن بەرفرەھێن تیرۆرستێن داعش بۆ سەر ھەرێما کوردستانێ لسالا ٢٠١٤ و خۆراگری و داستانێن مەزنێن پێشمەرگەھی بسەر ڤێ ھێزا مەزنا تیرۆرستی ، ناڤێ پێشمەرگەھی بوویە ناسنامەکا بھێزترا نەتەوا کورد لسەر ئاستێ جیھانێ و ھەمی جیھانا ئازادیخواز پەسنا پێشمەرگەھی کر و وەک ناسنامەکا جیھانی یا گەلێ کورد دەنگ ڤەدا و دێ شێین بێژین بوویە ھێزەکا نیڤ نەتەوی .
ئەوا سرنجا من راکێشای سەربۆرا راستەقینەیەکا پێشمەرگەھەکێ کوردستانێ یە لدەمێ ئەداکرنا ئەرکەکێ ئایینێ ئیسلامی ل وەڵاتێ سعوودیێ ل مەککەیا پیرۆز ، لدەمێ پۆلیسێن وی وەڵاتی رێگری ل وەلاتیەکێ ئێک ژ وەڵاتێن ئەفریقیا گرتی بۆ فرۆتنا کەل و پەلێن بێ کووالیتی لسەر جاددێن مەکەھێ و پشتی وی ھاولاتی بەرەڤانی لخۆ کری ژبەر لاوازیا بارێ ئابووری ڤی کاری دکەت , پۆلیسێن وەلاتێ سعوودیێ نەچار بوو کەل و پەلێن وی راکری و ھەوڵێن دەستەسەرکرنا وی ژی دای ..
لوی دەمێ ئێک ژ پێشمەرگەھێن کوردستانێ ب جل و بەرگێن کوردەواری دەمێ ئەڤ دیمەنە دیتی وەکی ئەرکەکێ مرۆڤایەتی ناسناما خۆ یا پێشمەرگایەتیێ دانا بەرچاڤێن پۆلیسی گۆتێ ئەز پێشمەرگەھێ کوردستانێ مە و بەرەڤانیێ ل مرۆڤایەتیێ دکەین و مە شەرێ دوژمنێن خۆ و وەکریە و سەرۆکێ مە پێشمەرگەیە و دووستێ میرێن وەیە ، کورد و سعوودی دووستێن ئێکن و ..ھتد ژبەر خاترا من ڤی ھەژارەی رزگار بکە و کەل و پەلێن وی رانەکە ، بێ کۆ بزانیت خەلکێ کێرێ یە .
دەمێ پۆلیسی زانی ئەڤە کوردە و پێشمەرگەیە ، لسەر خاترا وی ناڤبری ئازاد کر .
بڤی رەنگی پولیسێ سعوودی رێز ل جل و بەرگێن کوردی و ناڤێ پێشمەرگەی گرت .
ڕەنگە ڤی پێشمەرگێ کورد ژلایەکی سەرپێچیەک کربیت ، لێ د ھەمام دەم دا دناڤ وەلاتەکی بیانی دا بەرڤانی ل ھەژارەکێ بێ دەسھەلات کر کۆ رزقێ خێزانا خۆ دابین دکەت .
ئەڤ ھەلویستێ ڤی پێشمەرگەھە بەرامبەر کەسەکێ نە نیاس ، بەڵگەیە کۆ پێشمەرگەھێن کوردستانێ بەرەڤانیێ ل مرۆڤایەتیێ دکەن و بوویە ناسنامەکا جیھانی و خەلک رێزێ لێ دگریت .
لەوما سەرۆک بارزانی و سەرۆکایەیتا ھەرێما کوردستانێ و حکومەتا ھەرێما کوردستانێ ژی ھەردەم خۆ ب پێشمەرگە زانی یە و رێزێ ل پێشمەرگەی دگرن .
مخابن ئەڤ پێشمەرگەھێ ژبلی شکاندنا دۆژمنێن گەلێ کورد و مرۆڤایەتیێ لسەر ئاستێ جیھانێ بوویە ناسنامەکا جیھانی بۆ ناساندنا مللەتێ کورد و دابینکرنا پشتەڤانیا سیاسی و لەشکری بۆ کوردستانێ و خەلکەکێ بیانی بڤی رەنگی رێزێ لێ دگریت ، ھندەک پلەدار و سەرکردێن ھندەک حزبێن کوردستانی ھێشتا پێشمەرگە ب میلیشیات دزانن و دبێژینە وان ھوون قوربانی وی پۆلیسی بن ئەوێ بڤی رەنگی رێز ل پێشمەرگەی وگەلێ کورد گرتی و دەست خۆش بۆ وی پێشمەرگەھێ کوردستانێ ئەوێ لوی جھی و بوی رەنگی مۆرڤدووستیا پێشمەگەھی و گەلێ کورد دیار کری .