دەسپێکا بابەتی من دڤیا ‌ئاماژە و ئاورەکێ ل مێژوویا گەلێ کورد بدەین، هەلبەت دێ بینین ‌گەلێ کورد هەمی دەما کەفتیە بەر ‌هێرش و کارەساتان، دۆژمنان ب بەردەوامی پێکول و هەولدایە کو ب کار و کریارێن خۆ یێن تیروریستی سەرکردە و رێبەرێن گەلێ مە بکەنە ئامانج، نموونە ژی بۆ وێ چەندێ ژ لایێ دۆژمنان ڤە ب رێکا زەلامێن ئاینی (مەلا مصطفى بارزانى) ل ساڵێن شێستان دا تیرور بکەن، خوشبەختانە ڕزگار بوو ژ وێ هەولا تیرور کرنێ، هەروەسا کاک ئدریسێ هەمیشە زیندوو ل بەغدا و رێزدار جەنابێ سەرۆک بارزانی ل وەلاتێ نەمسا ژ هەولێن تیرورکرنێ ڕزگار ببوون، ب‌دەهان کاروکریارێن تیرورستیانە ل هەمبەرێ گەلێ مە یێ کورد ئەنجام داینە .. جهێ داخەکا گرانە کارەساتا ئێکی شوباتێ ئێکە ژ مەزنترین و خەمناکترین کارەسات و کومەکا سەرکردە و قەهرەمان و کادر و خەباتکار کرنە ئامانج و دربەکێ بهێز و کوشندە و مەزن ل کوردستانێ دا.

جەژنا قوربانێ دناڤبەرا شادی و خۆشیێ و شین و تازیێ دا، د ڕۆژانێن جەژنێ دا و ل وەلاتێن مۆسڵمان ب دانا قوربانیا و گەردەن ئازاکرنێ و کەیف و شادیێ دهێنە پیرۆز کرن، پێشوازیەکا گەرم و بخۆشی لێ دهێنە کرن، د ڕۆژهەلاتا ناڤین دا کو پرانیا خەلکێ وان وەلاتان مۆسڵمانن وەک داب‌ و نەریتێن ئولی و کەلتووری جەژنا قوربان ب ڕۆژەکا پاک و پیرۆز پێشەوازی لێ دهێتە کرن، ب ملیۆنان خەلک قوربانیا ب سەرێ زندیا و خێرا مرییان و دبەر حەجیان دا د وارێ ئۆلی و باوەریێ دا تەرش و تەوال و حێوانا سەر دبرن و دکەنە قوربانی؛ داکو خۆ بدەن بەر سەرێ وان و گیان ب سڵامەت بن و تووشی چ ڕوویدان و نەخوشیا نەبن، داکو ڕحا مرۆڤان پاراستیبیت. بەلـێ مخـابن د وەلاتێ مە دا مڕۆڤ دبنە قوربانی دەستێ تیرۆرێ، ژ هەژییە بێژین ل رێکەفتی (۲۰۰٤/۲/۱)ێ ل هەولێرا پایتەخت و دناڤا دوو کریارێن تیرۆریستی دا ژ لایێ دوو خۆکۆژ و رەشەکێن تاریستانێ و ب ڕەگەز عەرەبێن پاشڤە مایی و جاهل و دبن کەڤلوژانکێ ئیسلامێ ‌ڤە د ئێکەم ڕۆژا جەژنا قوربانا پیرۆز ژبۆ مەرەما پیرۆزباهیێ خۆ دئێخن ناڤ رێزێن هەڤوەلاتیان دا و هەتا خۆ دگەهینن رێزا پێشیێ و رێزا بەرپرس و سەرکردێن باڵا د دەمێ پێشەوازیکرنا خەلکی دا، د وەختەکێ دەستنیشانکری دا و د ئێک دەم دا هەردوو بارەگایێن لەقێ پارتی و مەڵبەندێ ئێکەتیێ دا خۆ د پەقینن، د ئەنجام دا ب مخابنی ڤە (۱۰۱) کەس شەهید دبن و جانێ خۆ ژ دەست ددەن، ب دەهان ژی بریندار لێ دکەڤن ... جهێ داخەکا مەزن و دلگرانیێ و دل شەواتیێ یە هەولێرا پایتەخت دناڤ خۆینێ وەر دبیت.
