جوداهییا دناڤبەرا کوردستانێ و عیراقێ دەربارەی ئول و نەتەوا !
January 3, 2019
وتار و بیروڕا
![جوداهییا دناڤبەرا کوردستانێ و عیراقێ دەربارەی ئول و نەتەوا !](https://gulanmedia.com/public/old_images/nusaran/yyuhhnbbhh.jpg )
د دیتنا ئیسلامێدا مروڤ برانە د ئایینیدا و وەکهەڤن د چێکرنێدا هەروەسان چ جیاوازی دناڤبەرا مروڤاندا نینن بتنێ تەقوا نەبیت ئەڤێ چەندێژی ئایەتا قورئانێ دوپاتیێ لێدکەت (يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ) سورة الحجرات13.
تەقوا مانایا وێ ئەو نینە گەلەک پەرستنا خودێ بهێتەکرن ، بەلکی ترسا ژ خودێ د چاوانیا سەرەدەریا دگەل مروڤاندا ، گەلەک کەس بناڤێ دینی یێن هندەک کریاران دکەن لدیری رەوشتینە و بێ هەست و بێ دلوڤانی زورداریێ ل مروڤان دکەن و مافێن وان بنپێ دکەن بتایبەت د دەرحەقێ ئول و نەتەوەیێن جودا جودا ،
دڤێ ئایەتێدا خودایێ مەزن ئاماژێ ب مروڤان دکەت نەک موسڵمانان و دەربارەی سەرەدەریێ نەک پەرستنێ .
مافێن گشتی کارتێکرنەکا مەزن یا لسەر پێکڤەژیان و لێبورینا جڤاکی کری دناڤبەرا وەلاتیێن ئێک وەلاتدا ، ئازادیا بیر و رایان یا ژ هزرا ئیسلامێ هاتی ، قورئانا پیروز ب زەلالی یا دیارکری د گوتنا خودایێ مەزندا دەمێ دەبێژیت (لَا إِكْرَاهَ فِي الدِّينِ) سورة البقرة 256. رێکا درست نە کوشتن و زولمە بەلکی دانوستاندن و پێکڤەژیانە و رێز و ڤیانە .
دڤێت بنەمایێن پێکڤەژیان و لێبورینێ بهێنە بەرپاکرن دا جڤاکەکێ دلوڤان و ب رێزگرتن و ب حەژێکرن هەبیت و بێی کەرب و کین لبەرامبەر ئێک چ ئەو کەسێ لبەرامبەر کورێ وەلاتێ تەبیت یان ئولێ وی یێ جیاوازبیت یان تائیفا وی ، سەردەمێ مە سەردەمێ گلوبالیزمێیە پێتڤیە گوتارا مە یا ئایینی یا گونجایبیت لدیف ڤی سەردەمی نەک گوتارامە وەک گوتارا مفتییێ بەغدابیت یێ حەرامکری پیروزباهی ل برایێن مە یێن مەسیحی بهێتەکرن بهەلکەفتا جەژنا وان ، ئەڤ چەندە گەلەک یا دیری بنەمایێت پێکڤەژیان و مافێن مروڤییە ب فەتوایێن ژ ڤی جوری جیهانێ ڤەدگەریننە سەردەمێن نەزانینێ و توند و تیژی و دژبەریێ ، توندرەوییا ئایینی دڤێت نەمینیت و پتر گوتارا ئەڤرو یا ئایینی ب تێر و تەسەلی لسەر ڤی بابەتی براوستیت و گوتارەکا میانرەو بهێتە درستکرن هەکەر نە ! دێ گوتارا توندرەو یا بەردەوامبیت و هەڤدو نەقەبیلکرن لپێشبیت ، ئەڤ چەندە دێ کاریگەریێ لسەر گشت گیانداران کەت .
حکومەتا هەرێمێ شیا یە هەما هەنگی و هەڤالینیا ئۆل و نەتەوان بکەتە کەلتۆر کو هەر سال سەرۆکێ حکومەتێ نێچیرڤان بارزانی پشکداری جەژن و بیرەوەریێن وان دبیت و ب بەیانناما ژی پیرۆز دکەت ، هەروەسان ئاڤاکرنا پەرستگەهان و گرنگی دان ب هندێ کو هەمی ئۆل خۆ ب خودانێ کوردستانێ بزانن ، ل دەمێ فەتوایا مفتیێ سونە مەزهەبێ ئیراقی راگەهاندی کو کرێسمس حەرامە و نابیت موسلمان ڤێ رۆژێ ل کرستیانان پیرۆز بکەن ، لێ ل کوردستانێ بەروڤاژی ئەوقافا کوردستانێ ئەو فەتوا شەرمزار کر و ب دژبەریا پێکڤەژیانێ لقەلەمدا .
ئەو گرنگیا ب ئولێن نە موسلمان دهێتەدان ل هەرێمێ باوەرم ل چ وەلاتێن دەوروبەری کوردستانێ بڤی شێوەی گرنگیێ پێنادەن ل کوردستانێ هەمی ئول و نەتەوە پێکڤە دژین وەک برا و رێز و ڤیان لبەرابەر هەڤدو هەنە و ئەڤ چەندە یا لویە کەلتورەک بۆ پێکڤەژیانێ ل کوردستانێ .