حوکمرانیا لسەر ڤان جورە بنەمایان و ب ڤی ڕەنگی بهێتە دروستکرن، هەلبەت د ئاست و خواست و داخوازیێن گەل و وەلاتی دا نابیت؛ لەورا د کوردستانێ دا تا نوکە وەکو پێدڤی نەشیایە سەرکەڤتنێ بینیت؛ چونکی ڕێز ل ئەنجامێن هەلبژاردنان ناهێنە گرتن، چ گرنگی ژی ب دەنگێن دەنگدەران ژی ناهێنە دان؛ ژبەرهندێ دەستهەلاتداریا مە کوردان یا ڵەنگە و ئەم دروشمێن بریقەدار دبێژین و ڕادکەین، لێ مخابن پرەنسیپ و بنەمایێن دیمۆکراسیەتێ و ئازادیا هەلبژاردنان چ بها و سەنگا خۆ نینە، بێگومان سیستەمێ حوکمرانی و دیممۆکراسی و هەلبژاردنێن گەڵ و ئازادانە باشترین حوکمرانییە، گەر هەمی لایەنان باوەری ب هندێ هەبیت و ڕێزێ ل ئەنجامێن هەلبژاردنان بگرن و پێگیر بن لسەر ئەنجامان و لسەر وی بنیاتی حکومەت بهێتە دروستکرن .. لێ جهێ داخێیە تا نها دەستهەلاتداری ل کوردستانێ ب ڤی شێوازی نەهاتییە کرن، هەر ل دەمێ ئێکەمین جار هەرێما کوردستانێ بەر ب هەلبژاردنا ڤە چوویی و هاتینە کرن ل ساڵا (۱۹۹۲)ێ ب رێیا سندوقێن دەنگدانێ پەرلەمان و حکومەت هاتنە دروستکرن، ل وێ هەلبژاردنێ و ل وی دەمی پارتی دیمۆکراتی کوردستان ب ڕێژەیا ۵۱٪ دەنگان و ئێکەتی نیشتیمانی کوردستان ب رێژا ٤۹٪ دەنگان ب دەستخستن؛ لێ پێک نەهات . پارتی د حالەتەکێ نەچاریێ دا مەجبوور ما کو دگەل ئێکەتیێ دا رێک بکەڤیت، ژبەر بەرژوەندیێن باڵا یێن گەل و نیشتیمانی سیستەمێ فێفتی فێفتی پەیرەوکرن، لسەر هەمان شێواز و سیستەم ‌‌پێکهاتن داکو چ ئاریشە و ئالۆزی پەیدا و ڕوونەدن.

هەر چەندە بەرێخوە بدەین وەلاتێن خوەدی دیمۆکراسی و ‌پێشکەڤتنخواز وەسا هزر ناکەن، لسەر شێوازێ دیمۆکراسیەتێ و ئەنجامێن هەلبژاردنان قەبوول دکەن و پێکدهێن، حکومەت لسەر ڕێژەیا کورسیان دهێتە چێکرن و دروستکرن؛ بەلێ ل وەلاتێ مە بەروڤاژی دهێت کرن و ژ نەچاری و نەهێلانا گیروگرفتان و تێک نەچوونا ڕەوشا کوردستانێ ب سیستەمێن جودا و جێواز و رێککەڤتن دهێنە دروستکرن و دەستهەلاتداری دهێتە ب رێڤە برن.