ڤولکانەکا مەزن بوو پایتەختێ کوردستانێ هەژاندی و ب جارەکێ نە بتنێ کوردستانا باشوور، بەلکو هەر چار ئالێن کوردستانێ ڕەش پۆش دبن، ل سەرانسەری کوردستانێ دبیتە شینی و گری و زێمار و دمێژوویا گەلێ کورد دا کارەساتێن ب ڤی شێوەیی ڕوو نەدابوون، خەلکێ کوردستانێ ب زۆلم و زۆریێ شەهید دبیت و غەدرەکا مەزن و قوربانیێ دەستێ تیرورێ ‌و د ڕۆژەکا هەری دژوار و دل بریندار و پری ئێش و ئازار و داخبار، یاکو چ جار نەهێتە ژبیرکرن، تا نوکە ژی ئەو ڕۆژە وەکو فیلمەکێ د مەژیێ مرۆڤی دا نە و خەزنکریە و هەر دهێت و دچیت و ئەو کەسانێن خۆشتڤی و عەزیز مە ژ دەست دان، ب راستی زیان و خوسارەتەکا هەری مەزن بوو ژبونا کوردستانێ ب رەنگەکێ گشتی و ژبۆ کوردستانا باشوور ب تایبەتی ناهێنە ژبیر کرن و نە ژ مێشک و سەرێ مرۆڤی دەردکەڤن.

یا پێدڤییە باس ل هەمی لایەنان بهێتە کرن، چونکی زۆر کەس بوونە قوربانی بگرە ژ زارۆک و گەنج و پیروکالان و کادر و سەرکردە و بەرپرسێن باڵا، هندەک ژوان ناڤێن شەهیدێن سەرکردە دێ دەنە دیارکرن، ئەو ژی:

ــ (سامی ئەبدوولرەحمان):سکرتێرێ مەکتەبا سیاسیا پارتی و جێگرێ سەڕۆک وەزێرێن هەرێما کوردستانێ.
ــ (شەوکەت شێخ یەزدین): وەزیرێ کارووبارێ ئەنجوومەنێ وەزیران و ئەندامێ ناڤەندیا کومیتەیا پارتی.
(سەعد عەبدولڵا): وەزیرێ کشتۆکال و ئاڤدێریێ و ئەندامێ مەکتەب سیاسیا پارتی.
ــ ( ئەکرەم مەنتک): پارێزگاڕێ هەولێرێ.
ــ( مەحموود هالۆ بوسەلی): برێکارێ وەزارەتا دارایی و ئابووری.
ــ ( مەهدی خۆشناو): جێگرێ پارێزگارێ هەولێرێ و سەرۆکێ لقا هەولێرێ یا ئێکەتیا نڤیسەرێن کورد.
ــ ( ئەحمەد ڕۆژبەیانی): دەڤەردار و قایمقامێ باژێرێ هەولێرێ.
ــ( عەمید نەریمان): ڕێڤەرێ پۆلیسێن هەولێرێ.

