سەرباری ئەو هەل و مەرجێ سیاسی و جوگرافیێ سەخت کو کوردستان کەفتیە تێدا و بویە ئەگەر کو وەلاتێن دژە کورد هەردەم لدژی مافێن رەوایێ گەلێ مەبن . لێ کورد دناڤ مالا خوەژی دا هەردەم د خۆناغێن سەختدا توشی ململانێیەکا سەخت و دووبەرەکیا نافخۆیی و ململانێیەکا کوردی ـ کوردی بویە ، کو لسەر ئاستێ نافخۆیی و نێڤدەولەتیدا زیانەکا مەزن ل دۆزا نەتەوا کوردی دایە .
لدوماهیک هەلبژاردنێن پەڕلەمانێ کوردیستانێ پارتا دیموکراتا کوردستانێ شیا زۆرترین کورسیا بدەستخۆڤە بینیت کو (٤٥) کورسی بوون . ئانکو پێکئینانا حکومەتا داهاتی کەفتە ستۆیێ پارتا دیموکراتدا . پشتی بورینا پێنچ مەهان ،لێ هێشتا کابینەیا نەهێ پێک نەهاتییە .ل کابینەیا هەشتێ دا ، پارتی ئەزمونەکێ باش دگەل حزبێن بەشدار د وێ کابینێدا نەبوو، ژبەر هندێ پارتی نها د پێکئینانا کابینەیا نوو دا هشیارتر سەرەدەریێ دگەل پێکئینانا کابینەیا نوو دکەت . چونکی ئەو چارسالێن بوری وەکە تالترین وەرزێ پێکڤە کارکرنا پارتی و هێزێن سیاسیێن کوردستانێ بوون . باوەڕی دناڤبەرا حزبێن کوردیدا نەک هەر لاواز بوو، دێ شێین بێژین هەر ناما بوو. ژبەرهندێ نها پارتی ب مفا وەرگرتن ژ سەربۆرێ کابینەیا بوری ، بزاڤا دروستکرنا پەیوەندیێن داهاتی دگەل حزبێن کوردی دکەت و رێککەفتنێن نوی و بەروەخت دگەل وان ئیمزا دکەت .
د پێکئینانا کابینەیا هەشتێ دا پارتی گەلەک ب سینگەکێ بەرفرەهـ پۆستێن بەرکەفتیێن خوە ل حکومەتا هەرێما کوردستانێ و حکومەتا ئیراقێ بەخشینە حزبێن دن یێن کوردستانێ ، و دەمێ ئۆرگانێن پارتی دگۆتن چما پارتی پۆستێێن خوە ددەت ئالیێن دن ؟ بەرسڤا ئەڤێ پرسێ ئەوبوو، پێخەمەت ئێکرێزی و پاراستنا ئێک گوتاریا کوردی ل بەغدا و هەبونا باوەڕیەکا زێدەتر دناڤبەرا پارتێن کوردیدا ... لێ د راستیێدا ئەڤ هاوکێشە بەروڤاژی لێ هات ل بەغدا و هەرێما کوردستانێ دژایەتیا پارتی هاتەکرن . ب تایبەت دناڤ پەڕلەمانێ کوردستانێ ئەڤ دیاردە ب رونی هاتە هەست پێکرن .
نها پشتی بورینا پێنچ هەیڤان بسەر هەلبژاردنێن ۲۰۱۸ ێ ، پارتا دیموکراتا کوردستانێ و بزاڤا گۆڕان گەهشتنە رێککەفتنەکا سیاسی و هەردوو ئالیان ئەو رێککەفتن ئیمزا کر. هەر چەندە پتریا کۆمبونێن پارتی بۆ پێکئینانا حکومەتا داهاتی دگەل ئێکەتیێ بوون، لێ ژبەر گرفتێن نافخۆیی ئێکەتی نەشیا خوە ئێک ئالی بکەت . هەر ئەڤەژی بو ئەگەرێ هندێ کو دەستەیا سەرکایەتیا پەڕلەمانی هاتە هەلبژاردن و ئێکەتی د کۆمبونێدا بەشدار نەبوو . (( یەکێتی شەڕی پلە و پۆست ناکا )) ئەڤە گۆتنا ( لەتیف شێخ عومەر ) ، بەردەڤکێ ئێکەتیا نشتیمانیا کوردستانێ یە. هەلبەت هەر کەسێ ئەلف و بێیا سیاسەتێ بزانیت ، باش دزانیت ئەوا نها ئێکەتی دکەت شەڕێ پلەوپۆستایە ئان نە !! شکاندنا میکانیزما هەلبژاردنا سەرۆک کۆمارێ ئیراقێ ئەگەر شەڕێ پلە و پۆستان نەبیت ، دێ چ بیت ؟!! ڕێگری کرن بۆ پێکئینانا کابینەیا نەهێ و نەرازیبون بۆ کۆمبونا پەڕلەمانی ئەگەر شەڕێ پلە و پۆستان نەبیت، دێ چ بیت ؟!! فرۆتنا کەرکوکێ و خیانەتا شازدەی ئۆکتۆبەرێ و پشتی ب دەستەکێ بەتال ماین و داخوازکرن ل پارتی بۆ دانانا پارێزگەهەکی ژ ئێکەتیا نشتیمانی بیت ئەگەر شەڕێ پلە و پۆستان نەبیت، دێ چ بیت ؟!! مە دڤێت بپرسین ، رۆژا شازدەی ئۆکتۆبەرێ دەمێ ئێکەتیێ کەرکوک و دەوروبەرێن وێ پێشکەشی حەشدا شیعی کر. ( ئاراز ێ شێخ جەنگی ) د کەنالێن راگەهاندنا حزبا خوەدا گۆت : رەوشا کەرکوکێ ئاساییە و ناڤێ پارێزگارێ نوو یێ کەرکوکێ کو ل ئێکەتیا نشتیمانی یە یێ د بەریکا مندا ) گەلۆ چ بسەر وی ناڤی هات ؟ چما نها دبێژنە پارتی رەوشا کەرکوکێ ئالۆزە و وەرن دا پارێزگارەکێ بەشدار ل شازدەی ئۆکتۆبەرێ دانین ؟
ئێکەتی دناڤ خوەیا خوەدا د رەوشەکێ ئالۆزدایە و نەشێت بڕیارێن گرنگ ب ساناهی ئێک ئالی بکەت . ژبەر هندێ هەرجار ب هەجەتەکێ خوە ژ رێککەفتنێ دگەل پارتی ڤەدکێشیت . ئێکەتی نها توشی فۆبیایێ هاتیە و ل سیبەراخوەژی دترسیت .