دەمەکێ درێژە بابەتێ پاراستن و پاقژ راگرتنا ژینگەهێ بوویە مژارەکا جیهانی،ب تایبەت ل دەف وەڵاتێن پێشکەفتی ساڵانە کۆژمێن مەزن یێن پارەی دهێنە مەزاختن،پلانێن دورمەودا بۆ ڤێ مەبەستێ دهێنە دارشتن.نەمازە پشتی شوڕەشا پیشەسازی،زێدەبوونا کارگەهێن جۆرا و جۆر،زێدەبوونا بکارئینانا وزێ د بیاڤێن جودا جودا دا،زۆربوونا مرۆڤان و پێدڤیێن وان...هتد. ژینگەهـ و پیسبوونا ژینگەهێ بوویە ئێک ژ مژارێن ئالۆز ل سەرانسەری جیهانێ. ئەگەر ل وەڵاتێن پێشکەفتی کو خوەدی مێشکەکێ ڤەکرینە و گرنگیێ ب هەر تشتی ددەن ب تایبەت ئەگەر بابەت ساخلەمی و ژیان بن، وەسان ژینگەهـ ببیتە مەترسی!، چەوان ل وەڵاتێن جیهانا سێیێ، ژینگەهـ نابیتە دەردێ ل سەر هەموو دەردان دا؟!.
ئەگەر باس ل ژینگەها کوردستانێ بکەین...
کوردستان ب سروشتێ خوە یێ خوەزایی ئێک ژ وەڵاتێن هەرە جوان و سەرنجڕاکێشە،ژینگەها کوردستانێ ژینگەهەکە کو ژ بەرخەملا وێ ناهێتە هەڤبەرکرن ل گەل ژینگەهێن زۆربەیا وەڵاتێن دونیایێ.پڕە ژ چیا،کانی،رووبار،دۆل،دەشت،گر و بانێن قەشەنگ. لەوما هەر جارا دوژمنێن کوردان هێرشی کوردستانێ کر بیت ژ بلی دوژمندارییا وان ل گەل کوردبوونێ تشتێ هەرە زۆر کو وان چاڤ پێ رانەبووین، ژینگەها کوردستانێ بوویە. هەر ژبەر ڤێ کەربا د دلێ وان دا ب هەموو رێکان بزاڤێن تێکدان،ژێبرن،سووتن و نەهلانا ژینگەها کوردستانێ کرینە،هەتا ب چەکێن کیمیایی بزاڤێن تێکدانێ کرینە.لەوما هەتا نوکە ژی پاشمایێن هێرشێن وان یێن هۆڤانە ل سەر خەلک و ژینگەها کوردستانێ ماینە و د دیارن.
ئەو پرسێن کو گەلەک جاران ل سەر ژینگەها کوردستانێ دهێنە ئازراندن ئەڤ پرسە نە،چ بوو ژینگەها کوردستانێ هاتییە کرن و پێدڤییە چ بهێتە کرن؟!
ئەگەر ب ویژدان بەرسڤا ڤان پرسان بهێتە دان،دڤێت رۆلێ سەرۆکێ حکوومەتێ "نێچیرڤان بارزانی"نەهێتە ژبیرکرن، چونکی ئێک ژ درێژەپێدەرێن هزر و رەفتارێن سەرکردەیێن بەری خوە یێن مینا"شێخ عەبدلسەلام،شێخ ئەحمەد،مەڵامستەفابازانی"یە، ب تایبەت د مەسەلەیا ژینگەهپارێزیێ دا،هەر ل سەر دەستێ وی بڕیارێن گۆنجای بوو پاراستنا ژینگەهێ هاتنە دەرکرن،دەستەیا پاراستنا ژینگەهێ هاتە دامەزڕاندن،چەندین گوندێن کاڤلکری هاتنە ئاڤەدان کرن و دووبارە ژیان بۆ ڤەگەڕاند،سزا بۆ تێکدەرێن ژینگەهێ هاتن ڤەبڕین،رێک بۆ رێکخراوێن ژینگەهـ پارێزیێ هاتنە خۆشکرن،کۆڕ و سمینارێن بەرفرەهـ بۆڤێ پرسێ هاتنە سازکرن و رێژەیەکا زۆر یا پاڵاوگەهێن نەیاسایی ژی هاتنە گرتن.
لێ هێشا ژینگەها کوردستانێ ل دووڤ وێ خواستێ نینە یا کو جەنابێ سەرۆکێ حکوومەتێ و تەڤایا خەلکێ ژینگەهپارێز خوەزیارێن وێ.چونکی سەرباری هەبوونا رێژەیەکا زۆر یا ئوتۆمبێلان و بکارئینانا وزەیەکا زێدە، و کارتێکرنا شەڕێن سەپاندی ل سەر ڤێ هەرێمێ. ئاستێ هشیارییا مە وەک تاکێ ڤی وەڵاتی ژی ل ئاستێ پێدڤی نییە، بەڵگەیێ ڤێ ئێکێ ژی بڕینا دارایە،سووتنا سروشتی یە،کوشتنا کەو و جۆرەها گیانەوەرێن کویڤی یە، هاڤێتنا پاشمایێن مە یە بۆ ناڤ سروشتێ کوردستانێ ب تایبەت ژی جهێن گەشتیاری.ئەڤە ل دەمەکی کو وەڵاتێن پێشکەفتی پتر ژ مالێن خوە جهێن خوە یێن گەشتیاری د پارێزن. لەوما گرنگە ئەم هەمی ل گۆتنێن سەرۆکێ حکوومەتا هەرێمێ"نێچیرڤان بارزانی" خوەدان دەرکەڤین، دەما دبێژیت:کا چەوان مالێن خوە دپارێزین پێدڤییە ب هەمان شێوە ژینگەها وەڵاتێ خوە ژی بپارێزین، چەندی ژ مە دهێت دڤێت داران بچینین،پاشمایێن خوە نەهاڤێژین،قوربانیێن زۆر بۆ ئاخ،ئاڤ و ژینگەها کوردستانێ هاتینە دان، دڤێت وەسان بپارێزین کو ئەم ساخلەم تێدا بژین و نڤشێ ل دووڤ مە ژی دا درێژە پێدەرێ ژینگەهپارێزییا مە بیت دا ئەو ژی ژینگەها کوردستانێ پاقژ و پاراستی بهێلن و ب بەختەوەری تێدا بژین.