دیرۆک دیدەڤانە خەلکێ هەرێما کوردستانێ ئەڤرازی و نشیڤیێن زۆر دیتینە،شەڤ و رۆژ و ساڵێن تاڕی و ژیانەکا دژاروار و ب زەحمەت بوراندییە هەتا رۆژگارا ئەڤرۆ.
پشتی سەرهلدانا گەلێ مە،مینا زارۆیەکێ ساڤا کو ب دیوارو کورسییانڤە رادبیتە پێیان و پێنگاڤێن کورت بەرەف ژیانەکا درێژ د هاڤێتن،کوردستانا باشوور بەرەف دیمۆکراسی بوون و وەڵاتەکێ دامەزراوەی پێنگاڤ هاڤێتن، تا ژ ناڤچوونا سەددامێ دکتاتۆر و رژێما وی، ئێدی ب دروستی کوردستان بۆ گەنجەکێ پێگەهشتی و بەرەف ئاڤاکرنا مالەک جوان و رێک و پێک دەست هەلاندن، پشتی خۆ ڤەدزینا بەردەوام یا حکوومەتێن ئێک ل دویڤ ئێک یێن عیراقێ ژ دەستووری و بن پێکرنا مافێن رەوا یێن کوردان ،ژ نەچاری رێبەرێن کوردان بڕیارا ریفڕاندوومێ دا ، دا کو ب شێوەیەکێ دیمۆکراسییانە خەلک بڕیارێ ل سەر چارەنڤیسێ خۆ بدەت،هەلبەت ئەڤ پرۆسێسە ژی ب سەرکەفتییانە هاتە ئەنجامدان. لێ وەکی مە گەلەک جاران گۆتی خیانەتا شازدەی ئوکتۆبەرێ هەمی هیڤیێن دەیکێن شەهیدان، رەنجکێش،خزمەتکەر و کوردێن راستەقینە مراندن. ئابلۆقەیێن وەڵاتێن هەڤسوی و هەرێمی کوردستان مینا بریندارەکێ د سەکەراتێدا لێکر و گوڕێ وێ ژی کۆلا.
پشتی ریفڕاندومێ و داگیرکرنا ب خیانەت یا کەرکووکێ، گەلەک ژ وەڵاتێن دوژمن دلشاد ببوون و خەون ب وێ ئێکێڤە د دیتن کو کوردستان دناڤبەرا تورکیا،ئیران،عیراقێ دا دێ بهۆژیت و ژ ناڤ چیت. هەتا گەهشتییە وی ئاستی کو بۆ ماوێ چەند رۆژەکان خۆ سەپێنێن عیراقێ غرور بگریت و دەستەواژەیێ پارێزگەهان،یان یێ باکۆرێ عیراقێ ل شوونا ناڤێ هەرێما کوردستانێ بکار بینن. یا سەیرتر ئەوبوو ! هندەک کەس و لایەنێن کوردی ژی هەر وەک جەژنەکێ ل بەندا کەفتنا کوردستانێ و دۆزا رەوایا کوردان بوون، و بزاڤێن دوو ئیدارەی،سەرەدەریکرنا پارێزگەهان دگەل بەغدا، حکوومەتا رزگارکەرا نیشتیمانی حکوومەتا "ئینقازی نیشتیمانی" ...هتد،دکرن!!
لێ هەر زوی رابەرێن دۆزا رەوایا کوردینیێ ژ خەوا غەفلەتێ هشیار کرن و خەونێن وان هەر مان خەون، و نە کوردستان ژ ناڤچوو، نە حکوومەتا وان دڤیا پێکهات و نە ژی قەوارەیێ هەرێما کوردستانێ بۆ باکورێ عیراقێ هاتە گوهۆڕین، بەرەڤاژی بەلکو پێگەهێ کوردستانێ پشتی ریفڕاندۆمێ دووجارکی بهێزتر لێهات و رۆژ بۆ رۆژێ ژی بهێزترە.
وەکی یا دیار ئێک ژ وان وەڵاتێن خوێ دخوار و ئاڤ ب سەردا نەدکر ئیران بوو. لێ نها یا دەستا بلند دکەت ولاڤا ژ خۆدێ و داخوازیان ژ سەرکردایەتییا کوردی دکەت هەڤکار و پشتەڤان بیت ژبەرکو ژ ئەگەرێن سزایێن ئەمریکا ل سەر ئیرانێ رۆژ ب رۆژ بوهایێ تمەنێ ئیرانی ل هەمبەر دۆلارێ ئەمریکی دادکەڤیت، و بۆ ساخکرن و ڤەژاندانا ئابوورێ خۆ د ڤێ گلێەشۆکا ل دەردۆرا وێ هیچ جهەکی باشتر ژ هەرێما کوردستانێ نابینیت، واتە چەند کوردستانێ پێدڤی ب ئیرانێ یە دووجارکی وێ ئیرانێ پێدڤییا ب هەرێما کوردستانێ هەی.

