ئەگەر چی لە ماوەی رابردوو بە خیانەتی و پیلانگێری كەركوووك و ناوچەكە كورستانییەكان داگیركرانەوە ،بەڵام پێشمەرگە هەمووكات كوردستان و گەلەكەی بە گیانفیدایی پاراستووە و رزگار كردووە .پێشمەرگە، بە خوێن كوردستانی پاراستووە و دەیپارێزی و رێگە نادا بستێك خاكی كوردستان بە داگیركراویی بمێنێتەوە . بە دڵنییاییەوە هیچ هێزێك وەك پێشمەرگەی كوردستان توانایی دابینكردنی سەقامگیری و ئاشتی لە ناوچەكە نییە و بە بێ‌ بوونی پێشمەرگە نەك لە عێراق بە ڵكو لە هەموو ناوچەكەی لە مەترسی تیرۆر پاراستووە و دەپارێزێ‌ ..كوردستان خاوەنی هێزێكی ڕێكخراو و مەشق پێكراوی ورەپۆڵایینە كە پێشمەرگەی سەربڵندەو هەموو جیهان چاوی لەئازایەتی و مەردایەتیی ئەو هێزەیە بۆ بەرگریكردن لە خاك و شەرەفی كوردستان. پێشمەرگە دوێنێ لەشاخ شۆڕشی پیرۆزی دژی ڕژێمە دەسەڵاتدارەكانی دژ بە كوردستان كردووەو ئەمڕۆ دژ بە تیرۆرو سبەی سنوور و نەخشەی كوردستان دیاری دەكات و ئاڵای كوردستان لەپاڵ ئاڵاكانی جیهاندا دادەنێت. پێشمەرگە بۆتە ناسنامە و سنبولی هەموو كوردێكی دڵسۆز و هەمیشە دەبێت وەك پیرۆزییەك ناوی ببرێت. هەموو كەسێك لە ژیانیدا قەرزارێكی زۆری باوك و دایكێتی كە تا ڕۆژی مردنی ناتوانێ چاكەو پاداشتیان بداتەوە، ئێستاش ئێمە هێندەی باوك و دایكمان قەرزاری پێشمەرگەین كە هەموو كات گیانی خستۆتە مەترسییەوە بۆ ئەوەی ئێمە لەئاسایش و لەخۆشیدا بژین، بەڵام ئەوەی سەیرە هەندێك بەناو نووسەر و هەندێك بەناو خوێندەوار لەنمایشە ساختەكانی خۆیانداو لە بەردەم شاشەی میدیاكان بوێری ئەوە دەكەن كە لەپیرۆزی و سەروەریی پێشمەرگە كەم بكەنەوە! لە كوردستاندا هەمیشە ناوی پێشمەرگە هەر لەسەرەتای شۆڕشی ئەیلوول و گوڵان ـەوە تا ڕاپەڕینە مەزنەكەی گەلی كوردو تا ئەمڕۆش و سبەی و داهاتووش ناوێكی پیرۆز بووە. پێشمەرگە لای خەڵكی بەغیرەت و بەشەرف و دڵسۆزی كوردستان خۆشەویستە و هەمیشە بە سەروەری ناوی هێنراوە و ڕێزی لێگراوەو وەك ئەستێرەیەكی گەشی ئاسمانی كوردستان تەماشای كراوە. ئەی پێشمەرگەی كوردستان، ئێوەن ناوێك لە زێڕ و ورەیەك لە پۆڵا، كە ئومێدی داهاتووی نەتەوەیەكی مەزڵوومن، سبەی سنوورو نەخشەی كوردستان دیاری دەكەن و نیشتمان وەكو قەڵایەكی لێدەكەن كە دوژمن پێی نەوێرێت و ئەوەی بیەوێت كۆمەڵكوژی چەندبارە بكاتەوە، لە بەرامبەر ئیرادی ئێوەدا بەچۆكدا بێت، گەلی كوردستانیش چیتر لە مێژووی ئێستاو داهاتووی نەترسێت .