دڤێرە دا چەند پسیار دهێنە پێش ئایا ئەو کارەساتا هند مەزن چ دەمەکی ڕوودا؟ ژبەر چ دەستێ وان خوەکوژا وەسا ب ساناهی گەهشتە هەولێرا پایتەخت؟ بۆچی ڕوویدا ؟ ئایا مەرەم ژ وان کریارێن تیروریستی چ بوویە؟ گەر ب هویری لسەر ڕاوەستین و مە بڤێت بەرسڤا ڤان پسیاران وەرگرین، هەلبەت چەندین ئەگەر و هوکار هەنە کو بووینە ئەگەرێ ڤێ کارەساتێ و بلا مرۆڤ راستیا نەڤەشێریت و پەندو عیبرەت و سەربورا ژ رابردوویا خۆ وەرگریت، دا کو کارەساتێن ڤی جوری دووبارە نەبن ڤە .. هەر وەکێ دهێتە زانین بەرسڤا ڤان پرسان بڤی ڕەنگی دهێنە خویاکرن و زانین، ئەو ژی بۆ هندێ دزڤریت کو حکومەتا هەرێما کوردستانێ پێشڤە چوونەکا باش بخوەڤە دیت، ئەو کوما شەهیدبووین کەسانێن خودان ڕۆل و کاریگەر و باڵا دەست بووینە د حکومەتێ دا. لەوما ب هەمان عەقلیەتا قرێژ و دۆژمنکارانە دۆژمنان چاڤ ب ئەزموونا کوردان نەهلاند و ژ کەرب و کینا خۆ یا جاران ب رێیا کارێن خۆ یێن تیروریستی د خواستن ب کەسێن پیس و خودان ژەهر دربەکا دی یا مەزن ل کوردان بدەن، خەلکێ کوردستانێ پێ ئازار بدەن و قەوارێ سیاسی و حوکمرانیا کوردستانێ ژناڤ ببەن، بێگومان یا دیار بی کو ململانا حزبی ژی ئەگەرەکێ بهێز بوویە کو تیروریست بارەگایێن هەر دوو حزبان بکەنە ئامانج ژبۆ کارێن تیرور کرنێ بڤی ڕەنگی ژ منافسە و ململانێ کو د ڕۆژا جەژنێ دا ب رێورەسمێن جەژنێ بگێرن و ب رەنگەکی بەرفرەهـ پێشەوازیێ ل هەڤوەلاتیان بکەن، هەروەسا لاوازیا سەقامگیریێ باشترین دەرفەت بوو ژبۆ دۆژمنان کو ب ساناهی دەستێ تیرورێ بگەهیتە هەولێرا پایتەخت، هەروەسا قەیرانا بێ باوەریێ و بێ متمانەیێ دناڤبەرا پارتی و ئێکەتیێ دا سەرهلدا بوو و دشێن بێژین بوشایی یا سیاسی و ئەمنی تا ڕادەیەکێ هەبوو! نەبوونا ئەزموونا خۆ پەقاندنا تیروریستان کو بۆ ئێکەم جار مرۆڤ خۆ دناڤ کوما مرۆڤان دا د پەقینن ، هەر دیسا ژ ئەگەرێ نەبوونا ئامادەکاریێن هوشیاریێ و نەبوونا خالێن پشکنینێ لبەر دەم هەر دوو بارەگایێن پارتان .. لاوازیا دەزگایێن ئەمنی و سەرەرای ململانا حزبی، هەبوون و کارتێکرنا کەلتورێ شەرمێ وەکو داب و نەریت و هزر نەکرن د پاراستنا گیانێ خەلکی دا ، وەکر کو هەر دوو کوژەکێن تاریستانێ ب کریارێن تیرورستی خوە پێچان ب قایشێن پری TNTی کری و مفایی ژ خەمساری و لاوازی و نە ئامادەکاریان وەرگرن. کو بشێن ب ئاسانی و ساناهی خۆ بگەهیننە دناڤ رێزێن جەماوەر و خەلکی دا بچن ژوور و ل رێزا پێشیێ و خۆ لبەر دەم بەرپرسێن پڵە بڵند ڤە ب پەقینن، د ئەنجام دا ب دەهان شەهید و سەدان بریندار بوون.
ڤالەهیەکا هەری دیار و مەزن پەیدابوویە، تا نوکە ژ جهێ هندەک ژ وان سەرکردە و خەباتکارێن مەزن و بلیمەت نەهاتیە پرکرن.
