ئێک ژ ئاریشێن جیهان توش بویێ بابەتێ (ژینگەهێ) یە و چەندین (کونفرانس و کونگر)ـێن نیڤ دەولەتى بو بەرسینگ گرتنا پیس بوونا ژینگەهێ هاتینە ئەنجام دان بەلام تانوکە نەشیاینە ب گەهنه ئەنجامەکێ گەلەک باش چونکە زوربەیى وەلاتێن دونیایێ بەشدارن د پیس کرنا ژینگەهێ دا نەخاسمە (وەلاتێن زل هێز و مەزن) و ژوان وەلاتانژى وەلاتێن پێشەسازیا وان زور پێشکەفتى..
ل سەر ئەڤێ چەندێ رێککەفتنێن نیڤ دەولەتى دناڤبەرا وەلاتان دا هاتینە ئەنجام دان بەلێ بەرژەوەندێن ئەوان ناخازنە هندێ کو پێگریێ ب خال و برگەیێن ئەڤان رێککەفتنا بکەن و بەردەوام گەفێن ڤەکێشانێ هەنە ب تایبەت ژلایێ وەلاتێن وەکو (ئەمریکا) چونکە مەزاختنێن وان یێن (ئابورى) زور دبن.
دەمێ ئەم باس ل ژینگەهێ دکەین مەرەما مە (ئاخ و ئاڤ و هەوا) و سروشت ب گشتى یە، سوپاس بو خودێ جوگرافیا (کوردستان)ـێ ل جهەکێ زور پاک و جوان دانایە کو هەمى ئالاڤێن پاک راگرتنا ژینگەهێ ل کوردستانێ د بەرهەڤن، دگەل هندێ ئالاڤێن تێکدانا وێ ژى دگەل پێشکەفتنا نوکە د زێدەبوونێ دا نە، فارس دبێژن (باژێرێ مە مالامەیە) ئانکو ئێکەم پێنگاڤ بو پاراستنا ژینگەهێ ژ مالا مروڤى دەست پێ دکەت پاشان (جادە و باژێر)، هەردەما رەوشەبێریا پاک راگرتنا ژینگەهێ د ناف مالەکێ دا دروست بو دێ رەنگڤەدانا وێ ل سەر کومەلگەهێ ب گشتى هەبیت چونکە (مال) بنەمایێ پێکئینانا کومەلگەهێ یە، د هەوا حەفت روژى دا ئەوا ژلایێ سەروک وەزێرین کوردستانێ ڤە هاتیە راگەهاندن، مە وەکو (تاک) ملکەچ دکەت کو بەشدارى ئەڤێ هەوێ بین و ببینە ئالاڤەک بو راگرتنا ژینگەها کوردستانێ، حکومەتێ هەمى هەولەک ئەنجام داینە کو ژینگەهێ ب شێوازەکێ زانستى و لدیف پیڤەرێن نیڤ دەولەتى ب پارێزن و بەشداربونا سەروک وەزیران بخو ئاماژەیەکە بو گرنگیا ئەڤى بابەتى بەلێ ئەگەر لایەنێن پەیوەندیدار و تاکێ کورد هەڤکار نەبن ئەم نەشێین ب گەهینە وان ئەنجامێن مە دڤێن، لەورا ل سەر مە پێدڤى یە ئەم ئەڤان خالان بەرچاڤ وەربگرین:
پاراستنا ئاخ و ئاڤ و هەوایێ کوردستانێ و دویر کەفتن ژ ئەوان کریارێن ئەڤان پێکهاتێن ژینگەهێ تێک ددەن.
دویر کەفتن ژ تێکدانا سروشت و چیا و زەفیێن مەزن یێن کوردستانێ ب بەهانەیا ئاڤاکرنا پروژان بەلکو دڤێت حکومەت رێگریێ ل ئەڤێ چەندێ بگریت.
گرنگیدان ب پەیداکرنا کەسکاتیێ دناڤ کولان و جادە و باخچێن باژێرى.
بەلافکرنا رەوشەنبیریا پاراستنا ژینگەهێ ب رێکا پەروەردە کو بنەمایە رەوشەنبیریا گشتى.
دام و دەزگەهێن حکومى و نەحکومى ب تایبەت رێکخراوێن جڤاکێ مەدەنى ب هەوێن هەیڤانە رابن بو پاراستنا ژینگەها جوان یا کوردستانێ.
دبیت زور خالێن دیتر هەبن کو هەرئێک ژمە ئەوان خالان ب گرنگ ب زانیت بەلێ ب دیتنا من بەلافکرنا روشەنبیریا پاک راگرتنا ژینگەهێ مەزنترین خزمەتە بو مروڤایەتیێ نەخاسمە ئەم یێ بەرەف وەرزێ گەرماتیێ ڤە دچین ل قوناغێن داهاتى یێن جیهانى شەرێ ژینگەهێ و ئاڤێ یە و ب دەهان ڤەکولین هاتینە دروست کرن کو ئەگەر وەلاتێن جیهانێ پێگیریێ ب رێککەفتێن پاراستنا ژینگەهێ نەکەن مەترسى ل سەر نەمانا مروڤى هەیە ل جیهانێ.
ل دەمێ بووری زور بەداخەوە مە ب دەهان وێنە دیتینە ژ سەیرانگەهێن کوردستانێ ئەف د جەرک بڕ بوینە بو ژینگەها کوردستانێ،چ جاران ئەف رەفتار و کریارێن نەجوان خزمەتێ ناگەهیننە مە و دڤێت راگەهاندن هەمى بەشداربیت د بەلافکرنا رەوشەنبیریا ژینگەهێ دا و ئەڤ حەفتیە ببیتە حەفتیان گشت خێزان و مالباتان و تاکێ کورد بو سەرئێخستنا وێ و ئەم هەمى هەڤکاربن دگەل سەروک وەزیران د ئەڤى پروژێ زور گرنگ و مروڤایەتى دا.