ل دەسپێکا سالێن (١٩٧٠) بو کو گروپەک ب ناڤێ ئاپوچی دروست بو کو بزاڤا خو یا چەکداری کرە بزاڤەکا گەریلایی، ھەتا سالا ١٩٧٨ ێ گەلەک چالاکی کرن ھەم ل ئەنقەرە ھەم ژی ل ناڤ کوردستانێ بخوە ئەڤ چالاکیە ھاتنە کرن. د چالاکیێن پروپاگەندە و رێکخستنێدا دەولەت دگەل ھندەک ھێزێن دەڤەرێ کەتە ناڤ شەری، کو دناڤبەرا رێکخراوێن کوردان و چەپ رەوێن تورکدا توند و تیژی دروست بون. ل (٢٧ ێ چریا مەزن- ١٩٧٨)ێ ئاپوچیان خوە ل ژێر ناڤێ (پارتیا کارکەرێن کوردستانێ) دووبارە رێک ئێخستیەڤە. ئانکو (٢٧ ی چریا مەزن ١٩٧٨)ێ پەکەکە ھاتیە دامەزراندن. د دامەزراندنا پەکەکێ دا عەبدوللا ئەجەلان ل سەری و پاشی مەزلوم دۆغان، خەیری دورموش، محەمەد قەرە سونگور، کەمال پیر و حەقی قەردەر، دوران قالقان، فەرھات قورتای، عەلی حەیدەر قەیتان، جەمیل بایق و موستەفا قەرەسوی رۆلەکێ گەلەک مەزن ھەبوو د دامەزراندن و راگەھاندنا پەکەکێدا.
ئەوان کومبونا ل باژێرێ (فیس) گرێدا کو باژێرەکێ لیجا دیاربەکرێ بوو . ھژمارا بەژداربویێن کومبونێ (٢٥-٢٧) کەس بوون. بەھرا پتر قوتابیێن زانکو بون کو ل ئەنقەرە د خواندن و دوو ئافرەت ژی دگەل وان دا بون و ٤ کەس ژی کورد نەبون و ھەمی ئەو کەسە بون کو شارەزاییەکا باش ل بوارێ سوسیولوژی و کومەلگەھێ دا ھەبون. ٩ کەس ژ وان ل شەرێن جودا جودا ھاتنە کوشتن و ٩ کەس ژی سیخور بون و بو دەولەتێ کار دکرن ونھا بتنێ ٦ کەس ژ وان بەردەوامێن ل ژیانا خو یا سیاسی دا. ھەر چار سالان جارەکێ کونگرەیێن پەکەکێ دھێنە گرێدان. کونگرێ ئێکێ ل (٢٧ی چریا ئێکێ – ١٩٧٨) ی ل گوندێ فیسێ دھێتە نیاسین و کونگرێ دوویێ ل سالا ١٩٨٢ بو کونگرێ سیێ ل سالا ١٩٨٦، کونگرێ چارێ ل سالا ١٩٩٠، کونگرێ پێنجێ ل سالا ١٩٩٤ێ ھاتیە گرێدان. کونگرێ دوویێ و سیێ ل دەڤەرا بەقایێ ھاتە گرێدان و کونگرێ چارێ و پێنجێ ل باشورێ کوردستانێ ل دەڤەرا بادینان ھاتیە گرێدان. کونگرێ پێنجێ بیست روژان بەردەوام بو. ھەتا نھا سێ کونفرانس ھەبونە و رێڤەبرینە ل سالا ١٩٨١ و ١٩٨٥ و ل سالا ١٩٩٤ .
ھەتا نھا (٥٠٠) گوند ھەنە کو ل کوردستانێ خەلکێ مە ژبەر پەکەکێ نەشێن بچنێ و ڤالا بویە، ھەتا نھا ب سەدان کەس ژبەر پەکەکێ یێن بوینە قوربانیێن فروکەیێن تورکیا، ھەردەم وان گەف ل خەلکێ سڤیل کریە کو بو وان پێدڤیێن وان دابین بکەن. و ب سەدان زاروو و کچ و کورێن گەنج ل ھەر چوار پارچەیێن کوردستانێ دزینە و سەردا برینە، کو بگەنە وان و ھەروەسا ژلایێ رێخراوێن نیڤ دەولەتی ڤە و دەولەتێن زلھێز وەکو ویلایەتێن ئێکگرتوویێن ئەمریکا، پەکەکە دناڤ لیستا گروپێن تێروریستا دایە و ئەڤ چەندە ناھێتە گوھورێن ژبەر کارێن وان یێن نەیێن دێموکراتیک.
پەروین رەمەزان دوسکی