چەند سالە پرسا چاکسازیا بەبەتەکێ گەرم و گۆرە دناڤ خەلکێ کوردستانێو کەنالێن راگەھاندنێ ، لسەر ئاستێن ھەرە بلند پرۆژە بۆ ھاتینە ئاراستەکرنو گاڤ بۆ ھاتینە دان ، داکو رێک لێ بھێـە گرتن و ئەڤ پرسە زێدەتر تەشەنە نەبیت ، چونکی ھەس ب مەتریا وێ ھاتیە کرن ، بەری ھەمیان جەنابێ سەرۆک بارزانی چونکی گەندەڵیا دارایی و کارگێری بەرەڤ دیاردەبوونێ د چوو و خەلک ژی تۆرە کربوو .
پارتی دیموکراتی کوردستان پرسا ئەنجامدانا چاکسازیا ب رژدی وەرگرتیە و گاڤێن پراکتیکی ژی بۆ ھاتینە ھاڤێتن و وەک پرسەکا نشتیمانی دیتی یە .
پارتیێن دیتر ژی چ ئەوێن دناڤ حکومەتێ دا یان یێن بەری نھو ئۆپۆزسیون ، دکەنالێن راگەھاندنێ دا و د چەندین ھەلکەفتان دا پرسا چاکسازیا کربوو درۆشمێ خۆ یێ سەرەکی و رۆژانە پارتی پێ گونەھبار دکر و خۆ ب حزبێن چاکسازخواز و بژوین نیشا خەلکی ددا ، ھەر وەکی ئەو مەلائیکەتن و پیساتیێ گەندەلیێ نەگەھشتیە وان ..!
ل دووماھیێ دیار بۆ وان باوەری ژی ب چاکسازیا نینە و یێن دناڤ گەندەلیێ دا نقۆم بۆی ،
بانگەشێن وان بۆ چاکسازیان تنێ بۆ موزایدێن سیاسی و بەرژەوەندێن حزبی و بسەردابرنا خەلکینە .
چونکی دەمێ رێزدار نێچیرڤان بارزانی سەرۆکێ حکومەتا ھەرێما کوردستانێ ب رژدی ھاتینە ناڤ بابەتی و ڤیای پرسا بەھنگاربوونا گەندەلیێ و چاکسایێن کارگێری و دارایی بێخیتە د چارچۆڤەکێ یاسایی دا و ب یاسا سەرەدەریێ دگەل گەندەڵییچ و گەندەلکارا بکەت و ریچکێ ل نەشەنەکرنا وێ بگریت و ئەڤ یاسایە ب فەرمی ئاراستەی پەرلەمانێ کوردستانێ کری و سەکردایەتیا پارتی و فراکسیۆنا وێ ل پەرلەمانێ کوردستانێ داکۆکی لسەر دەربازبوونا وێ کری ، پرانیا وان حزبێن پارتی وەکی پشکەکا سەرەکیا دەسھەلاتداریێ ب گەندەلکار و ئەگەرێن ئەنجام نەدانا چاکسازیان گونەھبار دکر و خۆ ب پێشەنگێن چاکسازیخوازا و مەدەنیەتێ ھژمار دکر ، ( کش و مات ) بوون و رەفتار و درۆشمێن وان یێن لسەر کەنالێن راگەھاندنێ دناڤ ھۆلا پەرلەمانی بەرۆڤاژی بوون و دژی ڤێ یاسایێ راوەستان . براستی ژی گاڤەکا ھەر ئەرێنی بوو نێچیرڤان بارزانی ھاڤێتی ، چونکی یاسا باشترین ئامرازە بۆ ئەنجامدانا چاکسازیا و بەرھنگاربوونا ھەمی شێوازیێن گەندەلیێ و نەدادوەیێ ، سەرۆکێ حکومەتێ ب ئاراستەکرنا ڤێ یاسایێ چ بەھانە بۆ کەسی نەھێلان و بۆ خەلکێ کوردستانێ و لایەنێن سیاسی و رێکخراوێن جڤاکێ سڤیل خۆیاکر کۆ پارتی و سەرۆکێ حکومەتا ھەرێما کوردستانێ ، نە تنێ دگەل ئەنجامدانا چاکسازیانە بەلکێ ب رژدی کار دکەت بۆ بنبڕکرنا گەندەلیێ . لێ ئالیێن دیتر یێن سیاسی بۆ بەرژەوەندێن خۆ ، رێگری لھەمبەر دەربازبوونێ پرۆژێ چاکسازیا ل پەرلەمانێ کوردستانێ کر .
ئەگەر ئەڤ پرۆژە ببا یاسا ، دا رەوشا ئابووری و کارگێری و دارایی ل ھەرێما کوردستانێ بەرەڤ قۆناغەکا ھەری باشتر بەت ، نەخاسمە چارەسەرکرنا پرسا پاشکەفتنا مۆچێ فەرمانبەران . دڤێرەدا دیار دبیت نێچیرڤان بارزانی سەرۆکێ حکومەتا ھەرێما کوردستانێ ، نە تنێ ژلایێ سیاسی و دبلۆماسی کەسایەتیەکێ سەرکەفتی و کاریزمایە ، بەلکی ژلایێ کارگێری و چارەسەرکرنا قەیرانێن ئابۆری و کارگێری ژی ھەمان کەسایەتی یە و ھەردەم بەرژەوەندێن گشتی و خزمەتکرنا وەلاتی و وەلاتیان ، ئارمان و پلانا وی بوویە .
ئەز باوەرم لدەمێ دەستنیشانکرن یان ھەلبژارتنا جەنابێ وی وەک سەرۆکێ ھەرێما کوردستانێ ، گاڤێن وی یێن بەراھیێ دێ بەرھنگاربوونا گەندەلیێ و ئەنجامدانا چاکسازیان بیت ب رەنگەکێ یاسایی . ئەڤ چەندە ژی تنێ ب کەسایەتیێن خودان ئیرادە و خەمخۆرێن گەل و وەلاتی دھێتـە کرن .