پشتی وان دەمێن سەخت و دژوارێن ب سەر کوردستانێدا هاتین وب تایبەتی ئەڤە ژ دەمێ کوردستان تۆشی هێرشێن توند یێن رێکخراوا تیرورستییاداعش و ل دویڤدا ژی حەشدێ و سوپایێ عیراقی بووی و ئابلۆقەیێن دژوار ل سەر هەرێمێ هاتینە سەپاندن.رەوشا ئابووری و سیاسی ل هەرێمێ بەرەف ئاراستەیەکێ ئالۆز و مژاوی چوو، کوردستانی تۆشی نەهامەتیێن مەزن بوون. لەوما پێدڤییە نها بەرهەمێ بهێنفرەهی و خۆڕاگریا خوە وەربگرن. هەلبەت ئەڤە ژی بتنێ ب پێکئینانا حکوومەتەکا ب هێز،سەرۆکایەتییەکا ب هێز و ئێککرێزیا ناڤ مالا کوردی دێ هێتە هەبوونێ. بێگۆمان ئەڤ ئێکرێزیە ژی پێدڤی سەرکردەو ساسیێن لێبووردە،کاڕێزما و لێزانە.
دەمەکە خەلکێ کوردستانێ چاڤەڕێی ل هەڤکرنا لایەنێن کوردینە و ل بەندا پێکئینانا حکوومەتا نوو نە. ژ بەرکو پێکئینانا کابینەیا نەهێ یا حکوومەتا هەرێمێ بوویە تەڤنەکێ ئالۆز.لێ وەکی هەر جار پارتی مینا برایێ مەزن سەرەدەریێ دگەل لایەنێن دی دکەت و ئەگەر چ بەربەست نەهێنە دروستکرن دبیت د دەمەکێ نێزیکدا حکوومەتەکا ب دلێ هەڤوەڵاتیان و هەرسێ لایەنێن سەرکەفتی بهێتە پێکئینان. هەرچەندە پارتی وەکی سەرکەفتییا ئێکێ د هەلبژاردناندا دشیا دگەل لایەنەکی یان چەند لایەنەکان بتنێ ژی رێکبکەڤیت و حکوومەتێ پێک بینیت. لێ وەکی هەر جار پارتی کوردپەروەریا خوە دووپاتکر، کو هندەک ژ ماف و سەرکەفتنێن خوە ب سەر لایەنێن دیدا دابەشبکەت. هەلبەت ئەڤە ژی بتنێ ژ بۆ پاراستنا دەستکەفتێن کوردستانێ، چوون بەرەف کوردستانەکابهێزتر، رێگریکرن ل دووئیدارەی،دەستێن دەرەکی و ئالۆزیێن مەزنتر بوویە.
سەرباری ڤێ مەردینیا پارتی دگەل لایەنێن دی، خواستێن زێدە یێن ئێکەتیێ و ناکۆکیێن د ناڤا وێ پارتێ ب خوە ژی بەردەوامی کێشا، و پێکئینانا حکوومەتێ ب زەحمەت کەفت و دوودلی و بێ باوەریەک مەزن ل دەف خەلکێ هەرێما کوردستانێ دروست ببوو. لێ رێککەفتنا ڤێ داویێ یا د ناڤبەرا پارتی ،کو ب سەرپەرشتییا "نێچیرڤان بارزانی" جێگرێ سەرۆکێ پارتی دگەل "کوسرەت رەسۆڵ" جێگرێ ئێکێ یێ سکرتێرێ گشتی یێ ئێکەتیێ، رووگەشی و دلشادییەک مەزن ل دەف خەلکێ هەرێما کوردستانێ دروست کریە و باوەری بۆ خەلکێ هەرێمی زڤڕاندییە. ژ بەرکو یا خویایە هەر دەمێ پارتی و ئێکەتی و تەڤا یا لایەنێن دی یێن کوردی نێزیکی ئێک بوو بن، کوردستان یا ئارام بوویە و رۆژ ب رۆژ دەستکەفت و سەرکەفتنێن مەزن ب دەستڤەهاتینە. بەرەڤاژی ڤێ ئێکێ ژی ،هەردەمێ د نافبەرا لایەنێن کوردستانێ ژ وان ژی ب تایبەتی پارتی و ئێکەتیێ ململانێ و ناکۆکی هەبوو بن، دوژمنان ب ساناهی مفا ژ وان ناکۆکییان وەرگرتییە و شیاینە گۆرزێن مەزن ل دۆزا رەوایا کوردی بدەن.
یا جهێ خۆشحالیێ ئەوە هەموو پێشبینی بەرەف وی ئاراستەی دچن، حکوومەتەکا ب هێز بهێتە پێکئینان، و ئەڤ قوناغە بهێتە دەربازکرن.هەلبەت بۆ ڤەکرنا گرێیان و نەهێلانا ناکۆکیێن د ناڤبەرا پارتی و لایەنێن دی ب تایبەتی ژی د ناڤبەرا پارتی و ئێکەتیێدا، دڤێت رۆلێ جەنابێ سەرۆکێ حکوومەتێ کو د هەمان دەمدا جێگرێ سەرۆکێ پارتییە ژی نەهێتە ژبیرکرن. چونکی ژبلی وێ ئێکێ کو رێبەرێ کوردان "بارزانی"رولەکێ مەزن هەبوویە و هەیە د هەموو پێشهات و پێشڤەچوونێن هەرێمێدا. "نێچیرڤان بارزانی" ژی خوەدانێ کلیلا ڤەکرنا پڕانییا دەرگەهێن گرتی و ئاسێ بوویە، و ئەڤ نێزیکبوون و ل هەڤکرنێن ڤێ دووماهیێ بەرهەمێ سەرەدانێن ئێک ل دویڤ ئێک یێن جەنابێ وی بووینە بۆ لایێ لایەنێن دی ب تایبەتی ژی ئێکەتی.
وەک مە ئاماژەپێکری ئەگەر چ لایەن بەرپێکان نەدەنە پێکئینانا حکوومەتێ، رەنگە د ماوەیەکێ کورتدا حکوومەتا نوو بهێتە پێکئینان و یاسایا سەرۆکاتییا هەرێمێ بهێتە هەموارکرن و پۆستێ سەرۆکێ هەرێمێ بهێتە ئەکتیفکرن. ژ بەرکو بێی هەبوونا سەرۆکێ هەرێمێ ژی و بێی هەبوونا دەستوورەکێ تایبەت ب کوردستانێێڤە، رەوشا کوردستانێ دێ رەوشەکا مژاوی و ئالۆز بیت. لێ ب هەبوونا سەرۆکەکێ مینا "نێچیرڤان بارزانی" ژبلی وێ ئێکێ کو دێ سەرۆکینیا تەڤایا هەرێمێ کەت، و سەنگا هەرێما کوردستانێ پارێزیت، یاسایا سەرۆکاتییا هەرێمێ دێ مینا دەستوورەکی ژی بیت بۆ پاراستنا ماف و خواستەکێن تاکێ کورد، و پڕانییا بابەتێن گرێدای هەرێمێ ڤە.