كاتێك بڵێن كە ئەگەر پارتی بەهێز بێ‌ كوردستان بەهێزە ، ئەو بەمانا حزبییەكەی ، حزبایەتیی نییە ، بەڵكو ئاماژەیەكی روونە بەو كردەوە و هەموو ئەو هەڵوێستە نەتەوەیی و نیشتیمانییانەی كە لە ماوەی 27 ساڵی رابردووو ، ئەنجامی داوە و بینراوە تا بە ئەمرٍۆ . چونكە پارتی هیچ كات لە بەرپرسیاریەتی لە كاتە سەختەكاندا خۆی نەشاردۆتەوە ،بەڵكو لە هەموو قۆناغەكانی خەباتدا لە پاڵ گەلی كورد و دۆزە رەواكەی بووە تا بە ئەمرٍۆ .كوردستان ، حكومەتێكی بەهێز و هەرێمێكی بەهێز واتا میللەتێكی خۆشگوزەران. كاتێك قەوارەیەك خۆی بەهێز دەكات، مەبەستەكەی تەنیا دەبێت سەقامگیری و خۆشگوزەرانیی گەلەكەی خۆی بێت. حكوومەتێكی بەهێز واتا پەرلەمانێكی بەهێز و دادگەی بەهێز و كەرتی تایبەتی بەهێز و سوپایەكی بەهێز. كۆی ئەمانە پێكەوە دەبێت بەهێز بكرێن. بەهێزكردنی لایەك لەسەر حیسابی دەسەڵاتەكانی تر، بەهێزییەكی ناپارسەنگ دروست دەكات. بەبێ بەهێزكردنی هەموو ئەو لایەنانە، زەحمەتە بڵێین كوردستانێكی بەهێز دروست دەبێت. كوردستانێكی پتەو لە ئەنجامی بەهێزبوونی چەند ڕەگەزێكی جیاواز دروست دەبێت. هەمووی بەیەكەوە گرێدراوە؛ لە شوێنێك كێماسییەكی تێ كەوت، كۆی سیستەمەكە لاوازییەك بەخۆیەوە دەبینێت. بۆ ئەوەی حكوومەتێكی بەهێز هەبێت، پێویستیت بە سیستەمێك و پرۆگرامێكی بەهێزە. بۆ جێبەجێكردنی سیستەم و پرۆگرامێكی بەهێزیش، پێویستی بە كەسانی دانا و شارەزا و خاوەن ئیرادە هەیە. حكوومەتی بەهێز، پێویستە پەیڕەوی لە بنەمای "دانانی كەسی شیاو لە شوێنی شیاو" بكات. حكوومەتی بەهێز واتا دانایی لە داڕشتنی بڕیار؛ نەسڵەمینەوە لە جێبەجێكردنی بڕیار. كوردستانێكی بەهێز پێویستیی بە زۆرینەیەكی پەرلەمانی و سەرۆكی هەرێم و هێزی پێشمەرگەیە كە لە پشتی بێت. حزبی یەكەم و سەركەوتوو پارتی دیموكراتی كوردستان بە 45 ئەندام پەرلەمان لە كۆی 111ئەندام خۆی لە خۆیدا پاڵپشتییەكی بەهێزی دیموكراسییە بۆ حكوومەتی نوێ. سەرۆكی هەرێمیش بە سەركردایەتیی ڕێزدار كاك "نێچیرڤان بارزانی"، كارەكتەر و كەسایەتیی شارەزا لە حوكمڕانی، پاڵپشتێكی مەزنە بۆ حكوومەتی نوێ. هێزەكانی پێشمەرگەیش یەكێك بوو لە لەناوبەرانی ڕێكخراوی تیرۆریستیی جیهانی: "داعش". كەسانی پۆڵایین لە پشت ئەم سەركەوتنانەوە بوون، بەشێكیش لەوانە بە باكگراوندێكی ئاسایشی و پێشمەرگەئایەتی حكوومەتی نوێی هەرێمی كوردستان پێك دەهێننەوە. هەروەها كاك "مەسرور بارزانی"
سەرۆكی حكوومەت كوردستان ؛ بێ گومان ئەو وەسفانەی سەرەوە بەتەواوی تێیدا بەدی دەكرێت. ئەم دوو بەڕێزەی لە سەرەوە ئاماژەمان بۆ كردوون، ئاگایان لە گشت خاڵە بەهێز و لاوازەكانی ئەم هەرێمە هەیە؛ ئەوان پیاوی دەوڵەتن.
بەدڵنییاییەو بەرێز نێچیرڤان بارزانی وەك سەرۆكی ھەرێم و بەرێز مەسروور بارزانی راسپێردراو بۆ پێكهێنانی سەرۆكایەتیی حكوومەت، بە ھاوكاری و پاڵپشتیی لایەن و ھێزەكانی تری كوردستان، دەتوانن دووانەیەكی شایستە و ئەكتیڤ و چالاك بن بۆ بەڕێوەبردنی كاروباری ناوخۆیی و دەرەكیی وڵات.تەنیا بڕوانینە ئەو پیرۆزباییانەی لەسەر ئاستی نێوخۆ و عێراق و نێودەوڵەتی لە نێچیرڤان بارزانی دەكرێن بە بۆنەی ھەڵبژاردنی وەك سەرۆكی ھەرێمی كوردستان، ئەوا دەبینین كە سەرۆكی تازەی ھەرێمی كوردستان ئەركێكی گرانی لەسەر شانە، ئەو ئەركە گرانەش دەگەڕێتەوە بۆ ئەو ئەزموونەی كاك نێچیرڤان بارزانی ھەیەتی لە ماوەی رابردوودا، بە تایبەتی لە چوار پێنج ساڵی رابردوودا، كە قەیران و ئاڵۆزیی زۆر روویان لە ھەرێمی كوردستان كردبوو، بەڵام نێچیرڤان بارزانی توانی ئیدارەیەكی باشی ئەو قەیرانانە بكات.نێچیرڤان بارزانی ھەم پشتیوانیی نێودەوڵەتی ھەیە و ھەمیش پشتوانییەكی زۆری نێوخۆیی ھەیە بۆ بەڕێوەبردنی سەرۆكایەتیی ھەرێمی كوردستان، چونكە ئەزموونێكی دەوڵەمەندیشی ھەیە، لەبیرمانە دوای ١٦ی ئۆكتۆبەر ئابڵووقەیەكی دژواری دیپلۆماسی خرایە سەر ھەرێمی كوردستان لەلایەن حكوومەتی ئەوكاتی عێراق و وڵاتانی ھەرێمییەوە، بەڵام نێچیرڤان بارزانی ئەو سەركردەیە بوو توانی ئەو قۆناغە سەختە تێپەڕێنێت و ئەمڕۆ پەیوەندییەكی پتەو لە نێوان ھەردوو حكوومەتی ھەرێم و فیدڕاڵدا ھەیە، بۆیە پێگەی سەرۆكی ھەرێمی كوردستان و ئەو پشتگرییەی ھەیەتی لەلایەن ناوخۆ و سەرۆك بارزانییەوە، دەتوانێ ھەنگاوی زۆر باشتر بنێت بۆ بەرەوپێشبردنی ھەرێمی كوردستان. هەروەها بوونی بەرێز مەسروور بارزانیی وەك سەرۆكی حكومەتی كوردستان پاڵپشت و پشتیوانێكی بەتوانا ، دووانەیەكی كاریگەر هەنگاوەكانیان بەرەو كوردستانێكی بەهێز دەبێ‌..