كوردان د كه‌ڤن دا گه‌له‌ك گۆتن و مه‌ته‌ل هه‌نه‌ و بۆ هه‌تا هه‌تا زندى دمینن و مرۆڤ دگه‌له‌ك ره‌وش و كاودانان بكاردئینیت، بۆ ره‌وشا ئالۆزا هه‌رێما كوردستانێ ژى ئه‌م دشێن مفاى ژ وان گۆتنا وه‌ربگرین، چنكى وه‌سا هاتیه‌ گۆتن كو گۆتنێن مه‌زنان ئانكو په‌ندێن پێشینان نه‌خشێن سه‌ر به‌رانن، كه‌واته‌ هاتنا پێله‌كا زۆر یا ئاواره‌ په‌نابه‌ران بۆ هه‌رێما كوردستانێ د دده‌مه‌كى دا كو هه‌رێم د قه‌یرانێن دژوار یێن ئابورى و سیاسى و ئێمناهى دا ده‌رباز دبیت؟ ئێكسه‌ر مه‌ به‌ره‌ف وێ گۆتنێ دبه‌ت كو دبێژیت : مال بخوه‌ مال نه‌بوو، مێهڤان ژى هاته‌ سه‌ر، واته‌ هه‌رێما كوردستانێ و خه‌لكێ وێ بخوه‌ دناڤ گه‌له‌ك كرێزان دا ده‌رباز دبوون، رێژه‌یه‌كا زۆر یا ئاواره‌ و په‌نابه‌ران ژى هاته‌ سه‌ر، لێ حكومه‌تا هه‌رێما كوردستانێ چه‌وا شیا خوه‌ ل گه‌ل وێ دیفاكتۆیێ بگونجینیت و دوو چیچكان ب به‌ره‌كێ بكوژیت، ئانكو هه‌م خه‌لكێ خوه‌ ب رێڤه‌به‌ت و هه‌م ژى كه‌مپێن ئاواره‌ و په‌نابه‌ران بێ خزمه‌تگۆزارى نه‌بن، بێگومان ل ڤێرێ كارتێكرنا هاتنا ئاواره‌یان ل سه‌ر ژیانێ خه‌لكێ خوه‌ جهـ ژى گه‌له‌ك روهن و دیار دبیتن، له‌ورا ئه‌م دشێن بێژین ب وێ په‌یوه‌ندیا حكومه‌تا هه‌رێما كوردستانێ ل گه‌ل وه‌لاتێن بیانى هه‌ى، شیاى ئه‌ركه‌كێ زۆر یێ سه‌ر ملێ خوه‌ ب نوونه‌راتیێن وه‌لاتان بده‌ته‌ كرن، كه‌واته‌ ده‌ما ئه‌م وجوودا ڤان رێكخراوێن بیانى دناڤا كه‌مپێن ئاواره‌ و په‌نابه‌ران دبینین، ئه‌ڤه‌ بخوه‌ به‌لگه‌یه‌كه‌ ل سه‌ر سیاسه‌تا ده‌رڤه‌یا حكومه‌تا هه‌رێما كوردستانێ كو شیایه‌ وێ باوه‌ریێ بۆ ڤان وه‌لاتان دروست بكه‌ت كو كوردستان نه‌ ئه‌و ئیراقه‌ یا د هه‌موو راپرسیان دا بۆ باشیێ ل پاشیا هه‌موویانه‌ و بۆ خرابیێ ژى هیچ وه‌لاته‌ك نكاریت خوه‌ لپێشیا وێ بده‌ت، ژ به‌ر هندێ دكارین بێژین حكومه‌تا هه‌رێمێ شیا وان مێهڤانان (مه‌ره‌م پێ ئاواره‌ و په‌نابه‌رن) ب ره‌نگه‌كێ وه‌سا ب رێڤه‌به‌ت كو ئه‌و هه‌ست پێ نه‌كه‌ن‌ هاتینه‌ ماله‌كا پر ژ ئالۆزى و قه‌یران و ئاریشه‌، چونكى هه‌م حكومه‌ت ب كار و پرۆژه‌یێن خوه‌ هه‌بوونا خوه‌ دناڤا وان كه‌مپان دا نیشا هه‌موو جیهانێ دا و ل سه‌ر ئاسـتێ ناڤده‌وله‌تى وه‌ها هاته‌ت ناسكرن كو هه‌رێم وه‌لاته‌كێ مێهڤان دۆست و ئاواره‌ و په‌نابه‌ر حه‌وینه‌، هه‌روه‌سا ب پرۆژه‌یێن خزمه‌تگۆزاریێن كونسولخانه‌ و نوونه‌راتیێن وه‌لاتێن بیانى ژى وه‌كر گه‌له‌ك پرۆژه‌یێن مه‌زن و باش بۆ ئاواره‌ و په‌نابه‌ران د ناڤا كه‌مپاندا بهێنه‌ چێكرن، له‌ورا ئه‌ڤ یه‌كه‌ هێڤیه‌ك ل ده‌ڤ ئاواره‌ و په‌نابه‌ران دروست كر كو سه‌ره‌راى ژ ده‌ستدانا گه‌له‌ك ژ كه‌س و كارێن خوه‌ و ب جهـ هێلانا ده‌ڤه‌رێن خوه‌، جاردن و سه‌ر ژ نوو ئه‌و ده‌ست ب ژیانێ بكه‌نه‌ڤه‌