هەر ژکەفندا و هەتا ئەڤڕۆ ژی هەرێما کوردستانێ خوەدیا وێ ئاخا مەزنە یاکو ب هزاران شەهید داین، وهەردەمی بوویە مەیدانا شەر و ململانێ دگەل دوژمنان، هەلبەت دڤان مەیداناندا هەولاتیێن سڤێل ژی ژ هێرشان قورتال نەبووینە و گەلەک بوینە قوربانی.
پشتی روخانا رژێما بەحس و کەیفخوەشیا خەلکێ ژبۆ وێ یەکێ کو ئێدی ئازادن، ودشێن ب ئازادانە بچن سەر گوند و مالێن خوە، بەلێ تشتێ سەیر روویدای هەبوونا پەکەکێ بوو، ٢٨سال دەربازبین پەکەکێ دەست ژچەکی بەرنەدایە و خوە ل چیایێن باشوور بنەجهکرین و ناهێلن گوندێن باشوور ئاڤەدانببن، و رێکێ ب خەلکێ نادن ڤەگەڕن سەر گوندێن خوە، کو پتری ٥٠٠گوندێن کوردستانێ ژبەر هەبوونا پەکەکێ ڤالابووینە و ب سەدان کەس بووینە قوربانیێن فروکێن شەرکەرێن تورکیا، وەکو پەکەکە دبێژت (ئەم هەر چار پارچان دپارێزین، ئەم خەبات و بەرخودانێ دکین) بەلێ ئەڤە ددەمەکێ دایە باکوور یا دبن گەفێن تورکیا ڤە، روژهەلات یا دبن گەفێن ئیرانێ ڤە، و روژئاڤا یا دبن گەفێ سوریا و تورك و روسیا....، و باشوور ژی یا بوی جهێ شەر و ململانێ یا پەکەکێ و تورکیا کو بەردەوام گوند و جهێن هەرێمێ ژلایێ فروکێن شەرکەرێن تورکیاڤە دهێن بوومبەبارانکرن، دیسان هەر پەکەکەیە بوویە رێگر ل پروژێن گەشتیاری یێن هەرێمێ، کو وان دەست بسەر چەندین جهاندا گرتیە و ب ملکێ خوە دزانن، و هەر ئەڤ یەك بوویە ئەگەر فروکێن تورکیا زیانەکا مەزن بگەهینن کەرتێ گشتوکالی و چاندنێ، ئەڤە ددەمەکێ دایە کو روژانە هەولاتیێن دەڤەرێن بندەستێ پەکەکێ ڤە قەستا ئاقاران دکەن ژبۆ مەرەما ئینانا گیایێ بوهارێ کو دبیتە ژێدەرێ ژیانا وان، بەلێ ئەو دبن ئامانجێن فروکێن تورکیا. دیسان زێدەباری وێ یەکێ کو ژ زارێ خەلکێ وان دەڤەران پەکەکە بەردەوام گەفان ل وان دکەن کو نێزیکی وان جهان نەبن یێن کو بارەگایێن وان لێ، لێ هەولاتی ب نەچاری قە مستا بیستان و رەز و شانێن خوە یێن هنگڤینی دکەن و ئەو ژێدەرن ژبۆ باشترکرنا روشا وان یا ئابوری، و چەندین جاران چەك ل هەمبەر خەلکێ بلندکرینە و بگەفێن دژوار رێگری ل وان گرتینە نەچن وان دەڤەران.
لسەر ڤێ یەکێ چەندین جاران چالاکڤان و رێخراوێن مەدەنی هاتینە دەنگ، و بەیاننامە بەلاڤکرینە و تێدا ب توندی ئیدانەیا شەرمزارکرنا حکومەتا تورکیا ژبۆ هێرشکرنا فروکێن جەنگی لسەر خاکا هەرێمێ کرینە، کو ئەو ژی دگەل پەکەکێ بووینە جهێ نە ئارام بوونا خەلکێ سڤێل، هەروەسا داخواز ژهێزا پەکەکێ کرینە ل ناڤ گوندێن وان دەڤەران نەمینن، و بارەگایێن خوە دویربێخن، داکو پتر نەبن ئەگەر کو تورکیا ب بەهانەیا هندێ بگەهنە هەمی هێڤی و ئارمانج و مەرەمێن خوەیێن تایبەت، بەلێ پەکەکە بەردەوامە لسەر مانا خوە و هەتا نها چ مفایەک ژبو هەرێمێ نەبوویە ژبلی زیانان، وهەولاتی ژی وێ یەکێ پشتراست دکن کو هندی پەکەکە هەبت ئەم نەشین ب ئارامی بچن سەر گوندێن خوە و ب ئارامی بژین. ژبەر هەبوونا پەکەکێ هەر ژسالا ٢٠١٧ وەرە پتر ژ٢٠ کەسان بووینە قوربانیێن بوومبەبارانکرنا فروکێن تورکیا و شەهید بوینە و زێدەباری هەبوونا برینداران، بڤێ چەندێ ترس و دوودلیەک مەزنتر ل دەڤ خەلکێ پەیدابوویە.
خوە جهبوونا بەردەوام یا پەکەکێ لجهێن نە یاسای و بێ خەمبوونا وان ژقوربانی دانا خەلکێ، و هزرکرنا وان بتنێ لسەر خوە بخوە ئەڤە دێ پتر تورکیا هاندن و بەردەوام بت لسەر هێرشێن خوە، لەوما پێتڤییە پەکەکە ب سیاسەتەکا عەقلانە دانوستاندنا دگەل تورکا بکەت نەک ب چەکی، و دەست ژخاکا هەرێمێ بەردن و باشووری ئارام بهێلن، بەسە ژبو بەرژەوەندیێن خوە بکاربینن.