پشتی وێ کارەساتا ب سەرێ گەلێ مە هاتی د چلەمین ڕۆژا وان دا وەکو رێز لێنان و وەفاداری ل هەمبەر وان شەهیدا د مەراسیمەک شایستە و ژ هەژی دا و د هولا پەرلەمانێ کوردستانێ دا ب پشکداریا پتر ژ هزار کەسان و ب ئامادەبوونا جەنابێ سەرۆک بارزانی و مام جەلال تەلەبانی .. ب چەندین برگەیێن رێز لێنانێ و خواستەک و پێشنیارێن ئارامی و ئاشتیێ ئەو بوو ژ لایێ سەرۆک بارزانی ڤە و هەر دهەمان بون و مەراسیم دا تەکەزی ل براتی و ئێکرێزیا کوردان هات کرن و شەرێ براکوژیێ هات حەرامکرن، ئێدی ئەو ئاشتی و براتی و تەبایی هات چەسپاندن، سەقایەکێ هێمن و ئارام پەیدابوو، پەیوەندیێن بهێز و موکم دناڤبەرا پاتی و ئێکەتیێ دا پەیدابوون، ژ ئەنجامێ وێ ئێکگرتن و ئێکرێزیا ناڤ مالا کوردی دروستبوو، حوکمرانیەکا هەڤبەش پتر جهێ خۆ گرت و هەر چەندە سیستەمێ فیفتی فیفتی هەبوو، لێ هەم جار جهێ دلخوشیا خەلکێ مە بوویە، چونکی ئاسەوارێن شەرێ خۆکوژیێ بەرەف نەمانێ دچوون .. دشێن بێژین لایەنێ ئەرێنیێ کارەساتێ بۆ هێڤێنێ ئێکگرتن و ئێکرێزیا هەر دوو لا و ناڤ مالیا کوردی، جڤینێن مەزن لێ پەیدابوون ژبۆ پاشە ڕۆژەکا گەش و هێدی هێدی باوەری ژێ چێبوو، لەوما نیەتا پاک و دلسوزانە و دەستێ برایەتیێ وان کوردستان بەرەف سەقامگێریێ و ئارامیێ چوو و یاسایێ تا رادەیەکێ جهێ خۆ گرت، پەرلەمان ژی دەست بکار بوو لسەر بنیاتێ رێککەفتن و هەڤپشکی یا هەردوو لا د ئیدارە دانێ دا ..

ل دووماهیێ یا هەری گرنگ ئەوە کو ئێدی ئەم پەند و سەربورا ژ رابردوو و شاشی و کێماسیێن خۆ و بوشایێن سیاسی ‌و قەیرانا وەرگرین، داکو تووشی نەهامەتی و کارەساتێن بڤی جووری نەبن، ژ جاران زێدەتر هەول و بزاڤا بکین کو بەرژەوەندیێن باڵا ل بەر چاڤ وەرگرین، زێدەتر کار بکەین بۆ هندێ یاسا سەروەر بیت و دادپەروەریێ بچەسپیت و ئازادیا رادەربرینێ پتر جهێ خۆ بگریت و شێوازێ دیموکراسی بوونێ باشتر بهێتە پەیرەو کرن و دگەل حەزێن خەلکێ مە و سەردەمێ نوکە بگونجیت .. هەمی دەما بەرژەوەندیێن گەل و نیشتیمانی ل پێشی هەر کارەکێ حزبی و سیاسی بن، حکومرانیەکا ڕاست و دروستر لسەر بنیاتێ نەهێلانا گەندەلی و چاکسازیێ و یاسایێ ب رێڤە ببەین. داخوازێ ژ هەردوو حزبێن سەرەکی دکەین، کو لەزێ د پێک ئینانا حکومەتا نوو دا بکەن، ل گورەیی ئەنجامێ هەلبژاردنان و رێژەیا دەنگدانێ و کورسی ببنە پیڤەر ژبۆ دابەشکرن و پارڤەکرنا پڵە و پۆستێن ئیداری و حکومی ژبونا خزمەتکرن و خزمەتگوزاریا وەلاتیان و خوشگوزەرانی و باشترکرنا ژین و ژیارا خەلکی و دانانا بنیاتێ کوردستانەکا بهێز‌ و ئارام و دابینکرنا سەقامگێریێ ..