ئوپوزسیون ئەو پارت و گروپ و لڤینن یێ ھەڤدژیا ھێزا سیاسی یا دەستھەلاتدار دکەن ، ئوپوزسیون فاکتەرێ سەرەکی یە د سیستەمێ دیموکراسیێ دا ب رەنگەکی کو ئەم نەشێن باس ل سیستەمێ دیموکراسیێ بکەین بێ ھەبونا ئوپوزسیونێ ، بالانسا سیاسی پێدڤیاتی ب ھەبونا دوو ئاراستەیانە ، ئاراستەیەک وەک دەستھەلات کار بکەتن و ئاراستێ دیتر وەک چاڤدێر لسەر کارێ دەستھەلاتێ راوەستیتن ، ھەلگرێن ناسناڤێ ئوپوزسیونێ پێدڤیاتی ب ئەجندایەکێ رێک و پێک ھەیە کو دشیان دا بیت ڤالاتی و کێماسیێن د سیستەمێ سیاسی دا دیاربکەت ، پاشان رادبیت ب ڤەدیتنا چارەسەریان بو ئەوان ئاریشەیان و ب ئامرازێن جوراو جور یێن ئاشتیانە گڤاشتنێ ل لایەنێ دەستھەلاتدار بکەت ژ پێخەمەت چارەسەرکرنا ئاریشەیان ، یان ژی ئوپوزسیون ب ئەرکێ دەست نیشانکرنا ئاریشەیێن سەرەکی یێن کومەلگەھێ رادبیت و برێکا بەرنامەکێ پاکێج کری چارەسەریان ژبو دانیت و بتایبەت لدەمێ بانگەشەیێن ھەلبژارتنان داکو بشێت سەرنجا دەنگدەران بو خو راکێشیت و برێکا وی بەرنامەی بگەھیتە دەستھەلاتێ ، ل وەلاتێن خودان سەروەری و ھەبونا سەقامگیریا سیاسی شانازیێ ب ھەبونا ئوپوزسیونەکا چالاک دکەن ، ھەروەسان ل وەلاتێن دیموکراسی ئەرک و مافێن ئوپوزسیونێ برێکا دەستور و یاسایان دھێنە رێکخستن و نوینەرێن خو ل ناڤ و دام و دەزگایان دا ھەنە ، و جوداھیا خو ھەیە ژ وەلاتەکی بو وەلاتەکێ دیتر ، بەلێ ب رەنگەکێ گشتی ئوپوزسیون رادبیت ب کومکرنا پێزانینان لسەرکارێن دەستھەلاتێ و چاڤدێریکرن لسەر کارێن دەستھەلاتێ و رەخنەگرتن ب شێوەکێ بابەتی ، ھەرەسان کومەکا ئامرازان بکاردئینیت وەک لێپرسین د پەرلەمانی دا ب رێکا نوینەرێن خو و رەخنەگرتن ل یاسا و بریارێن دەستھەلاتێ و دیارکرنا فایلێن گەندەلیێ ، ئەو ژی ب لڤاندنا رایا گشتی ب ئامرازێن شارستانی و دویر ژ ھەلگرتنا چەکی ، دەستپێکا پەیدابونا ئوپوزسیونا ھەرێما کوردستانێ ڤەدگەریتەڤە بو سالا ٢٠٠٩ ل دەما بزاڤا گوران ھاتیە دناڤا گورەپانا سیاسی دا و شیا ب بەلاڤکرنا کومەکا دروشمان مینا (پەیداکرنا دادوەریێ ، یەکسانی دبەلاڤکرنا مووچەیێن فەرمانبەران دا ، رێگریکرن ب ھەروەچونا سامانێ گشتی ، داخازا چاکسازیێن بنەرەتی ...ھتد) ب ئەڤان دروشمان سەرنجا رایا گشتی یا کوردی بو لایێ خو راکێشا ، ل وی دەمی ھندەک لایەنان پەیدابونا ئوپوزسیونێ ب خیانەت دا زانین و ھندەک لایەنێن دیتر ب پێدڤیاتی زانی بو قوناغا وی دەمی ژبەرکو دەستپێکا مودێلەکا نوی بویە ژ بو ئەزموونا ھەرێما کوردستانێ ، ل دەستپێکا کاری لایەنێن ئوپوزسیونێ رابون ب پێشنیارکرنا کومەکا پروژە یاسایان دناڤا پەرلەمانی دا ژ پێخەمەت رازیکرنا دەنگدەرێن خو ، بەلێ پشتی بوینا ماوەیەکی ل سالا ٢٠١١ ئوپوزسیونا کوردی روی ب روی کومەکا ئاریشەیان بون ، ژبەرکو ب دروستاھی ئەرک و مافێن خو نەزانین و ھەروەسان مە چ یاسا یێن تایبەت ژی ب ئوپوزسیونێ نەبون ، تایبەتی ل دەما سەرھلدانا بوھارا عەرەبی و رویدانێن ١٧ی شوباتێ کو داخازا ھەلوەشاندنا حکومەت و پەرلەمان و سەروکاتیا ھەرێما کوردستانێ کر ، لڤێرێ ئوپوزسیونا کوردی کەفتە لبن باندورا دروشمێن وەلاتێن عەرەبی و ب ھزارەھا خەلک ئینانە سەر جادەیان و زیانێن مەزن ب حکومەتا ھەرێما کوردستانآ گەھاندن ، ئەگەر ژلایێ یاسایی سەحکەینە بویەرا ١٧ ی شوباتێ لایەنێن ئوپزسیون ئەگەرێن سەرەکی یێن تالانکرنێن ئەڤێ رویدانێ بوینە ، لەورا ئەڤ چەندا لایەنێ ئوپوزسیونێ ئەنجام دای دویر ژ کار و چالاکیێن ئوپوزسیونەکا دروست بووینە ، ئەڤ چالاکیێن ئووزسیونا کوردی ئەنجام دای بو ئەگەرێ نەمانا سەقامگیریا سیاسی ل ھەرێما کوردستانێ و گەلەک شوینوار لدیڤ خوە دا ھێلان ، لەورا دیتنا من ل رابردووی دا ئوپوزسیون ل ھەرێما کوردستانێ روی ب روی شکەستنان بویە ، ژبەرکو نەشیایە ھزرێ بدەتە جادێ و نەشیایە رەفتار و ھزرا سیاسی یا تاکێ کورد بەرەڤ قوناغەکا مەعریفی و زانستی ڤە ببەت ، بەلکو بتنێ کارێ وان ئەو بویە کو دەستھەلاتێ ب دێمەکێ نەشرین و نە جوان نیشا خەلکەکی بدەت ، لەوران د کابینەیا داھاتی دا پێشنیار دکەم کو ئێک پارت یان تا سێ پارتێن سیاسی دەستھەلاتدار بن و لایەنێن دیتر ب کارێ ئوپوزسیونا راستەقینە راببن ، ژبەرکو حکومەتا بنکە فراوان شکەستن ئینایە کو ھەمی لایەن پشکداری حکومەتێ بون و نەشیان ب کارێ چاڤدێریکرنێ راببن .