پشتی سەرهلدانێ تا نها، پێنج ساڵێن بوری ،"دلئێشترین،نەخۆشترین،کارەساتبارترین و رەشترین" ساڵ بووینە بۆ هەرێما کوردستانێ.
پشتی هاتنا توندڕەوترین رێکخراوا تیرورستی،بڕینا بودجە و مووچەیێن هەڤوەڵاتیێن هەرێمێ ژ لایێ حکوومەتا عیراقێ،نزمبوونا بوهایێ نەفتێ، (۱۸۰۰۰۰۰)ملیۆنەک و هەشت سەد هزار ئاوەرەیان هەوارێن خوە گەهاندینە بەر دەرازینکا دلۆڤانییا خەلک و حکوومەتا کوردستانێ،ئابلۆقە و پیلانێن وەڵاتێن هەڤسوی بۆ سەر هەرێمێ،هەبوونا تێکدەر،خائین و بەرژەوەندخازێن ناڤخویی...هتد. کوردستان ل بەهەشتەکێ بەرەف زیندانەکا تێلبەندکری بر و تاکێ کورد ل ڤێ هەرێمێ نەخۆشترین رۆژێن ژیانا خوە دەرباز دکرن. حکوومەتا هەرێمێ ژ نەچاری بڕیارا پاشەکەفتکرنا مووچەیێ فەرمانبەران دەرئێخست،هەر وەک سەرۆکێ حکوومەتێ دایە دیارکرن کو بڕیارا پاشەکەفتکرنا بەشەک ژ مووچەیێ فەرمانبەران گرانترین و نەخۆشترین بڕیارا وان بوویە د هەموو ژیانا وی یا سیاسیدا .
.لێ چەوان دهێتە گۆتن کو:(هەڤال د تەنگاڤیان دا دیار دبن) ب هەمان شێوە "رێبەر و سەرکردەیێن وەڵاتان ژی ل بەرتەنگی و قەیرانان دا دیار دبن"
وەک مە ئەگەر ل سەری دیارکرین، کاودانان حکوومەتا هەرێمێ نەچارکر کو ژ بۆ دەستنەدانا ئەڤا هەی و هێلانا کیانێ هەرێمێ، بڕیارەکا ب ڤی ئاوایی بدەت. لێ حکوومەتێ و ژ حکوومەتێ ژی پاڕتی و ژ پاڕتی ژی جەنابێ سەرۆک وەزیرێن هەرێمێ"نێچیرڤان بارزانی" سەرباری هەموو گڤاشتن،ئاستەنگ و نەخۆشیان، دەست دانەهێلان و مینا گەشتیڤانەکێ شاڕەزا گەشتییا دەهان کون تێڤەبووین، ل نیڤا رێ نەهێلا و کاروانێ خوە بۆ ئاراستەیێ دروست و کەنارێ خۆشگۆزەرانیێ دا ڕێ ،تا ب هەڵوەشاندنا بڕیارا پاشەکەفتکرنا مووچەیێ فەرمانبەران گەشتی گەهاندە کەناری.دڤێت ژبیر نەکەین هەڤوەڵاتیێن ڤێ هەرێمێ و ب تایبەتی ژی فەرمانبەر د خۆڕاگربوون و پشتا خوە ب خودێ و پاشی ب حکوومەتاخوە بەست بوو.
لەوما ژی ژ ئەڤرۆ وێڤە،گەلێ مە دێ بەرهەمێ بێهنفرەهی و خۆڕاگریا خوە و سیاسەتا خوە نەچەماندنێ یا سەرکردەیێن خوە وەرگریت.ئەڤ نەورۆزە دێ نەورۆزا دلشادی و بێ قەیرانیێ بیت و خەلکێ مە ب سەیران و دلگەشیەک مەزن دێ تۆلێن نەخۆشیێن پێنج نەورۆزێن بوری ڤەکەن. ئانکو دشێین بێژین،نەورۆزا ئەڤ ساڵە دێ ب پێنج نەورۆزان بیت و ئێدی رۆژێن رەش بورین و رۆژێن سپی و خۆش ل بەندا گەلێ مە نە.
لێ دڤێت ئەو ئێک ژی نەهێتە ژبیرکرن، کو پلان و پیلانێن نەحەزان ب ساناهی نەهاتینە ژ ناڤبرن، ئەڤ رەوش ب ساناهی نەهاتییە گوهاڕتن و بێی بزاڤ و قوربانیدان و خەباتەکا دروست، ئەڤ قوناغە نەهاتییە دەربازکرن. هێز و سەرکردەیێن ئەڤ رەوش گوهاڕتی و خوە ل بەر (هێرشێن دوژمنی،گازندەیێن هەڤوەڵاتییان،تێکدانێن لایەنێن بێ ئیرادە و هەموو رەنگێن قەیرانێ)گرتی، ئەو لایەن بووینە یێن ژ بەرپرسایەتیێ نەرەڤین، ب تایبەتی ژی پارتی بوویە.
