چەندی مەل بیرە و بۆ مە هاتییە گۆتن و مە د پەرتووکێن دیرۆکێ دا خواندی،کورد و کوردستانی ئارمانجێن تیرێن (عەرەب،تورک و فارس)ان بووینە. پشتی کوردستان هاتییە پارچە پارچەکرن و هەر وەڵاتەکی پارچەک بۆ خوە بری! عیراق ژی ئێک ژ وان وەڵاتانە یێن کو پارچەکا کوردستانێ ب بەر خوە ئێخستی!. لێ یا جهێ دلخۆشی و شانازییا کوردێن هەر چوار پارچەیێن کوردستانێ و کوردێن هەر قۆلاچەکا دونیایێ ئەو بوویە کو کوردێن ڤی بەشێ کوردستانێ کو باشوورە ب "خەبات،بەرخوەدان ،ماندیبوون و قوربانیدانێ" شیان هندەک مافێن خوە ژ عیراقێ بستینن و مینا هەرێمەک سەربەخوە د کیانێ عیراقەکا ئێکگرتی دا خوە ب رێڤە ببەن. لێ لایەنێ هەردەم شەڕ ب هەرێما کوردستانێ فرۆتی عیراق بوویە. کو حکوومەتێن ئێک ل دووڤ ئێک یێن عیراقێ ل تەنگاڤییان باسێ مافێن کوردان و گیانێ براینێ دکەن و هەر دەمێ دەلیڤەیا خوە دیتی و دبینن یا ژ دەستی هاتی بۆ ژناڤبرنا مە کوردان و مافێن مە خوە نەدایە پاش.هەمی جاران سەردەستێن عیراقێ ل دژی هەمی بوهایێن"ئاینی،دیمۆکراسی، نەتەوەیی...هتد" هێرشی کورد وکوردبوونێ کریە.ل پێش "۲۰۰۳"ێ،رژێما بەعس ب هەمی رەنگان دژی کورد و مافێن کوردان بوویە و پشتی ژ ناڤچوون یان بێژین ژناڤبرنا وێ رژێما دکتاتۆر، حکوومەتێن دووڤدا ژی نە ئەو سەر و چاڤ بووینە لێ هەر ئەو رێک و رێباز بووینه یێن حکوومەتێن فاشستێن بەری وان پەیرەو کرین.ب تایبەت ژی دەما بابەت ناڤچەیێن کوردستانی یێن دەرڤەی ئیدارەیا هەرێما کوردستانێ بن،دەسهەڵاتدارێن عیراقێ دشێن خوینا کوردان ڤەخون بتنێ دا کو ب وان دەڤەران شاد نەبن!.
پشتی هێرشێن دژوارێن رێکخراوا تیرۆرستی "داعش"ێ بۆ سەر عیراقێ ب هەرێما کوردستانێ ڤە.وەک بۆ هەمی لایەکی دیاربووی کو ل گەلەک ناڤچەیان هێزێن عیراقی سەنگەرێن خوە بۆ داعشێ بجهـ هێلان و نەشیان خوە ل هەمبەر هژمارەکا کێم یا تیرۆرستێن داعشێ بگرن.هەتا نەگەهشتن چەکێن خوە ل گەل خوە ببەن و ل گەلەک جهان ژی جلێن ژنان ل بەر خوە کرن و رەڤین.ئێک ژ وان دەڤەران ژی پارێزگەها کەرکووکێ بوو. لێ پشتی پێشمەرگەیێن کوردستانێ لژێر چاڤدێریا راستەوخۆ یا لێڤەگەڕێ کوردان "مەسعود بارزانی"شیاین ل هەمی ناڤچەیێن کوردان هێزێن تیرۆرێ تێکبشکێنن و ئالایێ کوردستانێ ل تەڤایا جهێن ئازادکری بلندبکەن.ئازادی ئارامی خۆشگۆزەرانی بۆ وان دەڤەران هاتە ڤەگەڕاندن. دیسان سەردەستێن عیراقێ ل شوونا سوپاسیکرنا کوردان، ب بەهانەیا ریفراندومێ بەرێ هێرشێن خوە دانە پێشمەرگەی و ب هەڤکارییا بەشەک ژ پارتەکا کوردی ئەو خاکا ب قوربانیدانا گەنجێن کوردان هاتییە ئازادکرن دووبارە هاتە داگیرکرن ڤە.
لێ دیسان تاکە لایەنێ د خەما کەرکووکێ دا پارتی بوویە کو بەرهەڤ نەبوو دانپێدانێ ب وێ داگیرکاری،ب ئەرەبکرن و گوهۆرینا دیمۆگڕافیا وێ دەڤەرێ بدەت و ئەو خەونا ل مێژینە دووبارە ب ئاسانی بۆ داگیرکاران بجهـ بهێلیت. بەرهەڤ نەبوو بەشداری هەلبژاردنان ببیت دا نەکەڤیتە لژێر بارێ دانپێدانێ ب حوکمێ داگیرکەران، ئەندامێن لیستا برایەتی ژی کو پڕانی پارتی بووینە بەرهەڤ نەبوون بکەڤنە لژێر وان پلان و پیلانێن داگیرکەر و هەڤالێن وان. هەر زۆی پارتی دا دیارکرن ئەڤا ل هەمبەر کەرکووکێ هاتییە کرن و بەردەوامی پێ دهێتە دان دوژمنکاری و داگیرکاریە، ب هیچ رەنگەکی جهێ قەبوولکرنێ نییە. لێ ئەو لایەنێ دەستێ خوە کریە د ناڤ دەستێ دوژمنی دا و جار دبێژن: کەرکووک یا ئارامە، جار دبێژن ناڤێ پارێزگەرێ نوی یێ د بەریکا مەدا و جار ژی هەڤدژی خوە د ئاخڤن و دبێژن پارتی هەڤکاریا مە ناکەت بۆ دانانا پارێزگەرەکێ کورد بۆ کەرکووکێ. نها د ئاست وێ زۆلما ل هەمبەر خاک و خەلکێ کەرکووکێ دهێتە کرن د بێدەنگن!.