د چەند خولێن بووری دا و بارا زێدەتر یا کابینا لسەر بنیاتێ هەڤبەشی و ڕێککەڤتنێ هاتینە دروستکرن ژ پێخەمەت بەرژەوەندیێن باڵا یێن گەل و نیشتیمان .لێ یا ئەڤرۆکە ئەم دبینین ژ هەمیان ب گومانتر و سەیرتر ئەوە پشتی لایەنێن سیاسی د هەلبژاردنێن ۲۰۱۸/۹/۳۰ دا دەنگ کێم کرین و هندەک لایەنان زێدە کرین، ئەو ژی ژ ئەگەرێ چەندین ڕەفتار و کریارێن دژبەرکی بووینە دار و دەستەکێن دۆژمنان و ڕەوشا کوردستانێ تێکچوویی، ئەو بوو دەمێ خیانەتا (۱٦)ی ئوکتۆبەرێ هاتی ئەنجامدان و پرانیا ئاخا کوردستانێ هاتییە ژ دەست دان و خاک هاتییە داگیر کرن ژبلی ب دەهان شەهیدان و کاڤلکرن و مالوێرانی لدیڤ خوەدا ئینایی ، خۆ رادەستکرنا هندەک لایەنان و هەڤکاری دگەل وەلاتێن هەرێمی و دۆژمنان کو بووینە رێکخوشکەر بۆ ڕادەستکرنا کەرکوکا دلێ کوردستانێ و شکاندنا شکویا پێشمـەرگەیی و کوردستانێ و دژی پارتی و سەرۆک بارزانی بۆ هندێ کو پارتی بشکێنن و لاواز بکەن، هەتا کو هزر ل هندێ دکرن ل قادا سیاسی و خەباتێ ڕاکن و نەهێلن. ب هەمی رەنگا بزاڤ و هەولدان هاتن کرن، پیلان ل دژی کوردستانێ هاتن گێران و تا گەهشییە ئاستێ خۆ ڕادەستکرنێ و خاکفرۆشیێ و خۆفرۆتنێ .. پشتی ئەنجامدانا مەزنترین سەروەری بۆ گەل و وەلاتی ئەو ژی ریفراندۆم بوو، دیرۆکەکا زێرین بۆ گەل و وەلاتی تومارکر .. ئەڤە بووینە ئەگەرێ ژ دەست دانا دەنگێن هندەک لایەنان و زێدەبوونا دەنگێن هندەک لایەنێن دیتر.

پارتی گورەپانا خەباتێ چول نەکر وەکە پارتەکە سیاسی و جەماوەری و نیشتیمانی و ب سەرۆکاتی و سەرکێشیا سەرۆک بارزانی و ب ڕۆلێ کاریگەر و هەلویستێن سەرۆک بارزانی یێن نیشتیمانی و نەتەوی و بەردەوامی ب خزمەت و خەبات و پاراستنا کوردستانێ هاتە دان. پارتی ب ڕۆل و ئەرکێ خۆ یێ نەتەوایەتی و نیشتیمانی ڕابوو، لبەر خۆ دا و د وارێ خەبات و پارێزڤانیێ و وەلاتپارێزیێ دا نەهێلا بەشەک ژ کوردستانێ بهێت داگیر کرن. باشترین نموونە بۆ وێ خۆراگریێ داستانا قەهرەمانانەیا پێشمەرگەیە ل پردێ و سحێلا و عەین عوێز و مەحموودیێ و وەنەکر و نەهێلا حەشدا شەعبی و لەشکەرێن ئێراقی بهێنە پێش و رێک ل داگیرکەران گرت .. داستانێن پێشمەرگەیی باشترین فاکتەرێن سەرکەڤتنا پێشمەرگەیی بووینە ل دژی شەرێن داعش و حەشدا شەعبی.

پیلانێن پیلانگێران هاتنە تێکدان و پووچکرن و سەرکەڤتن و سەروەریێن دیرۆکی و مەزن هاتنە تومارکرن، پارتی شیا کوردستانێ ڕاگریت و نەهێلا حکومەت تێک بچیت و رێ لبەر ئالوزی و گرفتان گرت، شیا خۆ لبەر وان هەمی ئاستەنگ و ئالۆزی و قەبران قورتال و ڕزگار بکەت .. ئەو بوو پشتی وێ مێژوویا ڕەش و خاکفرۆشان بۆ خوە تومارکری، د ئەڤ ساڵ دا واتە ل ۲۰۱۸/۹/۳۰ هەلبژاردن هاتنە ئەنجامدان و پارتی شیا رێژەیا هەری بڵند ب دەستخۆڤە بینیت و (٤۵) کورسیێن پەرلەمانی مسوگەر بکەت، لایەنێن دیتر هەمیان ل کێما دان ‌ڕێژەیا وان داکەت بۆ خوارێ.

