چەندین ساڵە کۆمەکا خالێن ناکۆک د ناڤبەرا هەرێما کوردستانێ و حکوومەتێن ئێک ل دووڤ ئێک یێن عیراقێ دا هەنە، ئەڤ خالێن ناکۆک د بەردەوامن و ماینە هەلاویستی. گەلەک جاران ئەڤ خالێن ناکۆک بووینە کێشە و هەر لایەک لایەنێ دی تۆمەتبار دکەت. هەلبەت ئەگەر هەر چ کەسێ بیت ب وژدان ل ڤان کێشەیان بنێریت دێ ب ساناهی گەهیتە ئەگەرێن هەبوون و مانا ڤان کێشەیان.
ب دیتنا مە ئەڤ کێشەیێن ماینە هەلاویستی د ناڤبەرا هەرێم و بەغدایێدا، گرێدان ب رادەستنەکرنا نەفتێ،نەکەفتنا ژێر "گەز و مقەس"ێن بەغدایێ نییە ژ لایێ هەرێمێڤە، بەلکۆ گرێدان ب عەقلێ وان حکوومەتێن ئێک ل دووڤ ئێک یێن عیراقێ ڤە هەیە یێن کو هیچ جارەکێ ب وێ نیازپاکی و سینگفرەهییا هەرێم دچیتە پێش ئەو نەهاتینە پێش و هەر جارێ و ب بەهانەیەکێ کێشە دروستکرینە.
ل هەر دەمێ عیراق گەلەک لاوازبووبیت پەنایا خوە ئینایە بەر هەرێمێ و کورد ب برا ب ناڤکرینە. نموونە بۆ ڤێ چەندێ د زۆرن( ژناڤبرنا رژێما بەعس،ئالۆزیێن ناڤمالا شیعەو سوننەیان بۆ دامەزراندنا حکوومەتەکا نوی کو عیراقا رزگاربووی ب رێڤەببەت، و ل ڤێ دووماهیێ هاتنا داعش و گرتنا بەشەکێ مەزن ژ ئاخا عیراقێ ...هتد) ئەو دەم بووینە یێن عیراقێ مینا خازۆکان دەستێ خوە ل هەمبەر کورد و سەرکردایەتییا کوردی گرتین.لێ ب مخابنیڤە دەربازکرنا هەر ئێک ژ ڤان رەوشێن ل سەری مە ئاماژەپێکری ل دووڤدا ل شوونا سەردەستێن بەغدایێ پاداشتێ چاکی و جوامێریا گەلێ کورد و سەرکردایەتییا کوردی بدەن، جارنا نانێ خەلکێ کوردستانێ قوتکریە، هەتا مووچەیێ فەرمانبەر و پێشمەرگەیان قوتکریە د دەمەکیدا کو پێشمەرگە ئەو کەس بووینە یێن بەرەڤانی ژ هەر مرۆڤەکێ زۆڵم لێبووی کری، جارنا ژی چەپەر ل هەمبەر هێزێن پێشمەرگەی داناینە،هەتا دووماهیک جار ب بەهانەیا ریفراندومێ هێرشی هەرێمێ کریە.
لێ سەرکردایەتییا کوردی ب سیاسەتا خوە یا بەڵەنس راگر و دووربین شیایە باوەریێ بۆ وەڵاتێن رۆژئاڤایی دروست بکەت کو گەلێ کورد گەلەکێ ئاشتیخوازە و هەمی دەمان حەز ژ پێکڤەژیانێ دکەت،ب مێرانی بەرەڤانیێ ژ "ئاخ،ئالا،زمان،شەرەف و ناسناما خوە"دکەت لێ شەڕی ناخازیت.هەلبەت بۆ ڤێ مەبەستێ ژی رۆلێ لێڤەگەڕێ کوردان "مەسعود بارزانی"و یێ نێچیرڤان بارزانی یێ پێشچاڤ بوویە. وەک مە ئاماژەپێکری پشتی ریفراندوما سەرخەبوونا کوردستانێ و شازدەی ئوکتۆبەرێ جورە غرورەک و ئەنانیەکێ حکوومەتا عیراقێ گرت تا گەهشتییە وی ئاستی هندەک پێنگاڤێن دویر ژ هەمی بهایێن سیاسی،ئەخلاقی و مافێ هەڤوەڵاتییان هاڤێتن. یا د شیاندا ل دژی کوردستانێ و خەلکێ کوردستانێ خوە ژێ نەدا پاش، ل شوونا سوپاسیا پێشمەرگەی بکەن کو پترین قوربانی د شەرێ داعشدا داین ب تانکێن ئەبڕامس هێرشی پێشمەرگەی کرن. ل شوونا سوپاسیا خەلکێ هەرێمێ بکەن کو چەندین ئاوارەیێن مووسڵ و چەندین ناڤچەیێن دن یێن عیراقێ ڤەحەواندین و مینا یێن مالێ سەرەدەری ل گەل کری. خەلکێ هەرێمێ ئێخستە لژێر ئابلۆقەیێن ئابووری و دەروازە و فرۆکخانە لێ گرتن.لێ سەرۆکوەزیرێن وی دەمی کو نێچیرڤان بارزانی بوو شیا ب لێزانینا خوە و پەیوەندیێن خوە یێن دبلۆماسی و سەرەدانکرنا بەغدایێ دیساڤە سەردەستێن بەغدایێ بینتە سەر مێزا دان و ستاندنان و ئاڤەکێ ب وی ئاگرێ کەربێ داکەت. پشتی هێورکرن و تا رادەیەکێ باش ئاسایکرنا پەیوەندیێن هەرێم و بەغدایێ پەیوەندی بەرەف پێش چوون.
