دڤان سەردەمان دا ئاڤاکرنا دەولەتێ و بنەمایێن وێ ، یان ھەر شێوازەکێ دەسھەلاتدایێ . ب ئاڤاکرنا پەیوەندیێن خۆرت و بەرژەوەند پارێز دھێنە دانان ، ئەڤ رەنگە پەیوەندیەژی ب کەسایەتیێن لێزان و دووربین و دارێژەرێن ستراتیژیەکا چەندین پلان دھێنە گرێدان .

د سیاسەتێ دا ئەگەر پەیوەندیێن خۆرت لسەر بنەمایێ پاراستنا پەرژەوەندێن دوو لایەنی یان چەندین لایەنی نەبین ، دوومدار نابن و د بچیکترین کاودان دا دێ ھێنە بڕین .

خۆڕاگری و مانەڤە و پێشڤەبرنا کیانێ ھەرێما کوردستانێ و حکومەتا ھەرێمێ ھەر ل سالا ١٩٩١ ب سیاسەتا دارشتی و دووربینا پارتی دیموکراتی کوردستان و سەرۆک بارزانی یا گرێدایی بوو ، لسەر ئاستێ ھەرێمایەتی و نیڤ دەولەتی ژی ،

ڤێ سیاسەتا دبلۆماسی دووست و پشتەڤانێن نیڤ دەولەتی و ھەرێمی بۆ کوردستانێ پەیدا کرن . دڤی سەردەمی دا ھەر وەلاتەکی یان کیانەکی پشتەڤانیا نیڤ دەولەتی یان وەلاتێن زل ھێز نەبیت نەشێت خۆ لسەر پێن خۆ بگریت و بەرژەوەندێن خۆ ب پارێزیت .

سیاسەت و پەیوەندیێن حکومەتا ھەرێما کوردستانێ فاکتەرێن سەرەکینە بۆ پاراستن و پێشڤەبرنا ھەرێما کوردستانێ و دابینکرنا پشتەڤانیا نیڤ دەولەتی .

چونکی دڤان سالان دا ھەرێما کوردستانێ توشی مەترسیێن دژوار بوو ب پیلانێن ھەرێمی و نافخۆیی ، ژوانا ھێرشێن تیرۆرستیێن داعش بۆ سەرھەرێما کوردستانێ و پاشان پیلانا ھەرێمی و نافخۆیی یا ١٦ ێ ئکتۆبەرا سالا ٢٠١٧ بۆ ناڤبرنا قەوارێ ھەرێما کوردستانێ ھێرشێن حەشدا شەعبی ب پشتەڤانی و پشکداریا ئیرانێ .

لێ ئاستێ پەیوەندیێن ھەرێما کوردستانێ د وی ئاستێ پیچتڤی دا بوون کۆ جڤاکێ نیڤ دەولەتی و وەلاتێن زلھێز پشتەڤانیا ھەرێما کوردستانێ بکەت ، ھەرچەندە ل پیلانا خیانەتکاریا ١٦ ێ ئکتۆبەرێ لدەسپێکێ بێدەنگیەک دیار بوو ،

لێ بزاڤێن سیاسی و دبلۆماسی یێن نێچیرڤان بارزانی سەرۆکێ حکومەتا ھەرێما کوردستانێ دچەند رۆژەکاندا موعادلە د بەرژەوەندا ھەرێما کوردستانێ و خەلکێ کوردستانێ دا گۆری و ئەو پیلان ھەلوەشاندن .

ئەڤرۆ ژی ئەگەر ھەلویستێن وەلاتێن ئێکگرتیێ ئەمریکا وەک مەزنترین و کاریگەرترین وەلاتێ جیھانی بەرامبەر ھەرێما کوردستانێ بکەینە نمۆنە ، دیار دبیت ، د ئاستەکێ ھەرە بلند و بھێز دایە گرنگیەکا ھەرە مەزن ب ھەرێما کوردستانێ ددەت .