لە ماوەی پیلانگێرییەكانی 16ی ئۆكتۆبەری 2017 دژی گەل و قەوارەی دەستووری هەرێمی كوردستان، كەس و لایەن دژ بە كورد هەبوون كە چاوەڕوانی كۆتاییهاتنی كیانی هەرێم بوون و هەندێكی تریان وەك بەدیل خۆیان دەناساند بۆدەسەڵاتی ئێستای هەرێم، بەڵام ئەنجامی ئەم هەموو پیلانگێڕییە، مانەوەی هەرێم و سەركەوتنی پارتی و بارزانی بوو لە كۆتا هەڵبژاردنی كوردستان و عێراقدا.سەرەتا پیلانداڕێژەرانی ڕووداوەكان لە بەغداوە دەستیان پێكرد و رێك كەوتن بە هۆی هێزەوە كۆتایی بە قەوارەی هەرێمی كوردستان بهێنن، بەڵام كۆتا سەردانی سەرۆك بارزانی بۆ بەغدا و راخستنی فەرشی سوور و ناوهێنانی بە سەرۆكی هەرێم لەلایەن عادل عەبدولمەهدی سەرۆكوەزیرانی عێراق، لە كاتێكدا هیچ پۆستێكی فەرمیی نییە، هاوكاتە لەگەڵ ئەو لێكتێگەیشتنەی لە پرسی بودجەی عێراق بۆ ساڵی ۲٠۱۹ لە نێوان هەرێم و بەغدا لە ئارادایە، هەموو ئەمانەش ئاماژەی ڕوونن بۆ ئەوەی كە تا ئێستاش لە بەغدا سەرۆك بارزانی وەك تاكە نوێنەری كورد مامەڵەی لەگەڵدا دەكرێت.چارەنووسی عەبادی و تیلرسۆن و برێت ماكگۆرگ لە هەموو شتێك زیاتر شاهیدن، لەسەر ئەو راستییەی ئیتر هاوكێشەكان لەمە بەدوا گۆڕانكاریی زۆریان بەسەردا هاتووە و ئەم ترافیكە سیاسییەی هەرێمی كوردستان و عێراق بەخۆیەوە دەبینێ، لە كاتێكدایە هەمووان بە بێ دیداری سەرۆك بارزانی، عێراق جێناهێڵن، لێرەوە دەتوانین بڵێین لە داهاتوویەكی نزیكدا چاوەڕێی گۆڕانكاریی زیاتر دەكرێ لە بەرژەوەندیی كورددا.لە كاتێكدا بەریتانییەكان پیلانداڕێژەری سەرەكیی روداوەكان بوون، ئێستا بە دەستبەتاڵی دەرچوون و نەوتەكەی كەركووك بۆ ئێران دەڕوات و ئەمەریكییەكان بە هێزەوە گەڕاونەتەوە ناوچە كوردستانییەكان، سەردانی بەردەوامی شاندە بەریتانییەكانیش بۆ هەرێم، بە جۆرێكە دەتوانین بڵێین لەوە گەیشتوون بۆ بەدەستهێنانەوەی پێگەیان لە ناوچەكەدا، تەنها چارەسەر گەڕانەوە بۆ لای بارزانییە. لە دوای رووداوەكانی ۱٦ی ئۆكتۆبەردا، بە هۆی رۆڵی نەرێنی وەزیری دەرەوە و مەكگۆرك لە ئیدارەی پێشوویی ئۆباما بە جێی مابوون زیانی زۆریان بە گەلی كورد گەیاند و دواتر سەردانی هەردوو وەزیری وزە و دەرەوەی ئەمەریكا لە ماوەی یەك مانگدا بۆ هەرێمی كوردستان، بە راستكردنەوەی هەڵەكانی پێشوو هەژمار بكرێت و لە هەمان كاتدا گرینگیی پێگەی هەرێمی كوردستان دەردەخات لە ڕووی سیاسی و ئابوورییەوە لە داهاتوودا.سەردانی وەزیری دەرەوەی فەڕەنسا بۆ كوردستان، لە پاش بڕیاری سەرۆكی ئەمەریكا دێت بە كشانەوەی هێزەكانی لە سووریا و بڵاوەپێكردنی هێزەكانی لە عێراق، بۆیە گەر سەیری كاتی ئەنجامدانی بكەین، مەبەستی سەرەكیی سەردانەكەمان بۆ روون دەبێتەوە، كە ئەو دۆستە هەمیشەییەی كورد، هەوڵ دەدات ڕۆڵێكی بەهێزتر بگێڕێت لە ناوچەكەدا، باشترین سەركردەش یارمەتیدەر بێ بۆ ئەو مەبەستە، سەرۆك بارزانییە. ئەوەش دەرخەری ئەو راستییەیە، كە بە حیكمەت و كاریزمایی سەرۆك بارزانی، لە ماوەیەی یەك ساڵدا توانراوە ئەم هەموو هاوكێشانە لە بەرژەوەندیی كوردستاندا گۆڕانكارییان بەسەردا بێت.