پشتی روودانێن خیانەتا شازدێ ئکتۆبەرا سالا ٢٠١٧ ل کەرکووکێ و داگیرکرنا پرانیا دەڤەرێن کوردستانی یێن دەرڤەی ئیدارا ھەرێما کوردستانێ ژلایێ میلیشیایێن شیعەگەری و پاسدارێن ئیرانی ، پلانا داگیرکارا و خیانەتکارێن بناڤ کوردستانی ئەوبوو پرانیا ھەرێما کوردستانێ داگیر بکەن و قەوارێ ھەرێما کوردستانێ کۆ مەزنترین دەسکەفتێ نەتەوی و نشتیمانی یێن خەلکێ کوردستانێ یە د دیروکێ دا ژناڤ ببەن .
ھەرچەندە پێشمەرگەھێن پارتی دیموکراتی کوردستانی ، ھەر ل رۆژێن دەسپێکی رێگری ل وێ پیلانێ گۆت و ب مەردانە بەرسینگێ ھێزێن زەبەلاحێن داگیرکارا گرت و تووشی مەزنترین شکەسن کر و سنوورەک بۆ دانا .
ڕەنگە بۆ خەلکەکی جھێ حیبەتیێ بیت دەمێ دبێژین پێشمەرگەھێن پارتی . لێ ب شانازی ڤە ڤێ رستێ بکار دئینم ، نە رامان ئەوە رۆلێ پێشمەرگەھی کێم بکەم ، لێ ئەڤە راستیەکە و چوویە دناڤ دیرۆکێ دا کو پشکەکا پێشمەرگەھێن کوردستانێ ئەوێن سەر ب ئێکەتیا نشتیمانی کوردستان دھێنە ھژمار کرن ب چاڤێن پڕ رووند و دلەکێ شکەستی فەرمانێن سەرکردێن خۆ یێن سیاسی بجە ئینان ، دەمێ کەرکووکا دلێ کوردستانێ ب رێکەفتنا بالێ خیانەتکارا رادەستی ھێزێن داگیرکار کری ..! کۆ بوویە ئەگەرێ داگیرکرنا دەڤەرێن دیتر ژی مینا شنگال و دەوروبەرێن مۆسڵ و مەخمۆر و ..ھتد . ئەڤێ روودانێ پرانیا کوردستانی دلگران کرن و گەھشتە وی رادەی ھزر ل ڤەمراندنا فەنەرێن گەشکرنا باشە رۆژا کوردستانێ بھێتەکرن ، نەخاسمە ئەو فەنەرێن بدەستێ سەرۆک بارزانی و پارتی دیموکراتی کوردستان ل راپرسیا سەرخۆبوونا کوردستانێ ل سیھێ ئیلۆنا ھەمال ساڵ بۆ خەلکێ کوردستانێ ھەلکری . چونکی دەولەتا عیراقێ و ئیرانێ ھەمی ھەول دان ژلایێ سیاسی و ئابووری کوردستانێ دوورپێچ بکەن و ئێخستنە وارێ بجە ئینانێ ژی . لێ نێچیرڤان بارزانی سەرۆکێ حکومەتا ھەرێما کوردستانێ و جێگرێ سەرۆکێ پارتی سیاسەتەکا دبلۆماسی یا سەرکەفتی بکار ئینا و د چەند رۆژەکێن کێم دا گەمارۆیێن سیاسی و ئابووری شکاندن و پشتەڤانیا نیڤ دەولەتی بۆ ھەرێما کوردستانێ دابین کر ، ڤێ دبلۆماسیەتا سەرۆکێ حکومەتا ھەرێمێ حکومەتا ناڤەندی یا عیراقێ نەچار کر دەست ب دیالۆگێ بکەت و لدووماھیێ ئیرادا خەلکێ کوردستانێ بسەرکەفت و ھەرێما کوردستانێ ل بەرتەنگترین کاودان دا دەرباز کر و خیانەتکار و پیلانگێر تۆشی مەزنترین شکەستن بوون و ھندەک ژوانا لسەنتەرێ بریاردانێ دوورکەفتینە .
تا گەھشتە وی رادەی حکومەتا عیراقێ دگەل حکومەتا ھەرێما کوردستانێ بەرەڤ رێکەفتنێ نە بۆ زڤراندنا پێشمەرگەھێن کوردستانێ بۆ دەڤەرێن کوردستانی یێن دەرڤەی ئیدارا ھەرێما کوردستانێ و چارەسەرکرنا ھەمی ئاریشە و قەیرانێن دناڤەرا ھەردوو ئالیان لدیف دەستوورێ ھەردەمی یێ عیراقێ . کۆمبوونا جڤاتا پارێزگەھا کورکووکێ لرۆژا ١٨ شۆباتێ ل ھەولێرێ بۆ دانانا پارێزگارێ کەرکووکێ و رەوشا پارێزگەھێ ، مەزنترین سەرکەفتنە بۆ حکومەتا ھەرێما کوردستانێ و پارتی ، ئەڤ نیشانێ بلندکرنەڤا ئاڵایێ پیرۆزێ کوردستانێ یە ل کەرکووکێ و شکۆدارکرنەڤا خەلکێ کوردە ل وێ پارێزگەھێ ، چونکی زێدەتر ل سالەکێ یە پرانیا پارتیێن کوردستانێ ئەوێن دناڤ کەرکووکێ مای نەشیان ئالایێ کوردستانێ بلند بکەنەڤە و کوردستانیا ب سەروەست و سامان ڤە بپارێزن .حیکمەتا نەزڤراندنا پارتی بۆ کەرکووکێ بن سیبەرا راگیرکاریێ ، قەبۆلنەکرنێ وێ داگیرکاریێ و بێ رێزیا ھێزێن داگیرکار بۆ بەرامبەر ملەتێ کورد و پیرۆزیێن وان .
ئەڤ نەرمی و گۆرینێن سیاسەتا حکومەتا عیراقێ بەرامبەر ھەرێما کوردستانێ و زڤرین بۆ دەستوورێ ھەمبشەیی ، ژ ئەنجام و ڤەرێژا وێ سیاسەتا میانڕەو و دووربین و پارێزەرا دەسکەفتێن نەتەوی و نشتیمانیێن گەلێ کوردە ئەوا نێچیرڤان بارزانی سەرۆکێ حکومەتا ھەرێما کوردستانێ پشتی شازدێ ئکتۆبەرا ٢٠١٧ پەیڕەو کری و کەفتینە د بەرژەوەندێن گشتی دا و ھەرێما کوردستانێ ژلایێ ڕامیاری و ئابووری بەرەڤ بھێزبوویە و ئەو تاریستانا ژ ئەنجامێ وێ خیانەتا نشتیمانی و نەتەوی درۆست بووی ب سیاسەت و حیکمەتا سەرۆکێ حکومەتا ھەرێما کوردستانێ گەش و فەنەردار و بریقەدار دبیت .