دەمەکێ درێژە دەڤەرا رۆژھەلاتا ناڤین ب گشتی و دەوروبەرێن کوردستانێ ب تایبەتی ل شەر و ناکۆکیا و ھەڤرکیێن دۆژار ڤالا نەبوویە ، ئوڤەژی ژ ئەنجامێ ھەڤرکیێن پاراستنا بەرژەوەندایە ژلایێ ھژمارەکا وەڵاتان و چارەسەرنەکرنا پرسێن مافێن نەتەوی و نشتیمانی و باوەری نەبوون ب پرنسیپێن دیموکراسیەتێ و ئازادیێ ، تا کار گەھشتە ئاستێ سەرھەلدانا شەرێن نیڤ دەولەتی ، مینا شەرێ ئیراق و ئیرانێ دناڤبەرا ساڵێن ( ١٩٨٠ – ١٩٨٨ ) لدیفرا شەرێ کەنداڤێ دوویێ ژلایێ وەلاتێن ھەڤپەیمان دگەل عیراقێ ، ھەتا گەھشتە رەوشا دنوو یا ئەڤ دەڤەرە کەفتیێ .
ئەڤ ئالوزیێن نھو لڤێ دەڤەرێ ھەی چ ل سووریا ، یان ژی ئیرانێ و تورکیا ژی ھێدی ھێدی بەرەڤ کەفتنا دناڤ ڤێ چالێ دا دچیت ، پشتی ناکۆکیێن دناڤبەرا ئەمریکا و تورکیا لسەر کرینا مۆشەکێن ( ئێس ٤٠٠ ) دێن رووسی ژلایێ تورکیا .
ڤان ناکۆکیا ئەڤ دەڤەرە کریە ڤۆلکانەکا دژوار ، چونکی عیراق و سووریا و ئیران ل جھێن پڕ مەترسی لسەر ئاستآَ جیھانێ دھێنە ھژمارتن و تورکیا ژی بەرەڤ ڤێ ئاراستێ ڤە دچیت ئەگەر زوو ب سیاسەتا خۆ یا نافخۆیی و دەرڤە دا نەچیتەڤە .
ھەرێما کوردستانێ ژلایێ جوگرافی کەفتیە دناڤبەرا ڤان وەلاتێن پڕ کێشە و ئاریشێن نەتەوە و ئێمناھی و جڤاکی ، لەوما ل ئەگەر تەشەنەبوونا ڕەوشێ بزۆتکێن ڤی ئاگرێ دژوار دێ کوردستانێ ڤەگرن .
چ لدەمێ سەرھەلدانا شەرێ چاڤەرێکریێ دناڤبەرا ئەمریکا و ئیرانێ ، یان ژی بەردەوامیا مایتێکرنێن تورکیا ل وەلاتێن دەوروبەر وەک عیراق و سووریا ، چونکی تورکیا لاوازیا ئیرانێ و گەماروویێن بسەر ھاتینە سەپاندن ب دەلیڤە دزانیت بۆ بجە ئینانا ئەجندایێن خۆ ل عیراق و سووریایێ و پەکەکێ ژی بەھانە ددەستێ تورکیا نانە .
ئەوا دلێ مرۆڤێ کورد خۆش دکەت دووربینی و لێزانینا سیاسەتا سەرکردایەتیا کوردستانێ یە بەرامبەر ڤێ رەوشێ و ھەتا نھو سەرەدەریەکا واقعی دگەل رەوشێ کریە و چ ژلایێ سیاسی یان ژی ژلایێ ئێمناھیێ .
راستیەکا ئاشکرایە ھەرێما کوردستانێ ب خەلک و سەرکردایەتیڤە ھەردەم ھەلگرێن پەیاما ئاشتێ و پێکڤە ژیانێ بوونە و ستێرەکا گەشن لبەر چاڤێن جیھانێ .
ئەڤەژی ڤەدگەرێتەڤە بۆ وێ سیاسەت و پەروەردەیا لسەر دەستێ حکومەتا ھەرێما کوردستانێ بسەرۆکاتیا نێچیرڤان بارزانی لسالێن بووری کۆ ژبلی گرنگیدانەکا ب کەرتێن ئاڤەدانیێ و خزمەتگۆزاریێ ، جڤاکێ کوردستانێ فێرێ گیانێ لێبۆردەیێ و پێکڤە ژیان و دیموکراسیێ کریە ، ژلایێ ئێمناھی و سیاسی ژی شیایە سەرکەفتنێن مەزن تۆمار بکەت و بەرێ چەندین لەھی و بیڤەلەرزێن مەزن ل کوردستانێ لاداینە .
ڤان سەرکەفتنێن نێچیرڤان بارزانی وەک سەرۆکێ حکومەتا ھەرێما کوردستانێ باوەری بۆ خەلکێ کوردستانێ دررۆست کریە کۆ وەک سەرۆکێ ھەرێما کوردستانآ ژی ل قۆناغێن داھاتی بسیاسەتەکا سەردەمیانە دێ سەرەدەریێ لگەر ھەر رەوشەکا نەچاڤەرێکری کەت و دێ سەرکەفتنێن مەزنتر تۆمار کەت ، چونکی پێگەھێ وی وەکی سەرۆکێ ھەرێمێ مەزنتر و کاریگەترە لبەرێ و دێ شێت پشتەڤانیا نیڤ دەولەتی بۆ ھەرێما کوردستانێ خۆرتر بکەت کۆ بگەھیتە وی ئاستێ کوردستان وەک گزیرتەکا پڕ خەمل و ئارامی دناڤ ڤۆلکانەکا ئاگری دا ب پارێزیت و جیھانێ پێ حیبەتی بکەت ، چونکی سەربۆرێن دەربازبوویی ڤێ چەندێ دئینە بەرچاڤێن مە .
نەخاسمە کۆ لسەر دەستێ نێچیرڤان بارزانی سەرۆکێ ھەرێما کوردستانێ پەیوەندیێن خۆرت لگەل وەلاتێن زلھێزێن جیھانێ ھاتینە بەرستن و بەرژەوەندێن وان لگەل بەرژەوەندێن کوردستانێ تێکەل کرینە ،
لگەل وەلاتێن جیران ژی بھەما شێوە تێکەلی و پەیوندیێن باش ھەنە و کوردستان نەکریە پشکەک ل ئەجندایێن چ لایەنا ، بەلکی سیاسەتا خۆ یا سەربەخۆ ھەیە .
لەوما دشێین بێژین ھەرێما کوردستانێ گزیرتەکا حیبەتی یە دناڤ ڤۆلکانەکا حیبەتی دا ...!