ژبەرکو، دەما کوردستان د گەرماتییا شەڕێ بەرەڤانیکرنێدا و قەیران ب سەر کوردستانێ دا هاتی،و ل دەمێ جەنابێ رێبەرێ کوردان "مەسعود بارزانی"مل ب ملێ پێشمەرگەی د سەنگەرێن بەرەڤانیکرنێدا، و جەنابێ سەرۆکێ حکوومەتێ ژی وەڵات بۆ وەڵاتی دچوو ژ بۆ ب دەستڤەئینانا پشتەڤانیێ بۆ کوردان،دروستکرنا گڤاشتنێ ل سەر حکوومەتا عیراقێ و دەربازکرنا قوناغا دژوارا ب سە ر گەلێ مەدا هاتییە سەپاندن. هندەک لایەنان دەستێ خوە کر بوو د دەستێن دوژمنان دا، هندەک لایەنان د وان کاودانێن سەخت دا بزاڤا هەڵوەشاندنا حکوومەتێ دکر،هەبوون ژی بتنێ هات و هاوار دکرن و دگۆتن،حکوومەتێ دڤێت هەڤوەڵاتیان سزابدەت،ئەگەر دشێت ژیارا خەلکی خۆش بکەت و ژ خوە خۆش ناکەت!. ئێکەتی ژ ئێکەتیێ ژی "قوباد تالەبانی"مل ب ملێ سەرۆکێ حکوومەتێ مابوون. لێ هندەک سەرکردەیێن وێ پاڕتێ ژی، جار مینا بەرهەڵستکاران سەرەدەری دکر و دگۆت: مە ئاگەهی ژ داهاتێ کوردستانێ نییە، جار ژی نوونەرێ خوە کو "قوباد تاڵەبانی"بوو ب کەم تەرخەم و "چانتا هەلگرێ نێچیرڤان بارزانی!"سوجبار دکر.
"یا جهێ سەرسۆرمانێ ئەوە، هندەک ژ وان لایەنان ژی یێن ل سپێدێ تا نیڤرۆ د حکوومەتێدا و ل پشتی نیڤرۆ بەرهەڵستکار بوون و جڤین و بەر د حکوومەتێ وەردکرن، یان ل وێ قوناغا سەخت دا خوە ژ بەرپرساتیێ ڤەکێشای...،نها بۆ بەشداریکرن د کابینەیا نەهێ یا حکوومەتا هەرێمێ و بۆ پۆستان، ب دەڤ گازندەنە و دڤێت ب وەرگرتا رێژەیەکا پۆستان یا پتر ژ سەنگێ خوە، دووبارە بەشداری کابینەیا نەهێ ببن!". ئانکو دەما سەرکەفتنان خوە ب هەڤپشک دادنن و سەرکەفتنان بۆ خوە د هەژمێرن،ل بەرتەنگی و دەمێ ئاستەنگان ژی خوە ڤەدشێرن و ژ بەرپرساریەتیێ د رەڤن.
دیسان دڤێت خوها شەهمزاریێ وان کەس و لایەنان بگریت یێن نها دبێژن، حکوومەتا عیراقێ بۆ ئەگەرێ هەڵوەشاندنا پاشەکەفتێ فەرمانبەرێن هەرێمێ!!.گرنگە ئەو لایەن بەرسڤا ڤان پرسان بدەن،
ما نە هەر حکوومەتا عیراقێ بوو بودجەیێ کوردستانێ بڕی؟!، ما نە هەر حکوومەتا عیراقێ بوو دەما ب هزاران هەڤوەڵاتیێن وان ئاوەرەی کوردستانێ بووین و وان پشتاخوە دایێ و هەموو هێلانە ل سەر ملێن خەلک و حکوومەتا هەرێمێ، و ب هیچ رەنگەکی د هەڤکار نەبوون دگەل حکوومەتا هەرێمێ، دیسان ما نە هەر حکوومەتێن ئێک ل دووڤ ئێک یێن عیراقێ بوون دەستوور بن پێ کری و ل دژی مافێن خەلکێ کوردستانێ کار کری، ل دووماهیێ ژی ب تانک و تۆپان هێرشی کەرکووکێ کری و کەرکووک داگیرکری؟!. ئەڤا نها ژی عیراق دکەت نە خێرە و نەژی منەت،بەلکو بەرهەمێ سەرەدان و پەیوەندیێن ئێک ل دووڤ ئێک یێن رێبەرێ کوردان"مەسعود بارزانی" و جەنابێ سەرۆکێ حکوومەتێ "نێچیرڤان بارزانی" نە. دیسان بەرهەمێ کارکرنا وەزیرێن کورد و ئەندامێن کورد یێن پەرلەمانێ عیراقێ یە. تا گڤاشتن ل سەر سەردەستێن بەغدایێ دروستکری کو تا رادەیەکی ل بن وی دەستووری کار بکەن یێ وان ب خوە بانگەوازە بۆ دکر و کار پێ نەدکر. بێگۆمان بۆ ڤێ ئێکێ ژی هەردەم مفا ژ نە ئێکڕێزی و خۆ خۆرییا لایەنێن کوردی ب خوە ژی دیتییە. لەوما پێدڤییە هەم بەشدارێن حکوومەتاکوردستانێ یا داهاتی ب دروستی بەشدار بن، نە بتنێ هەڤپشکێن سەرکەفتنان بن و ل بەرتەنگییان خوە

ڤەدزن،.هەم ژی فراکسیۆنێن کوردی یێن پەرلەمانێ عیراقێ و وەزیر و کاربدەستێن کورد یێن د حکوومەتا عیراقێ دا د ئێکگرتی و ئێک هەلویست بن. چونکی هەڤوەڵاتیێن ڤێ هەرێمێ باجەکا گران یا نە ئێکڕێزی و نە ئێک هەلویستییا لایەنێن کوردی دایە ، ئێدی ئێکڕێزیا هەموو لایەنان ل کوردستانێ و بەغدایێ دێ کلیللا چارەسەریا هەموو پرسێن هەلاویستی بیت، دەم هاتییە ئەڤ گەلە ب ژیانەکا خۆشتر و بەختەوەرتر شاد ببیت، رۆژێن سپی و گەش ل بەندا مەنە.