چوونا ڤێ دووماهیێ یا سەرۆکی هەرێمێ بۆ بەغدا و کۆمبوونێن وی یێن جودا جودا ل گەل هەر ئێک ژ سەرۆکوەزیران،سەرۆککۆمار و سەرۆکێ پەرلەمانێ عیراقێ، کو د هەمان دەمدا ئێکەم سەرەدانا نێچیرڤان بارزانی یە بۆ بەغدایێ وەک سەرۆکێ هەرێمێ سەرەدانەک گرنگ و پێدڤییە و دێ یا بەرهەمدار بیت.
چونکی وەک مە ل سەری ئاماژە پێکری خالێن ناکۆک یێن د ناڤبەرا هەولێر و بەغدایێ دا ئەو خالن یێن حکوومەتێن ئێک ل دووڤ ئێکێن عیراقێ بزاڤا چارەسەرکرنا وان نەکری و ب بەهانەیێن جودا جودا هەرێما کوردستانێ پێ سوچبار کری. ژ وان ژی نەفت،دەروازە،مادەیێ۱٤۰...هتد.
نێچیرڤان بارزانی ل دەمێ سەرۆکوەزیر ژی چەندین جاران ب عەبادی،مالکی و یێن بەری وی ژی را گۆتییە کو ئەم بەرهەڤین بۆ هەر هەماهەنگییەکێ کو بگەهینە ئاستێن ئێکلاکەر. لێ وان ب دەڤێ خوە یان ب دەڤێ یێن بن خوەدا دانپێدان کریە کو نیازا چارەسەریان نییە، باشترین بەڵگەژی لێدوانێن "حەنان فەتلاوی"یێن مینا وێ نە. کو ل جهەکی دبێژیت چەندین ساڵە ب هەمی شیان کاردکەین دا کو مادەیێ "سەدو چل"نەهێتە جێبەجێکرن.
لەوما ئەڤ سەرەدانا ڤێ جارێ یا نێچیرڤان بارزانی بۆ هەرسێ سەرۆکایەتیێن عیراقێ یا گرنگ و دجهێ خوەدا بوو .چونکی ل لایەکی سەرەدانا نێچیرڤان بارزانی بۆ لایێ سەرۆککۆماری ئێکڕێزییا کوردان نیشا دۆست و دوژمان ددەت و دێ بیتە پاڵپشتی بۆ سەرۆککوماری ژی کو هندەک پێنگاڤێن د بەرژەوەندا گەلێ کوردستانێ دا بهاڤێژیت. ل لایەکێ دی ئەڤ سەرەدانە سەرۆکی بۆ بەغدا دێ بیتە پشتەڤانییەک کو نوونەرێن کوردان ل بەغدا وەک ئێک تیم کار بکەن و سەنگا کوردان ل وێرێ ب هێزتر لێبکەن،دیسان پێکئینانا لژنەیێن هەڤبەش ل گەل حکوومەتا عیراقێ بۆ گەهشتن ب چارەیێن ئێکلاکەر و تا رادەیەکێ باش هەتا ڤێ گاڤێ نیازپاکییەک ل دەف سەرۆکوەزیرێن نوی یێن عیراقێ بۆ چارەکرنا کێشەیێن هەلاویستی هەیە. لەوما ئەگەر چ پلان و پیلانێن دی ژ لایێ برایێن مە یێن عەرەب و هەڤهزرێن وان ل دژی ڤان پێگاڤێن چارەسەرکرنێ نەهێنە دارێشتن و هاڤێتن!‌ ئاسۆیەک رۆنتر د خێرا عیراقێ ب گشتی و هەرێما کوردستانێ ب تایبەت د ڕێدایە.