ــ پەڕلەمانا کوردستانێ ب زۆرینەیا دەنگان باوەڕی دا نێچیرڤان بارزانی کو بۆ چار سالێن داهاتی وەک سەرۆکێ هەرێما کوردستانێ دەست بکار بیت . هەلبەت پشتی رێورەسمێن سویند خارنێ نێچیرڤان بارزانی دێ بزاڤێ کەت د پۆستێ خوە یێ نویدا هەرێما کوردستانێ بەرەڤ کەنارەکێ ئارام ئاراستەکەت . ب دیتنا نێچیرڤان بارزانی دانوستاندن و لهەڤ گەهشتن و کۆمبون لدۆر بهایێن هەڤبەش ، بەرێ بنیاتا پێکڤەژیان و شارستانیەتێیە ، و د هەمان دەمدا بەربەستەکێ بهێزە لهەمبەر ئەگەرێ هەبونا ژهەڤ دابڕیانا وان لسەر پرسیێن سیاسی و ئابوری ...
هەر لسەر ڤێ باوەڕیێ نێچیرڤان بارزانی شیایە ل هەرێما کوردستانێ و ئیراقێ جیهانا دەرڤە ، پەیوەندیەکا ئەرێنی دناڤبەرا پتریا کەسایەتی و پارتێن سیاسی و کەمینەیێن نەتەوەیی دروست بکەت و دناڤ هەر دانوستاندنەکێدا بەشداربیت لدویڤ چارەسەریا هەڤبەش دگەڕیت .
هەلبەت خویایە کو جڤاکێ پێشکەفتی و رەوشەنبیر ، بەرهەمێ سەرکردەکێ رەوشەنبیر و ب ئەزموونە . سەرکردە مینا بابێ میللەتی یە ، ئانکو لسەر ئاستێ خێزانێدا ئەگەر سەرکردایەتیا خێزانێ خودان کەسایەتیەکا رەوشەنبیر و زیرەک و ژێهاتی بوو ، بێگومان بەرهەمێ وی دێ خێزانەکا رەوشەنبیر و زیرەک و ژێهاتی بیت . ئەگەر ئەم ئەڤی وێنەی مەزنتر لێ بکەین و لسەر جڤاکی پراکتیک بکەین ، دێ بینین کو جڤاکەکێ پێشکەفتی و تەندروست بەرهەمێ سەرکردەیەکێ ب ئەزموون و رەوشەنبیر و ژێهاتیە . ئەم دێشێین بۆ ڤێ نموونێ کەسایەتیا نێچیرڤان بارزانی وەرگرین کو دناڤ سیاسەتمەدارێن ئیراق و رۆژهەلاتا ناڤیندا کریارێن وی شاهدن و بزاڤێن وی بەردەوام بوینە بۆ پێشکەفتنا جڤاکێ کوردی و بەرەڤ پێشبرنا ئاستێ زانستی و رەوشەنبیری و شیانێن وی ل رۆژێن بەرتەنگ بۆ جڤاکی دیاربوینە و دەولەتێن زلهێز د ئاستێنن بلند دا پەیوەندیێ پێدکەن دانوستاندنێن سیاسی و ئابوری و بازرگانی دگەلدا دکەن . ئانکو شیایە هەرێما کوردستانێ بگەهینیتە کەنارەکێ ئابوری و بازرگانیەکا سەربەخۆ و دروستکرنا ژێرخانەکا ئابوری بۆ هەرێما کوردستانێ .بێگومان ئەڤە هەمی بۆ بهێزیا کەسایەتیا وی ڤەدگەڕیت .
