کوردستانا باشوور پشتی قووناغێن مەزن دەربازکرین و بوویە هەرێمەک نیمچە سەربەخۆ، رۆژ بۆ رۆژێ ژ لایێ (ئارامی،پێکڤەژیان،دیمۆکراسی و ئازادیا تاکی...هتد)پێشکەفتن ب خۆڤە دیت و دبینیت.بێگۆمان ئەمریکا ژی ژ نێزیک هایداری ڤێ چەندێ بوویە. و رۆژ بۆ رۆژێ بۆ خویابوو کو کورد نەتەوەیەکێ( دلسۆز،راستگۆ،مێرخاز،مێرچاک،دەستپاک،خودان سۆز و خودان ئیرادەنە). لەوما هەر ژ دەستپێکا جەنگێ بەرەڤانیێ یێ کوردان ل هەمبەر (رێکخراوا تیرۆرستی یا داعش)، ئەمریکا ب هەموو لایانڤە پاڵپشت و هاریکارێ هێزێن پێشمەرگەی بوو. چونکی باش د وێ ئێکێ دگەهشت،کەفتنا کوردان،کەفتنا لایەنێ(سەربازی،ئابووری،سیاسی وئەخلاقی)یێن ئەمریکایە ل ڤێ دەڤەرێ...
ژبەرکو پێگەهێ جیوپۆلەتیکی یێ کوردستانێ کو کوردستان پرا پێکڤەگرێدانێ یە د ناڤبەرا سێ دەولەتێن پڕانی شیعە نشین، کو ئیران، ئیراق،و سووریانە. پێگەهەکێ گرنگ بۆ ئەمرکا پێکدئینیت. چونکی رۆژ بۆ رۆژێ ئیران دەست تێوەردانێ د دەڤەرێدا دکەت، و ئەمریکا ب ئاشکەرایی دوژمناتییا خوە ل هەمبەر سیاسەت و سیاسەتڤانێن ئیرانێ دەردبڕیت و ئەڤ دوژمناتییە تا سەپاندنا سزایێن ئابووری ژی چوویە و هەتا دەست ب شەڕێ سار ژی کریە، و سیاسەتا ئیرانێ ب سیاسەتەکا توندرەو،شاش و ل دژی بەرژەوەندیێن خوە دزانیت.لێ ژبەر کو ئیراق و ئیران هەڤ مەزهەبن،هێشتا ئیراق نەشیایە خوە ژ بن جەنگێ ئیرانێ بینیتە دەر ،کەفتییە ل بن کارتێکرنا وێ و گەلەک جاران مینا باژێرەکێ ئیرانێ دەهێتە تەماشەکرن. سووریا ژی بوویە مەیدانا ئێکلاکرنا ململانێیێن وەڵاتێن زلهێز،و بۆ رێکخراۆ و بزاڤێن تیرۆرستی ژی مینا کێلەکێ ڤەدایەو هەر کۆمەکا هات ستێرکا چەکێن خوە پێ دروست دکەت!.
جهێ پاراستی و نەکەفتییە ژێر هەژموونا شیعەگەری،و رێکخراوێن توندرەوڤە،هەرێما کوردستانێ یە. ئەمریکا د وێ چەندێ ژی دگەهیت کو پاڕتا هەرێمێ ب رێڤەدبەت و ب هیچ رەنگەکی خوە رادەستی ئیرانێ ژی نەکری ،پاڕتی دیمۆکراتی کوردستانە. و د وێ چەندێ ژی دگەهیت کو پاڕتی ژی ژ فەرمان و بڕیارێن حەکیمانە یێن بارزانی لانادەت. ئەڤ چەندە ژی د سەرەدانا وەزیرێ دەرڤەیێ ئەمریکا"مایک پۆمپیۆ"یدا،بۆ لایێ هەر ئێک ژ لێڤەگەرێ کوردان"مەسعود بارزانی"و سەرووکێ حکوومەتێ "نێچیرڤان بارزانی" و راوێژکارێ ئاسایشا هەرێمێ "مەسروور بارزانی"ب باشی و روونی بۆ دۆست و دوژمنان خویابوو.
دیسان ئەمریکا دبینیت هەر ژ ژناڤبرنا سەددامێ دکتاتۆر و رژێما وی،و دووبارە دامەزراندنا دەستهەڵاتێ ل عیراقێ تا نوکە ،ب هەمی پیڤەرانڤە هەرێماکوردستانێ ژ عیراقێ باشتر بوویە، و گوهۆڕینێن مەزن ب سەردا هاتینە. پێ ئاگەهە کو حکوومەتا هەرێمێ د ڤان ساڵاندا پێنگاڤێن مەزن هاڤێتینە، د بوارێن بەرقەرارکرنا مافێن تاکەکەسی،پێکڤەژیانا هەمی ئۆل و نەتەوەیان بێی جیاوازی،دابینکرنا ئارامیێ بۆ خەلکێ کوردستانێ و ئاورەیان، پشتەڤانیکرن و هاریکاریکرنا ئاوەرەو پەنابەرێن رۆژئاڤایێ کوردستانێ و ئیراقێ،دیسان بزاڤ و تێکۆشانا بەردەوام یا سەرۆکێ حکوومەتا هەرێمێ بۆ بهێزکرنا پەیوەندیێن دبلۆماسی دگەل وەڵاتێن هەڤسوی و راگرتنا هەڤسەنگییا ناڤچەیێ، و یا هەرە گرنگ ب هزاران لاوێن ڤێ هەرێمێ جانێ خوە کریە گۆری ژ پێخەمەت پاراستنا مرۆڤایەتیێ ژ توندرەوترین رێکخراوا تیرۆرستی. د بەرامبەردا ئیراق مینا گۆمەکا ئاڤا راوەستیایی وەک خۆ مایە و گەنی بوویە و ب کێر ژیانێ ناهێت، ئەگەر هندەکا پاقژ مابیت ژی ئیران یا ڤەدخۆت!.