ژ لایەکێ دیڤە سەرۆک وەزیرێ نوی یێ عیراقێ و هەتا سەرۆک هەڤپەیمان و پاڕت و قەوارە یێن عیراقێ ژی د وێ ئێکێ گەهشتینە بێی رازیکرن و پشتەڤانییا کوردان نەحکوومەت دروست دبیت و سەردکەڤیت، و نە وەڵاتێن رۆژئاڤا پشتەڤانیێ ل حکوومەتا عیراقێ یا بێی رازیبوون و بەشداریا راستەقینەیا کوردان دکەن.
لەوما دووماهیک جار کورد شیان لایەنێن عیراقی نەچار بکەن تا رادەیەکێ زۆر ل دویڤ خاستێن کوردان بودجەی پەسەند بکەن.
لێ دڤێت ژ بیر نەکەین کێ ژیان بۆ کوردستانێ ڤەگەڕاند و هیڤیێن دوژمنان ژ ناڤبرن؟!
دڤێت هەر ئێک ژ مە ل شوونا رەخنەگرتنا بەردەوام و بەس دیتنا رەنگێ رەش، جارنا ڤێ پرسیارا ل سەری ژی ژ خۆ بکەین، کێ ژیان بۆ کوردستانێ ڤەگەڕاند و جارەکا دی وەڵاتێن هەرێمی نەچار کرن بهێنە باوەشا کوردستانێ، هەلبەت ئەگەر ب ویژدان بەرسڤا ڤێ پرسێ بدەین، جەنابێ رێبەرێ کوردان "مەسعود بارزانی" دیسان جەنابێ سەرۆکێ حکوومەتا هەرێمێ بووینە کوردستان راکریە ژ پیانڤە و ئەو ئابلۆقە و بزاڤێن ژناڤبرنا پێگەهێ هەرێمێ هەمی ژناڤبرین. کو ب سەنگێ سەرۆک بارزانی و کاڕێزمایی و لێزانینا جەنابێ سەرۆکێ حکوومەتێ و پەیوەندیێن وی یێن ب هێز دگەل وەڵاتێن زلهێز، هەمی ئەو وەڵاتێن چاڤێن وان ل کەفتنا کوردستانەکا بریندار نەچار کرن بهێن دەستێ خۆ بدەنە سینگی خۆ و ب پێنگاڤێن بلەز بەرەف باوەشا لیڤەگەڕێ کوردان مەسعود بارزانی و سەرۆکێ حکوومەتێ نێچیرڤان بارزانی بهێن.
دیسان سەرەدانێن ڤان هەردوو بەرێزان بۆ بەغدا، ئەو باوەری بۆ سەرۆک وەزیرێ نوی یێ عیراقێ چێکر کو شاشی هەر ب لایێ وەڤەیە و ئەم بتنێ خۆپارێزو ماف وەرگرین، و هوون بێی مە دێ د گەمییەکا بێی گەمیڤان دا بن.
هەر ژ ئەگەرێ پەیوەندیا بهێز یا جەنابێ سەرۆک وەزیرێن هەرێمێ دگەل کار بدەست و لایەنێن عیراقی رەوش و پەیوەندیێن هەڤلێرو بەغدایێ بەرەف باشتر دچن، لێ خالا هەرە گرنگ بۆ بهێزیا کوردان ل بەغدا، ئێکرێزی و ئێک هەلویستییا کوردانە هەم ل کوردستانێ و هەم ل عیراقێ،دا بەرهەمێ ڤێ ماندووبوون و رەنجا کوردی بهێت چنین نەک د بەر ئاڤێدا بچیت.ژبەرکو ئەگەر کورد ل بەغدا و کوردستانێ د ئێک هەلویست و ئێک بڕیار نەبن، ئەڤا نها د بودجەیدا هاتییە پەسەندکرن، بتایبەتی برگا جیم ژ مادێ دەهـ ژ دەستووری کو باس ل هنارتنا مووچەیێن پێشمەرگەی و فەرمانبەران دکەت، مینا گەلەک برگەو بڕیار و یاسایێن دی بتنێ دێ مینیت مڕەکەبێ ل سەر کاغەزێ و نەزێدەتر.