پشتی هەلبژارنا وی ژلایێ پەڕلەمانا کوردستانێڤە ، لسەر ئاستێ نافخۆیی و نێڤدەولەتیدا گەلەک ژ سیاسەتمەدار و دەولەتێن دەولەتێن زلهێز بۆچونا خۆ لسەر نێچیرڤان بارزانی راگەهاندن . ئەم لڤێرێ دێ بزاڤێ کەین بۆچونا چەند سەرکردە و سیاسەتمەدارێن بناڤ ودەنگ دیاربکەین کو ئومێدەکا مەزن ب چارسالێن دەست بکاربوونا نێچێرڤان بارزانی وەک سەرۆکێ هەرێمێ هەبویە . ب یتنا ( برێت مەکگۆرگ) نونەرێ بەرێ یێ سەرۆکێ ئەمریکا کو د تویتەرێ خودا راگەهاند : (کێم سەرکردە ژ نێچیرڤان بارزانی ژێ هاتی تر و بەهرەدارتر هەنە و رۆژهەلاتا ناڤین پێدڤی ب نێچیرڤان بارزانی هەیە ) . هەروەسا تێریزا مەی سەرۆک وەزیرێن بریتانیا راگەهاند ( چاڤەرێیا بهێزکرنا پەیوەندیێن خوەینە دگەل هەرێما کوردستانێ ) . کونسلێ چینێ ل هەولێرێ دبێژیت ( بدیتنا مە نێچیرڤان بارزانی سەرکردەکێ بهێزە بۆ سەرکایەتی کرنا خەلکێ کوردستانێ ) و کونسلێ کۆریا باشور ل هەولێرێ گۆت: ( نێچیرڤان بارزانی دێ روحەکێ نوی ئێخیتە پەیوەندیێن دناڤبەرا مەدا )
دنافخۆیا ئیراقێ ژی پتریا سەرکردێن سیاسیێن ئیراقێ ب رێکێن جودا جودا پەیامێن پیرۆزباییێ بو نێچیرڤان بارزانی هنارتن و دتنێن خوە لسەر کەسایەتیا وی راگەهاندن. سەرۆک وەزیرێ ئیراقێ عادل عەبدولمەهدی : ( بزاڤێن بەرێ یێن نێچیرڤان بارزانی د ڤەکرنا گرێیێن سیاسی دناڤبەرا هەولێر و بەغدایێ بلند نرخاند و هیڤیا بەردەوامیێ بۆ خواست ) هەروەسا محەمەد حەلبوسی سەرۆکێ پەڕلەمانا ئیراقێ باوەڕیا خۆ ڕاگەهاند کو نێچیرڤان بارزانی دشێت ئاریشەیێن دناڤبەر هەولێر وبەغدایێ چارەسەر بکەت . هەروەسا د نافخۆیا کوردستانێژی حزب و ئالیێن سیاسی باوەڕیەکا مەزن ب نێچرڤان بارزانی هەیە . رێکخەرێ بزاڤا گۆڕان د پەیوەندیەکا تەلەفۆنیدا داخوازا سەرکەفتنێ بۆ نێچیرڤان بارزانی خواست و رابەرێ بزاڤا ئیسلامیا کوردستانێ ڕاگەهاند : نێچیرڤان بارزانی دشێت بسەر ئاریشەیاندا زالبیت . هەروەسا سیهوانه‌یا سیاسى یا په‌كه‌كێ پیرۆزباهى ل سه‌رۆكێ نوو هه‌لبژارتى یێ هه‌رێما كوردستانێ كر و راگه‌هاند؛ ب باوه‌رین نێچیرڤان بارزانى ببیته ‌پارێزه‌رێ مافێن هه‌موو كوردان.
كۆما جڤاكێن كوردستانێ، كه‌جه‌كێ د راگه‌هاندنه‌كێ دا په‌سنا نێچیرڤان بارزانى دا و دیار كر، رێبه‌رێ زیندانیكری یێ په‌كه‌كێ عه‌بدوللا ئۆجه‌لانى هه‌موو ده‌مان دگۆت: نێچیرڤان بارزانى دشێت د خه‌باتا گه‌لێ كورد دا خودان رۆل بیت و كار بۆ گه‌هاندنا گه‌لێ كوردستانێ بۆ ژیانه‌كا ئازاد و دیموكراسى بكه‌ت، له‌وما ژى نێچیرڤان بارزانى جهێ باوه‌رییا وانه‌.
كه‌جه‌كێ دا یه ‌زانین ژى: سه‌رۆكاتییا هه‌رێمێ نوونه‌را ئیراده‌یا ژیانا ئازاد یا كوردانه ‌و نێچیرڤان بارزانى ب خه‌باتا خوه‌ یا كو ل هه‌ر چار پارچه‌یێن كوردستانێ ره‌نگڤه‌داى، ژ هه‌ژى وى پۆستى یه‌.
هەلبەت ئەڤە چەند نمونەیەکێن کێم بوون کو دناڤ خوەیا هەرێمێ و ئیراقێ و دەرڤە مە بەرچاڤ وەرگرتن . بێگومان ئەڤە بەلگەیا هەبونا باوەڕیەکا مەزنە ب دبلوماسیەت و کاریێن داهاتیا سەرۆکایەتیا هەرێمێ . نێچیرڤان بارزنی پشتی هەلبژاردنا وی پەیامەک بەلاڤکر و راگەهاند : ( سەرۆکایەتیا هەرێمێ چەترا ئێکرێزی و کۆمکرنا سەرجەم هێز و ئالیێن سیاسیێن کوردستانێ و پێکهاتیێن ئولی یە و سەرۆکایەتیا هەرێمێ چ جوداهیێ دناڤبەرا هیج ئالیاندا ناکەت هەرێما کوردستانێ مولکێ هەمی کوردستانیانە ، سەرەڕای هەبونا هەمی جیاوازیان )
ئەگەر ئەم لڤێ پەیامێ بنێڕین دێ بۆمە دیاربیت کو نێچیرڤان بارزانی دڤێت بێژیت کو سیاسەت ب کەرب و تۆلڤەکرنێ ناهێتە کرن و ئەو دێ بزاڤێ بۆ ئێکگرتن و ئێکڕێزیا کوردان کەت . ئەڤەژی بو ئەگەرێ ئارام بونا لایەنێ سایکۆلۆژییا خەلکێ کوردستانێ .