بە گەڕانەوەیەکی کورت بۆ ئەودەمەی بەعس حکومڕانبوو"تۆبڵێ بەعس بکوژ و ببڕبوو!" ئەودەمە نووسەران و ئەدیبان و هونەرمەندانی کوردستان لەبەر نەبوونی ئازادی، نەیان دەتوانی ڕاستەخۆ و ڕاشکاو بیرو بۆ چوونەکانیان بخەنە ڕوو، هەربۆیە لە ترسی مقەستی سانسۆر و شووتی سەرباز و دەزگا ئەمنیەکان، ناچار لە بنی دێڕ و پشتی هەناسەکاندا گوزارشتیان لە بۆ چوونەکانیان دەکرد "تۆ بڵێ سەرچڵی و بەخودانیان ئەنجام دادا" لە بندەستی بەعسدا بژیت و بوێریت ناڕاستەوخۆ پەیامی مرۆڤدۆستی بدەیت بە گوێی ئەو جەلادانەدا، ئەوە لووتکەی خۆنەویستی و گیانبەخشییە. ئەوە بیری مرۆڤدۆستی و گیانی یاخیبوون و فیکریی سەرچڵی و ڕۆحی سەربەخۆخوازییە، وای لەو نووسەر و ئەدیب و هونەرمەندانە دەکرد دژی بەعس ڕابوەستن، بە بەرهەمی بیر و خامەیان بە گژ جەلادەکانی بەعسدا بچنەوە، بۆ ڕاستی ئەم چەن ڕستەیە بگەڕێنەوە بۆ شیعریی شاعیرانی ئەوسەردەمە، بیرێک لە هۆڵی شانۆ و ناوڕۆکی شانۆنامەو شانۆگەرییەکانی ئەوسەردەمە بەیاد بهێننەوە، ئەوکات باشتر دەزانین نووسەران و ئەدیبان و هونەرمەندانی ئێمە چی رۆڵێکیان وازیکردوە، لە پەروەردەکردنی کۆمەڵگای کوردستان و هێشتنەوەی رۆحی بەرگریی لە ناخماندا، ئەو زاتەمەزنانە مامۆستای کوردایەتی و ژیلەمۆی خامۆشنەبووی شۆڕش بوون لە ناو هەڵبەست و سروود و شانۆنامەو تابلۆ و کارە هونەرییەکاندا.ئەم دۆخی خۆ بەیانکردنە" لە بنی دێڕ و پشتی هەناسەکاندا" هەنوکەش بۆ پارچەکانی بندەستی داگیرکەر ڕاستن، لە بن دەستی ڕژێمەکانی داگیرکاری خاکی کوردستان، هێشتا نووسەران و ئەدیبان و هۆنەرمەندانی ئێمە ئازادی ڕادەبڕینیان بۆ فەرهام نەبووە.
سەرەتای مانگی داهاتوو پێشوازی یادی ڕاپەڕین و ٢٨ ساڵ حکومڕانی کوردی دەکەینەوە، لە کوردستان ئازادی و ئازادی بیرۆڕا دەربڕین بوونی هەیە. فرەیی لە پێکهاتی کۆمەڵگا و لەپاڵیدا فرەیی حیزبایەتیش بوونی هەیە، لە نێو کۆمەڵگایەک دیموکراسی و ئازادی بەرکەماڵبێت، لە نێو ئەو کۆمەڵگایەدا کێشمانکێش هەیە، ململانێ و کێبڕکێی هێزەکان تا پێشبڕکێی چینە کۆمەڵایەتیەکان بوونی هەیە، دەی کوردستان ئەم کێشمان کێشە بەزیادەوە بوونی هەیە، ئەگەر ڕووناکی بخەینەسەر ئەزموونی ٢٨ ساڵ حکومڕانی کوردی و کوردستانی، بە بارێکدا خۆشحاڵدەبین ئەزموونێک لەتەمەنی ڕادیارە بوونی هەیە و کاری باشکراوە، گەشە و پێشکەوتن و ئاوەدانی و ئارامی بوونی هەیە. بە باری ڕەخنەو پەرێشانیمان بۆ پتەوکاریی لە هەرێمی کوردستان کەمووکوری و کەمئەزموونی و ناتەواوی لە ژیان و گوزەرنی خەڵکدا بوونی هەیە.
بەهەرحاڵ پاڵنەری پشتی ئەم وتارە، ئەو دیاردە نادروست و بکوژەیە، کە لە ئێستادا لەبەشێک لە بەرهەمی نووسەران و ئەدیبان و هونەرمەنداندا هەستی پێدەکرێت و هەیە، لە بنی دێڕ و پشتی هەناسەکاندا!! هەڵوێستگیریی دژی سەربەخۆیی و گیانی سەربەخۆخوازی دەخوێنرێنەوە! بەناوی پەرۆشی و لە ژێر ماسکی ئۆپۆزسیۆنبووندا تەووژمێک دژی ئیرادەی گەلی کوردستان دەوستنەوە، لەبەرهەم و بیر و خامەیاندا "لە بنی دێڕ و پشتی هەناسەکانیاندا" ئاوبە ئاشی دوژمندادەکەن.
" لە بنی دێڕ و پشتی هەناسەکاندا" ئەو هونەرەی سەردەمانێک هەڵگریی فیکریی نەتەوەی و گیانی فیداکاریی بوو، ئێستا بۆتە هونەری ژەهراویکردنی کۆمەڵگاو دەکرێتە لەمپەر و ئاستەنگ لەبەردەم سەربەخۆیی دا!.