ل گورەیی داب و نەریتێن سیاسی پارتی ب رۆل و ئەرکێ خۆ ڕابوویە ژبۆ دانوستاندن لگەل لایەنێن سیاسی ژبۆ پێک ئینانا کابینا (۹)ێ و حکومەتەکا نوو د کوردستانەکا بهێز دا. دانوستاندن و گفتوگو لسەر ئاستێ باڵا هاتنە کرن لگەل ئێکەتی و گوران، ب سەرپەرشتیا (سەرۆک بارزانی) کومبوونا هەری باڵا یا سەرکردایەتیا پارتی هات ئەنجامدان و د هەمان کومبوون دا هەر دوو بەربژێرێن کارا یێن پارتی هاتنە دەست نیشانکرن. بەرێز کاک (نێچیرڤان بارزانی) بۆ سەرۆکاتیا هەرێمێ، د ئێکەم کومبوونا پەرلەمانی دا پشتی کو سەرۆکێ پەرلەمانی بهێتە دیارکرن، ب یاسا سەرۆکاتیا هەرێمێ بهێتە کاراکرن؛ هەروەسا بەرێز کاک (مەسرور بارزانی) ژبۆ سەرۆکێ ئەنجوومەنێ وەزیران هاتە دیارکرن و پاشی بهێتە ڕاسپاردن ژبۆ دروستکرنا کابینا (۹)ێ و حکومەتا نوو .. ل ڤێرە یا سەیرتر ئەوە و جهێ سەرسورمان و ئاماژەپێکرنێ یە ئێکەتیا نیشتیمانی خۆ ب پارتەکا سوسیال دیمۆکرات دانیت! باوەری ب دیمۆکراسیەتێ نینە‌، گەفا
و دبیتە ڕێگر ژبۆ دروستبوونا حکومەتێ، ب رێیێن جودا جودا حکۆمەتا نوو گیرو دکەت، ب بەهانەیێن جودا جودا و جێواز و ب دروشمێن نەرەوا پێکولا دکەت و کارتێن فشارێ بکار دئینیت ل هەمبەر لایەنێ زۆرینە کو پارتییە هەمان پلە و پوستا ب دەستڤە بینیت، لەورا تا نها بێ ئەنجام ماینە و تا نها پێک نه ھاتینه .. پارتی داکوکیێ ‌و ڕژدە لسەر هەلویستێ خۆ، ب مافەکێ سرۆشتی و رەوا دبینیت و دزانیت کو رێژەیا کورسیان بکەتە پیڤەر و بناغە ژبۆ دروستکرنا حکومەتەکا نوو واتە کابینا (۹)ێ وەکو حەقەکێ وێ یە ، چونکی مودێلا حوکمرانیا فێفتی فێفتی یا سەرکەڤتی نەبوو، هەروەسا مودێلا حوکمرانیا حکومەتەکا بنکە فروان یان ژی رێککەڤتن د ئاست خواست و داخوازیێن مللەتی دا نەبوو و نەشیا سەرکەڤتنێ بینیت ..

ئەڤ جارە ژی ئێکەتیا نیشتیمانی پێکول و هەولدانا دکەت ب هەمان سیناریۆ و کەلتورێ جاران و ب هەمان نەفەس‌ دخوازێن خۆ بسەپینیت، پارتیێ نەچار بکەت هندی ئیستحقاقێ وان پۆست و پلا وەرگریت، یا ژ هەمیێ خراپتر و نەراواتر پێکولا دکەن دۆسیا کەرکوکێ و وەرگرتنا وەزارەتا داد ل ئیراقێ تێکەلی ‌کومبوون و بابەتێن چێکرناحکومەتاھەرێمێ دکەتن، ئەڤ چەند ژی دویرە ژ ڕه وشت و بوچوونێن سیاسی ‌لاوازکرنا هزرێن نەتەوی و نیشتیمانی، نە دلسۆزیێ ل هەمبەر گەل و وەلاتی. ئەڤ بووینە ڕێگر و بەربەست درێکێ دا، کو تا نها نەگەهشتینە چو ئەنجامان ژبۆ دروستکرنا حکومەتێ ..

باشه گەر دێ حوکمرانیا کوردستانێ لسەر هەمان بنیات هێتە دروستکرن، واتە هەلبژاردن بۆ چنە و بۆچی دهێنە کرن؟! بۆچی ئەم پەنایێ بۆ ماف و رەئیا گەل دبەین و لسەر شێوازێ دیمۆکراسیێ هەلبژاردنان دکەین؟ بۆچی سەرگێژیێ بۆ مللەتی چێدکەین، بۆ دەمێ هەیڤەکێ یان زێدەتر د هەوا هەلبژاردنان دا خەلکی بێزار دکەین، ژبلی لایەنێن مادی و مەزاختنێن مەزن .. دڤێرە دا ئێدی گەل و میللەت ئامادە نینە وەکو جاران روی ل سندۆقێن دەنگدانێ بکەت؛ مادەم رێز ل دەنگێن دەنگدەران نەهێتە گرتن.

