نە گەلەک بەری نھا، بەلکو نابنە دوو سال گەفێن کەفتنێ و لاوازی و ژناڤ چوونێ ل سەر ھەولێرێ بوون، ل مەدیایێن زۆنا دی مزگینیا فەتحا وێ دھاتە گۆتن، دژە ھەولێرین ھەرێما کوردستانێ گەلەک ب لەز بوون ژ بۆی کو ببینن ئالایێ ئێک ژ گروپێن حەشا شەعبی ل ھەولێرێ بلند ببیت، چونکی پێتر وان گەلەک پرۆژەیێن وەکو حکومەتا ئینقازی و خوەنیشاندانێن سۆتنا بارەگەھێن حکومی خوە تاقیکر و بێ ئەنجام دەرکەفتن، لەورا ھێشتا حەشدا شەعبی نەگەھشتبوو کەرکووکێ، د مەیایێن خوە دا وان دگۆت: حەشدا شەعبی بەرەف ھەولێرێ ب رێکەفت ژ بۆی کو خەلکێ ھەولێرێ و ھەرێما کوردستانێ ب گشتی شەپرزە ببن و پێللا رەڤین و کۆچبەربوونێ دەست پێ بکەت، لێ ل داویێ ھەولێر ب ھێز تر دەرکەت. ل رۆژیێن بۆری فرۆکخانەیا ھەولێرێ ببوو ترافیکەکا سیاسی و وەزیرێن دەرڤەیێن سێ مەزنە وەلاتێن جیھانێ ل ھەولێرێ بوون، ل دووڤ پرۆتۆکۆلێن سیاسی ژی ئەگەر وەزیرەک یان سەرکردەیەکێ وەلاتەکی سەرەدانا پایتەختێ ئیراقێ بکەت پێدڤی ناکەت بچیتە چوو پارێزگەھەکا دی، چوونکی دێ ل بەغدایێ چاڤێ وی ب ھەموو مەزنە بەرپرسان کەڤیتن؛ لێ ئەڤ پرۆتۆکۆلە ژ بۆ ئیراقێ و ھەرێما کوردستانێ ئیکسپایرە و سەرکەفتی نینە، چونکی ھەر وەزیر و سەرکردەیەکێ جیھانێ دەما دھێتە ئیراقێ، بێی سەرەدانا ھەولێرێ ناڤەگەریتەڤە وەلاتێ خوە، کەواتە دڤێت ئەم وێ یەکێ بزانێن کو ل دەڤ وەلاتێن جیھانێ ھەولێر و بەغدا دو پێگەھێن ژ ھەڤ جوودانە و ھیچ دەمەکی وەکو ئێک وەلات نەھاتینە تەماشەکرن، ئەگەر بەغدا و سەرکردەیێن وێ ژی ژ ئەڤێ چەندێ نیگەران بن، لێ باشتری مە دزانن کو ئەو سەرکردەیێن ل ھەرێما کوردستانێ ھەنە لسەر ئاستێ جیھانێ ناڤدار تر و خوەدان پێگەھێن باشترن ب بەراورد ل گەل یێن ئیراقێ، چونکی سەرەرای کێماسیان ژی، ئەڤ پارتێن کوردستانێ شیاینە ھەرێمەکا جودا ژ ھەموو تشتەکی ب بەراورد ل گەل ئیراقێ دروست بکەن، ئیراق د ھیچ سیکتەرەکێ دا ژ ھەرێما کوردستانێ باشتر ب تنێ (مووچە) نەبیت، ئەو ژی تەمەنێ ڤێ باشتربوونا ئیراقێ ب تنێ چار سالن. ئەگەر تەماشەی کارەبێ بکەین، سەرەرای کارەبەکا کێم یا نشتیمانی لێ ژ یێن پارێزگەھێن دی یێن ئیراقێ باشترە، د بیاڤێ جادە و رێک و پران، د بیاڤێ ئاڤاکرن و گەشەپێدانا مرۆڤی، دبیاڤێ ئارامی و کریارێن تیرۆری و ھەروەسا د چاندن و کەلتور و رەوشنبیری وھونەری ژی دا ھەرێما کوردستانێ ل پێشیا ئیراقێ دھێت. ئەڤە ژ بۆ وەلاتێن جیھانێ گرنگن و رۆلێ خوە د ھاتنا سەرکردە و وەزیرێن ڤان وەلاتان دبینن بۆ ھەرێما کوردستانێ، ژبەر ھندێ ژی دبێژین ھەموو وان خەونێن ب شکەستنا حکومەتا ھەرێمێ و لاواز بوونا ھەرێما کوردستانێ نەبوونە راست و نھا فرۆکەخانا ھەولێرێ بوویە ترافیکا ھاتن و چوونا فرۆکەیێن سەرکردەیێن وەلاتان، بەلگە ژی ئەوە د ئێک ھەفتی دا وەزیرێن دەرڤەیێ فرەنسا و ئەمریکا و ئیرانێ ھاتنە ھەولێرێ و کۆمبوونێن گرنگ ل گەل مەزنە بەرپرسێن ڤێ ھەرێمێ کرن.