خالا دی یا پێگەهێ کوردستانێ ل دەف ئەمریکا ب بوهاتر دکەت ئەوە، ئەمریکا هەتا ئاسایشا نەتەوەییا خوە ژ هێزێن توندەرو یێن ڤێ ناڤچەیێ واتە توندرەوێن رۆژهەڵاتی بپارێزیت،پێدڤی ب مسۆگەرکرنا دەریاسپی یە، کو لژێر کونترۆڵا وێ دەرنەکەڤیت. بۆ ڤێ ئێکێ ژی، ب باوەرترین دۆست کو ئەمریکا ژێ پشت راست بوویە هەرێما کوردستانێ یە و هەتا کوردێن روژئاڤایێ کوردستانێ ژی،و ب ڤێ رێکێ هێلا شیعی شیعی دهێتە بڕین.
راستە د هندەک کاوداناندا ئەمریکا پشت دایە کوردان، میناک ژی "شازدەی ئوکتۆبەرێ" دەمێ داگیرکرنا کەرکووکێ ژ لایێ میلیشایێن حەشدێ و پاسدارێن ئیرانێڤە. لێ بۆ ڤێ پشتدانێ ژی ئەگەرێن جودا جودا هەنە <<ئەگەر خودانێ مالێ و دز لێک بوونە شریک، هەڤالێ خودانێ مالێ نەیێ نەچارە مایێ خوە تێ بکەت!>> بۆ ڤێ مەسەلێ ژی بەشەک ژ کالفامێن پاڕتەکا کوردی بێی هیچ بەرگری کرنەک ژ ئاخ،ئاڤ،ئالا و ناسنامەیا باژێڕێ خوە،دەستێ دوژمنی گرتن و ئینان بەردانە د ناڤ باژێڕێ خوەدا. دبیت ئەگەر شەر هاتبایەکرن، هاوکێشه ب وی شێوەی نەدبوو وەکی تا نها بەردەوام. و ژلایەکێ دیڤە ژی دیتنەک جودا ژی هەیە، دبیت ئەمریکا ڤیایە تا ماوەیەکێ دی هەرێم پشکەک بیت ژ ئیراقێ ،ژبەرکو هەر وەک مە ئاماژه پێدای، ژ ئیراقێ بتنێ هەرێمە هەڤپەیمانا راستەقینەیا وێ و ب رێکا هەرێما کوردستانێ رۆلێ ئیرانێ ل دەڤەرێ ب گشتی و ل ئیراقێ ب تایبەتی لاواز دکەت. بەڵگە ل سەر ڤێ ئێکێ ژی ڤەکێشانا هێزێن ئەمریکایه ژ رۆژئاڤا بۆ هەرێما کوردستانێ، و گرنگیدانە ب بهێزکرنا کوردستانێ و ب بایەخڤە سەردەریێ دگەل حکوومەتا هەرێمێ دکەت.دیسان هەر وەک بەرپرسێن پێشمەرگەی یێن میحوەرێن نێزیک کەرکووکێ د دەنە دیارکرن، د بەڕنامێ ئەمریکا دایە و پلان ژی دارژتییە،کو هێزێن پێشمەرگەی ڤەگەڕنە کەرکووکێ ڤە، و ل دویڤ پلانا دارژتی، هێزا هەڤپەیمانان،هێزا پێشمەرگەی دگەل هێزێن ئیراقی دێ ل بنگەهێ "کەی وەن"و دەورووبەرێن کەرکووکێ بن. ل دویڤ پلانێ دڤێت ئەو هێزێن ل باشوور و ناڤەراستا ئیراقێ ئیناینە کەرکووکێ ب ڤەگەڕیێنە ناڤچەیێن خوە. دبیت هەر ئەڤ گرنگیدانا ب ئاشکرایی یا ئەمریکایە ب هەرێماکوردستانێ ،کو بوویە ئەگەر، هێزو لایەنێن ئیراقی لژێر پەردێ و ب ئاشکرایی ژی دژایەتییا خوە بۆ ڤان پێنگاڤان دیار دکەن،و ژ نوی باس ل سەروەریا ئیراقێ دکەن. دووماهیک دژبەری ژی ئەو بوویە، هەڤپەیمانیا "بیناء"هوشداری دایە ژ مەترسیا ڤەگوهاستنا هێزێن ئەمریکی ژ سووریێ بۆ ئیراقێ!!