مامۆستا و بنیاتنانى مرۆڤـ
بەکر کەریم حەسەن
روناكبیر ونوسه‌رى به‌ناوبانگى میسری نه‌جیب مه‌حفوز ده‌لێ"مامۆستا گه‌وره‌ترین پیشه‌ی هه‌یه، كه هه‌موو پیشه‌كانى تر له سه‌ر ده‌ستى مامۆستا ده‌رده‌چن".
بێگومان له ووتاره‌كانى پێشووتر زۆر باسى گرنگى و بایه‌خى مامۆستامان كردووه له پرۆسه‌ى په‌روه‌رده و فێركردن، به‌ڵام له هه‌مووى گرنگتر رۆڵ و كاریگه‌رى مامۆستا له سه‌ر بنیاتنانى مرۆڤـــ و پێشكه‌وتنى كۆمه‌ڵگه، بێگومان مامۆستا به‌رامبه‌ر به‌رپرسیاریه‌تیه‌كى گه‌وره‌ى مرۆڤایه‌تییه ئه‌ویش پارێزگاری كردن و پارێزراوى له سه‌ر ئه‌مانه‌ت پارێزی كۆمه‌ڵگه كه رۆڵه‌كانمانه كه سه‌روه‌تێكى گرنگى میلله‌ته‌كه‌مانه له داهاتوو و ئاینده دا، وه به‌رپرسیاریه‌تى مامۆستا پێك دێت له پێگه‌یاندن وبنیاتنانى رۆڵه‌كانمان و ئاماده‌كردنیان بۆ ئێستا و داهاتوو به شێوه‌یه‌كى ته‌ندروست و په‌روه‌رده كراو بنیاتنراو كه ببێته قه‌لغانى پاراستنى كوردستان له هه‌موو روویه‌كه‌وه، چونكه هه‌ر مامۆستایه كلیلی بنیاتنانى كۆمه‌ڵگه.
په‌روه‌رده بێ مامۆستا ناتوانێ ئامانجه‌كانى به‌دی بهێنێ، ئه‌وه مامۆستایه جارێك باوكه و جارێك دایكه وجارێك په‌روه‌رده كاره و جارێك گواستنه‌وه‌ى زانیارییه‌كانه و جارێك یارمه‌تیده‌ر و سه‌رپه‌رشتیار و ئاراسته‌كراوێكى سه‌ركه‌وتووه، وه جارێكیش له هه‌مان كاتدا هه‌موو ئه‌وانه‌ى پێشووه كه باسمان كرد. كه‌واته رۆڵ و كاریگه‌رى مامۆستا له سه‌ر قوتابی و تاك و كۆمه‌ڵگه نه پێوراوه و بێ به‌رامبه‌ره هه‌ر مامۆستایه له ناخى قوتابی هه‌موو ره‌فتار و ئادكاری جوان ده‌چێنێ و په‌ره‌ى پێ ده‌دات له‌گه‌ڵ هزر و بیرى قوتابی گه‌شه ده‌كاتو له داهاتوودا ده‌بێته ئه‌ندامێكى كارا و به سوود بۆ كۆمه‌ڵگه و كوردستان، چونكه مامۆستا به‌رده‌وام له هه‌وڵى به‌رز كردنه‌وه‌ى و گه‌شه‌پێدانى توانا وكارامه‌یی وو به‌ها كۆمه‌ڵایه‌تییه‌كانى قوتابییه و رێنیشانده‌ر و پێشه‌نگى كۆمه‌ڵگه‌یه، ده‌رئه‌نجام كۆمه‌ڵگه‌یه‌كى زیندوو وشیار دێته به‌رهه‌م ئه‌ویش له ئه‌نجامى رۆڵ و به‌رپرسیاریه‌تى زیندووی مامۆستا، چونكه مامۆستا رۆڵى راسته‌وخۆ و كاریگه‌رى هه‌یه له سه‌ر بنیاتنانى مرۆڤـــ، ئه‌وه قوتابییه خۆشه‌ویسته‌كانمانن حه‌ز ده‌كه‌ن به‌رده‌وام لاسایی و گوێ رایه‌ڵى مامۆستا دڵسۆزه‌كان بكه‌نه‌وه، ئه‌وا مامۆستا ویژدان زیندووه‌كانن كه به‌رده‌وام ماندوو نابن له په‌روه‌رده كردن و ئامۆژگاری كردن و ئاراسته‌كردنى قوتابییه‌كانمان له‌سه‌ر كارى چاكه و چاندنی تۆوی ره‌وشت و ئادكاری جوان و خۆشه‌ویستى بۆ خاك و نیشتمان و بۆ یه‌كتر و دڵسۆزی بۆ كاره‌كانیان له ناخی قوتابیان له ناو پۆڵ له ده‌ره‌وه‌ى پۆڵ، چونكه ئه‌وه‌ى مامۆستایه‌ك ده‌توانێ رۆژانه چه‌نده‌ها قوتابی كۆبكاته‌وه و ئامۆژگارییان بكات، بێگومان پیشه‌كانى تر ناتوانن بیكه‌ن. چونكه زه‌مینه بۆ مامۆستا ره‌خساوه كه قوتابخانه‌یه و ته‌واوكه‌ری پیشه‌كه‌یه‌تى له هه‌مان كاتدا ئه‌وه‌ى مامۆستا ده‌توانێت له ناو قوتابخانه قوتابییه‌كان كۆ بكاته‌وه و ئاراسته‌یان بكات به‌ره‌و كارى باش و به سوود، بێگومان هه‌مان مامۆستا هه‌رگیز ناتوانێ له ده‌ره‌وه‌ى قوتابخانه و پیشه‌كه‌ى ئه‌نجامى بدات، كه‌واته مامۆستای به‌رێز هه‌رده‌م پیشه‌كه‌ت وون نه‌كه‌یت، مامۆستایه‌تى هه‌لێكى زێرینه و ده‌رفه‌تى ته‌مه‌نه و ئاسوده‌یی ویژدانه بیقۆزه‌وه ویژدانت ئاسوده بكه قوتابییه‌كانمان رۆڵه‌كانمان تێبگه‌یه‌نه و پێبگه‌یه‌نه له سه‌ر ره‌فتار و كردار و هه‌ڵسوكه‌وتى باش و به‌سوود بۆ كۆمه‌ڵگه، له‌سه‌ر ده‌ستى مامۆستا مرۆڤ بنیات بنێن كۆمه‌ڵگه بنیات بنێن نیشتمان بنیات بنێن كه هه‌رده‌م هیچ پیشه‌یه‌ك هاوشان و ركابه‌رى مامۆستا نه‌بووه له بنیاتنان به گشتى.
به‌رێوه‌به‌رى گشتى چاڵاكى وه‌رزش و هونه‌ر
ماسته‌ر له كارگێڕى په‌روه‌رده‌یی