سەەردانێن پلەدارێن بلندێن ئەمریکا بۆ ھەرێما کوردستانێ کۆ ب فەرمی و دەستووری پشکەکە ل وەلاتێ عیراقێ نیشانێ گرنگی پێدانەکا مەزنە ،

سەدانا وەزیرێ دەرڤە یێ ئەمریکا ( مایک پۆمپیۆ ) بۆ ھەرێما کوردستانێ دڤان کاودانان دا نامەیەکا ڤەکری و ئاشکرا یا ئەمریکا یە بۆ نەیارێن کوردستانێ و تێدا دیار دبیت کۆ ھەرێما کوردستانێ ھەڤپەیمانەکا سەرەکی یا ئەمریکا یە و ئەمریکا ب ھەمی روویەکی پشتەڤانیێ لێ دکەت و دێ پارێزیت .

ژلایەکێ دیتر ئاڤاکرنا مەزنترین کونسانەیا ئەمریکا ل ھەولێرێ و ڤەکێشانا ھێزێن ئەمریکا یێن ل رۆژئاڤایێ کوردستانێ بۆ ھەرێمێ و ھاریکاریێن وان بۆ پێشمەرگەھێن کوردستانێ ، خالێن ئەرێنی نە یێن پشتەڤانیا مەزنترین وەلاتێ جیھانێ بۆ ھەرێما کوردستانێ .

ئەڤ پشتەڤانیا نیڤ دەولەتی بۆ ھەرێما کوردستانێ ب پلان و بەرنامە بوویە و ئەڤرۆ نێچیرڤان بارزانی وەک سەرۆکێ حکومەتا ھەرێما کوردستانێ و خودان دەسھەلاتێن پرانیا سەرۆکێ ھەرێمێ پێشەنگ و داینەمۆ و دارێژەرێ ڤان پەیوەندیانە و شیایە بۆ بەرژەوەندێن ھەرێما کوردستانێ دالەنگینیت و جیھان ژی گرنگیەکا ھەرە مەزن ب کەسایەتیا وی ددەت ،

پیرۆزباھی کرنا جەنابێ وی ژلایێ وەزیرێ دەرڤە یێ ئەمریکا ب ھەلکەفتا کاندیدکرنێ بۆ پۆستێ سەرۆکێ ھەرێما کوردستانێ ژلایێ پارتی دیموکراتی کوردستان ،

نیشانێ پشتەڤانیا وەلاتێ ئەمریکا یە بۆ ھەرێما کوردستانێ و نێچیرڤان بارزانی وەک سەرۆکێ داھاتیێ ھەرێمێ د ئەرکێن خودا .

دیسان ئەڤ پەیوەندیێن تێکەلکرنا بەرژەوەندێن ھەرێما کوردستانێ ب خەلک و وەلاتڤە دگەل بەرژەوەندێن وەلاتێن ئێکگرتیێن ئەمریکا دەلیڤەیەکا خورتن بۆ ئاڤاکرنا کوردستانەکا بھێز و ئارام و بەرەڤ سەروەری و دەسکەفتێن مەزنتر .

دڤێرەدا دیار دبیت گاڤێن پارتی و رێزدار نێچیرڤان بارزانی ھەمی بۆ پاراستنا بەرژەوندێن خەلکێ کوردستانێ نە و ئاڤاکرنا وەلاتێن بھێز و دابینکرنا دەسکەفتێن نەتەوی و نشتیمانی و ئازادی و رزگاریا وەلاتی پێتڤی ب بناغێن پۆلایینن و ئەڤ بناغەیە ب کەسێن خودان ھزر و ھەستێن پۆلایین و خۆراگر و دووربین دھێتە دانان و خامەیێ ڤی ئاڤاھی پەیوەندیێن نیڤ دەولەتی و دگەل وەلاتێن زلھێزن ،

ئەڤەژی لسەر دەستێ نێچیرڤان بارزانی ھاتیە دانان و بەردەوام دگەشەبوونێ دانە ، لەوما پاشەرۆژەکا گەش لپێش ھەرێما کوردستانێ یە .