پارتی ب باشی دایە دیارکرن کو بابەت ب دانانا پارێزگەرەکی ناهێتە چارەکرن.ئەو پلان و پیلانێن هەمبەر کەرکووکێ هاتینە جێبەجێکرن مەزنترن ژ وێ ئێکێ کو پارتی بکەڤیتە موزایدێن سیاسی ل گەل پارتەکا دی یا کوردی. بەلکو ل رێکە چارەیەکێ گەڕیایە کو مادەیێ "۱٤۰"کو مادەیەکێ دەستوورێ عیراقێ یە و تایبەتە ب ڤان ناڤچەیێن کوردستانی یێن دەرڤەی ئیدارەیا هەرێمێ بهێتە جێبەجێکرن.
بۆ ڤێ ئێکێ ژی "نێچیرڤان بارزانی" وەکی هەر جار هەست کرن ب بەپرسیاریەتییا نیشتیمانی و نەتەوەیی و بۆ دەربازکرنا ڤێ رەوشا نەقەبوولکری، بەردەوام د بزاڤێ دابوویە. د ئەنجامدا دووماهیک جار رێکەکا تەمام جیاواز ل رێکێن کلاسیک و دووبارە گرتە بەر، ژبەرکو باش بۆ دیاربوویە کو سەردەستێن عیراقێ نە ڤێت ئەڤ مادەیێ دەستووری بهێتە جێبەجێکرن و هەر جارەکێ ببەهانەیەکێ پاش دئێخن. و ژلایەکێ دیڤە ژی وەکی ئەم هەموو دزانین "نێچیرڤان بارزانی"ب زمانێ دیبلۆماسییەت و رێکێن ئاشتیانە بابەتان چارە دکەت لەوما بۆ ڤی "تەڤنێ ئالۆز و هەڤیرێ تێر ئاڤ نەبووی"ژی رێکەکا جودا و د جهێ خوەدا گرتە بەر... ئەوژی هنارتنا نامەیەکێ یە بۆ سکرتێرێ گشتی یێ نەتەوەیێن ئێکگرتی، کو د نامەیێ دا پێنج پشنیازێن گرنگ و د بەرژەوەندا هەرێما کوردستانێ تێدانە. لێ یاهەرە گرنگ پشنیازکرنە بۆ سکرتێرێ گشتی یێ نەتەوەیێن ئێکگرتی کو هنارتیێ خوە یێ عیراقێ بکەنە ناڤبژیوان بۆ جێبەجێکرنا مادەیێ"۱٤۰"ێ دەستوورێ عیراقێ.

هەلبەت "نێچیرڤان بارزانی" بەرەڤاژی وان کەس و لایەنان سیاسەتێ دکەت یێن بتنێ کەرکووکێ مینا چێلەکا ب شیر دبینن! بەلکو "نێچیرڤان بارزانی"د خەما ئاخ،ئالا،زمان،رەسەناتییا کەرکووکێ دایە،و چەوان نەڤێت کەس مافێن هەڤوەڵاتییەکێ کورد ل هەولێر، دهۆک،سلێمانیێ بن پێ بکەت ب هەمان شێوە بەرەڤانیێ ژ خەلکێ کەرکووکێ وتەڤایا ناڤچەیێن کوردستانی یێن دەرڤەی ئیدارەیا هەرێمێ دکەت.
لەوما ئەگەر لایەنێن کوردی د خەما وان دەڤەران دا بن.و د خەما وان هەڤوەڵاتییان دا بن یێن خانوی و مۆلکێن وان ژێ دهێنە ستاندن، دەخلێ وان دهێتە سۆتن و کەرامەتا وان دهێتە بن پێ کرن. و خوزیارێن وێ ئێکێ بن کو ب ئەرەبکرن و گوهۆڕینا دیمۆگرافییا کەرکووکێ بهێتە راوەستاندن و کورد بگەهنە مافێ خوە یێ رەوا. دڤێت هەڤسۆز و پاڵپشتێن پلانێن نێچیرڤان بارزانی بن.
.نە دووبارە کا چەوان بەرپێک دانە سەرخەبوونا ک
وردستانێ وەسان ل دژی کار و پلانێن سەرۆکێ داهاتی ژی رابوەستن!. چونکی ئەڤ پێنگاڤە ژی مینا هەمی پێنگاڤێن دی یێن جەنابێ وی پێنگاڤەک عەقلمەندانەیە. و خەلکێ ناڤچەیێن کوردستانی یێن دەرڤەی ئیدارەیا هەرێمێ ل بەندا بەرنامێ نەتەوەیێن ئێکگرتی ل عیراقێ نە کو ل دووڤ ڤێ پشنیازا "نێچیرڤان بارزانی" ئەڤ گرێیا عیراقێ ئالۆزکری بهێتە ڤەکرن.