سبحی عبدال یێ بەرنیاس ب حاکم گۆران ، ئەو کوردێ وەڵات پارێز خەلکێ باژارێ ئاکرێ ، هەلگرێ درۆشمێ ئێکرێزی ، چاکسازی و سەرخۆبوون ، ئەوێ ل دەمێ راپرسیا سەرخۆبوونا کوردستانێ ل سالا ۲۰۱۷ ل وەڵاتێن ئەورۆپی زڤریەڤ کوردستانێ و هەلگرێ ڕەگەزناما هولندی .
هەمی هەولێن خۆ تەرخان کر بوون بۆ سەرکەفتنا پرۆسا راپرسیا سەرخۆبوونا کوردستانێ ، پشتی خیانەتا شازدێ ئکتۆبەرا هەمان سال دژی قەوارێ هەرێما کوردستانێ ، دیارە بێ ئۆمێن بۆیە ل بجهــ هاتنا ئارمانجێن وی و کوردێن خودان هەستا نەتەوی و نشتیمانی . بریار دایە بن سیبەرا ئاڵایێ پیرۆزێ کوردستانێ ، وەک نەرازیبوونەک ب تنێ دناڤ چیایێن کوردستانێ بژیت و ئەڤ بریارا وی پەیامەکا گرنگا کوردەکێ رەوشەنبیر و ودان هەلویستێن نەتەوی یە بۆ هێز و ئالیێن کوردستانێ ، ل زڤراندنێ بۆ گیانێ کوردایەتیێ و نەتەوایەتیێ و ئێکرێزیێ .
پاشان بۆ گاهاندنا ڤێ پەیاما خۆ ۆیە پڕانیا باژێرێن هەڕێما کوردستانێ و گەهاندنا دەنگێ خۆ بۆ حزب و دەسهەلاتدارێن هەرێمێ .
دیارە لسەرگرتنا ڤێ هەولێ ژی بێ ئۆمێد بۆیە ، بریارەگا دیترا گرنگ ددەت ، ئەوژی بریار خۆکوشتنێ بەرامبەر ەندین هەزار کەسان بشێوێ راستەوخۆ ل تۆرا چڤاکی فێسبۆکێ و لشەڤا ۳۰/٤ لسەر ۱/٥/۲۰۱۹ ئەڤ بریارا وێرەک ل چیایێن باژێرێ ئاکرێ بجهــ ئینا و پشتی چەند دەم ژمێرەکا ل برینداریێ ، ژیانا وی بداوی هات .
ب دیتنا من ئەڤ بریارا خۆ کوشتنێ ژلایێ رەوشنبیر و وەڵات پارێزەکێ بڤی ڕەنگی ، بریارەکا چەوتە ، پێتڤی بۆ زێدەتر یێ خۆ ڕاگر با و بەردەوامی ب هەولێن خۆ بۆ ئێکرێزیێ و چاکسازیێ و سەرخۆبوونا کوردستانێ و هەول دابان دەنگێ خۆ ب بەرفرەهتر بگەهینتە گەنج و رەوشەنبیرێن هەلگرێن پەیامێن نەتەوی و نشتیمانی و چالاکڤان و داکۆکیکارێن چاسازی و ئێکرێزیێ ، بۆ ئەنجامدانا کەمپینێن بەرفرەهــ و گڤاشتنێ لسەر حزی و دەسهەلاتداریا هەرێمێ ، بۆ روورکەفتن ل پیلانێن دژی ئێک و بەردەوامیا گەندەلیێ .
لێ دیارە ناڤبری لسەر ڤێ چەندێ ژی بێ ئۆمێد بۆیە ،
لێ خۆ کوشتنا حاکم گۆرانی ، پەیامەکا هەرە گرنگە بۆ هەمی حزب و ئالیێن کوردستانێ و حکومەتا هەرێمێ ، کۆ ئەڤ دژبەری و ناکۆکیێن ناڤخۆیی خەلکێ کوردستانێ د ئێشین و بریدار دکەن ، چۆنکی بهزاران خەلکێ خودان ئەڤ هەلویستە هەیە و خەلکەکێ زۆر ب کوشتنا وی داخبار بوو ، لەوما لدەمێ ریندابوونا وی دچەند دەم ژمێرەکا ب هزاران کەس بەرهەڤ بوون بۆ هەر هاریکاریەکێ .
خەمباربۆنا بەرفرەها خەلکێ کوردستانێ یێ نشتیمان پەروەر و وەلات پارێز و ئێکگرتن خاز و چاکسازخوان ، بۆ خۆ کوشتنا حاکم گۆرانی ، نیشانێ هندێ یە کۆ کەسێن خۆدان ئەڤ هەلویستە و هەلگرێن ڤان پەیامانە . دخازێن بزۆترین دەم ئێکرێزیەکا تمام و ب بیر و باوەر دناڤبەرا هەمی ئالیێن سیاسی یێن کوردستانێ دروست ببیت و پێکڤە کار بکەن بۆ ئاڤاکرنا حکومەتەکا نشتیمانی و چەسپاندنا یاسایێ و داوەریێ و ئەنجامدانا چاکسازیێن بنەرەتی و نەهێلانا گەندەلیێ ، ژلایێ سیاسی ژی پلان و بەرنامێن ستراتیژی و ئێکگرتی دابرێژن بۆ بجهــ ئینانا هیڤی ئارمانجا سەدان ساڵێن خەلکێ کوردستانێ خەبات بۆ کری و قوربانی بۆ دای و ل راپرسیا ئیلۆنا سالا ۲۰۱۷ بریار لسەر دای ، کۆ سەرخۆبوونا کوردستانێ .
بەرۆڤاژی بەردەوام بوون لسەر هەڤدژیا ئێکدو و چونە بن پەڕێن رژێمێن داگیرکارێن کوردستانێ بۆ بەرژەوەندێن مادی و کەسایەتی . دوور نیە رەفتارێن چەوتێن بڤی ڕەنگی و مەزنتر ژی دناڤ جڤاکێ مەدا پەیدا ببن و ببنە دیاردە و کۆنترۆلکرن بزەحمەت کەڤیت .
پێتڤی یە هەوادارێن حاکم گۆرانی ، خۆکوشتنا وی بکەنە پەیامەکا ئاشتیخوازانە بۆ هەمی حزبێن کوردستانی ، بۆ ڤەگەریانێ بۆ گیانێ ئێکتر قەبۆلکرنێ و پێکڤە ژیانێ و کارکرنێ ژپێخەمەت کوردستانەکا ئێکگرتی و خودان سازی و سەروەریا یاسایێ و بەرەڤ بهێزکرنێ و سەرخۆبوونێ و دەست نیشان کرنا وی ئالیێ خەمسار و دۆرکەفتی ل داخازی و ئارمانجێن خەلکێ کوردستانێ ، ل کەنالێن ڕاگەهاندنێ و تۆرێن جڤاکی . سڵاڤ ل گیانێ حاکم گۆرانی و خودێ ب بەهەشتا بەرین شاد بکەت و هەدارێ بدەتە ماڵبات و کەس و کار و هەڤال و هەڤبیرێن وی .