ئێکەتی مەرجێن بێ بنەما و دیر ژ کەتواری لسەر پارتی د سەپینیت، هندەک دروشمێن نەرەوا بکار دئینیت وەکو گەف و هەرەشە ژبۆ دروستکرنا حکومەتا داهاتی و لسەر بنیاتێ مێژوو و هێز‌ و جوگرافیا .. بلا ئەم پسیارێ ژ وان ب خوە بکەین و هەم ژ خەلکی بکەین ئایا کیژ مێژوو؟ ئەرێ کیژ جوگرافیا؟ئایا ب چ هێزەک؟ زۆر زۆر مخابن کو ئێکەتی ل گور حەز و خواست و ئارەزوویێن خۆ دخوازیت حکومەتەک بهێتە دروستکرن، ئەگەر نە دێ ڕەوشا کوردستانێ تێکدەن! بۆچی؟ ل پێناڤ چی؟

پارتی یا دروستترە وەکو(استحاق) و ب مافێ سروشتێ خۆ دزانیت لسەر ڕێژەیا دەنگان و کورسیا بکەت پیڤەر ژبۆ دروستکرنا حکومەتەکا نوو. هەلبەت هەبوونا ئوپوزسیۆنەکا ساخلەم و ڕاستەقینە فەرە هەبیت، گەلەک ژ هندێ باشترە هەمی لایەن بەشدار بن د حکومەتێ دا؛ چونکی د بنەما و پرەنسیپێن دیمۆکراسی بوونێ دا ئەوە کو ئوپوزسیۆنەکا کارا و چاڵاک هەبیت و بشێت چاڤدێریا کار و ئەدا حکومەتێ دا بکەت، نەهێلیت کێماسی و نەدادپەروەری پەیدا بیت.

یا فەر و پێدڤییە پارتی دەستا نەداهێلیت و ل مافێ خۆ خوش‌ نەبیت، دەنگدەرێن خۆ دلگران و تورە نەکەت، ل گورەیی ڕێژەیا کورسیا پلە و پوستان دابەش بکەت و پەرلەمان و حکومەت بهێن دروستکرن و دەست بکارببن.

هەر چەندە ل ڤێ داویێ پارتی یا نیگەرانە ، کو وەسا ژ لایێ هندەک لایەنان ڤە ڕێگری و ئاستەنگی دکەڤن د رێکا وێ دا. نە بەس ئەو بەلکو خەلکێ کوردستانێ ژی ب هەمی تەخ و چین ڤە دلگران و نیگەرانن ژ گیروبوونا دروستکرنا حکومەتێ؛ چونکی کاریگەری و کارتێکرنێ لسەر ناخ و دەرونێ هەڤوەلاتیان دکەت، هەم کارتێکرنێ لسەر بزاڤا بازرگانی و ئابووری هەیە و هەم ژ رۆیێ سیاسی و ئەمنی ڤە ژی لاوازی و باوەری بوشایی پەیدا دبیت و کاریگەری لسەر هەنه.

ئەڤجا داخوازێ دکەین ژ لایەنێن پەیوەندیدار و بەرپرسیاریا مێژوویی و کوردستانی هەلگرن و هەمی لایەن خۆ ب بەرپرسیار بزانن و ئەو پەرێ به رپرسیاریێ سەردەریێ دگەل ڕەوشا نھا بکەن و نەخاسمە پارتی ب ئەرک و ڕۆلێ خۆیێ نشتیمانی رابیت و لەزێ د پێک ئینانا حکومەتێ دا بکەت. دانوستاندنا بەردەوامیێ پێ بدەت دگەل ئێکەتی و گوران و لایەنێن دیتر، هەر تشتی ئێک لا بکەن و حکومەتەکا نوو بهێتە دروستکرن د کوردستانەکا بهێز دا و بەڕەڤ خزمەتگوزاری و خوشگوزەرانی و دابینکرنا مافێن خەلکی و چەسپاندنا یاسا و بنەجھکرنا دادپەروەری و چاکسازیێ ل پێناڤ گەل و نیشتیمان.