"١٨ێ شوباتێ یادەکا دیرۆکی یە د ھزرا نەتەوەیی و قوتابیان و لاوێن کوردستانێ دا "
February 18, 2019
وتار و بیروڕا
![](https://gulanmedia.com/public/old_images/nusaran/DLOOOBAVAAN.jpg )
(٦٦) سال بەری نھا و د رەوشەکا دژوارا سیاسی و نەتەوەیی یا گەلێ مەدا ل ١٨ێ شوباتا سالا ١٩٥٣ ، ب پێشنیار و دەست پێش خەریا سەرکردە و رابەرێ کارێزمایێ نەتەوەییا گەلێ مە (مەلا مستەفا بارزانی ) ، رێکخراوێن ئێکەتیا قوتابیێن کوردستانێ و ئێکەتیا لاوێن دیموکراتا کوردستانێ ھاتنە دامەزراندن و بوونە ئامرازەك بۆ جوشدانا لاوان و قوتابیێن کوردستانێ ب ھەستا نیشتمانی و نەتەوەیی .
رێکخراوێن ( ئێکەتیا قوتابیێن کوردستانێ و ئێکەتیا لاوێن دیموکراتا کوردستانێ ) کو ل سەر دەستێ بارزانیێ نەمر ل ١٨ێ شوباتا سالا ١٩٥٣ێ ھاتنە دامەزراندن ، ژبەر ڤێ یادێ پارسال سەرۆکێ ھەڕێما کوردستانێ (مسعوود بارزانی) د پەیامەکێ دا کو پیرۆزباھیا قوتابیان و لاواێن دیموکراتا کوردستانێ کر و گوت :" قوتابی و لاوێن دیموکراتا کوردستانێ ل ھەمی قوناغێن خەباتا گەلێ مەدا ئەرك و شین تلێن وان دیار بینە و جھێ پێگەھاندن و پەروەردا کوردایەتیێ و نیشتیمانپەروەر و چاڤ نەترس بوون و دڤێ رێکێ دا قوربانیێن داین ، نھا ژی کو گەلێ مە ل قوناغا بەرخوەدان و چەسپاندنا مافان و دەربازکرنا کۆسپ و تەحەددییان دایە ، ئەرکێ قوتابی و لاوان ل ھەمی دەمەکێ دا ھەستیار تر و گرانترە ".
ھەروەسا سەرۆکێ ھەڕێما کوردستانێ د پەیاما خوەدا گوت ب پێدڤی دزانم " قوتابیان و لاوان ل جاران زێدەتر شوینکەفتیێن بھایێ بلندێ خەبات و کوردایەتیێ بن و ل ھەرەشا و تەحەددییان بێ ھێڤی نەبن ".ـ
ھەروەسا گوت ژی " گەلێ مە و ھێزا پێشمەرگەھێن کوردستانێ خوە راگرانە قوربانیێن دای ، ل ھەمبەری دکتاتوران دا راوەستان و تیرور و ھزرێن توندرەوێن وان ژی تێکشکاندن . ھەروەسا ب رەنگەکێ ئازادی خازانە داوایا مافێ رەوایێ خوە یا کری ل ھەمی قوناغان دا ب ئیرادەییەکا بھێز و پۆلایین بەردەوام بوون .
ــ پارتی دیموکراتێ کوردستان ل سالا ١٩٥٣ ، سێیەمین گونگرە ل باژێرێ کەرکوکێ گرێدا دوی گونگرەی دا چەندەھا بریار و راسپاردەیێن گرنگ تێدا ھاتنەدان ، لەوما دامەزراندنا رێکخراوێن جەماوەری وەك "لاوان و قوتابیان و ئافرەتان" ھەرچەندە باسێ ھندێ دھێتەکرن کو ئێکەتیا ئافرەتێن کوردستانێ ل سالا ١٩٥٢ ڤە یا دامەزراندی ، لێ بەلێ ل کونگرەیا سێیێ یا پارتا دیموکراتا کوردستانێ ل سالا ١٩٥٣ ێ بریارا دامەزراندنا ئەڤان سێ رێکخراوا ب فەرمی یا دەرچووی ، ئێك ژ وان رێکخراوا دامەزراندنا " ئێکەتیا لاوێن دیموکراتا کوردستانێ " بوو .
ــ (بارزانی نەمر) نێزیکێ نیڤ سەدە بەری نھا دبێژیت :" لاوێن کورد شورێ پۆلاینن بۆ پاراستنا کوردستانێ ".
کور و کچێن ناڤ ئەڤێ رێکخراوا تێکۆشەر ھەردەم دەستەکێ وان خزمەت و دەستەکێ وان پاراستنا وەلاتی بووە ، ل رەوشا دیموکراتی و دەلیڤا کارێ رێکخراوی دا ل پێشیا ھەمی رێکخراوێن دیکە دا بوویە ، دەلیڤا خزمەتکرن ب کچ و کورێن کوردستانێ بتنێ دڤێ رێکخراوێ دا ب جدی و بێ چ بەرامبەرەکێ و بێ مەبەستەکا حزبی بی یە ، لەوما ھندی ب کیری و وردی بچینە ناڤا خەبات و کارێن ئەڤێ رێکخراوێ و ھەریا کێمە ئەم نەشێین بەرخوەدان و خزمەتکرنا ئێکەتیا لاواێن کوردستانێ ب نڤسین وەسفا وان بکەین و ھەمیێ بێخینە سەر کاغەزێ .
ــ لەوما ئەڤرۆ ب ھەلکەفتا ١٨ ێ شوباتێ یادا (٦٦)مین سالیادا دامەزراندنا ئێکەتیا لاوێن دیموکراتا کوردستانێ و ئێکەتیا قوتابیان گەرمترین پیرۆزباھی ل ھەمی لاوان و قوتابیێن کوردستانێ ل ھەر جھەکێ لێ بن ب گشتی و ھەڕێما کوردستانێ ب تایبەتی دکەم .
ئەڤرۆ رۆژ رۆژا لاوانە ب راستی ژی بوومە لاوان جەژنەکا پیرۆز و دێرینە رۆژا دامەزراندا ئێکەتیا لاوێن دیموکراتا کوردستانێ و ئێکەتیا قوتابیێن کوردستانێ یە کو ئەڤرۆ (٦٦) سال دەربازبوون لسەر دامەزراندنا ئەڤێ رێکخراوا پیرۆز و تێکوشەر ھەروەسا یا ژ ھەمیێ گرنگتر ئەوە ئەڤ رێکخراوە ھەمی ل سەر دەستێ سەرکردە و بابێ روحیێ نەتەوا کورد "بارزانی نەمر" یا ھاتیە دامەزراندن .
راستە ئەڤە چەند سالەکە ئەم د قەیرانەکا ئابوری دا دەربازدبین لێ بەلێ ئەڤێ قەیرانێ و شەری نەشیانە ببنە رێگر د ھەمبەر لاوان دا و کارتێکرنێ ل ھزر و بیر و بوچوونێن لاوێن ھەرێما کوردستانێ ب گشتی بکەن و روژ بو روژێ لاوێن مە زێدەتر یێ پێش دکەڤن و ھەولێن پێشڤەبرنا وەلاتی ددەن چونکێ یێ ل قوتابخانەیا بارزانی نەمر خاندی و فێری کوردایەتیێ بووی .
لاو بربرەیا پشتا وەلاتی نە و ھیڤیا گەشا پاشەروژا مللەتی نە ..
=