بەشێ دوویێ و دووماھیێ

ل ناڤبرنا مەزنترین پیلانا نافخۆیی و ھەرێمی ژی ل ۱٦ ئکتۆبەرا سالا ۲۰۱۷ و کارڤەدانێن پشتێ وێ ژی سەرکەفتنەکا ئێکجار مەزن تۆمار کرن و ھەرێما کوردستانێ لناڤچۆنێ رزگار کرن ، ڤێ سەرکەفتنێ رەوشنبیر و سیاسەتمەدار و چاڤدێرێن سیاسی یێن جیھانێ حیبەتی کرن ، ژبلێ وان سەرکەفتنێن مەزن یێن ئابۆری د کەرتێ نەفت و گازێ و دابینکرنا پێتڤیێن پێشمەرگەھێن کوردستانێ د شەرێ چار سالیێ تیرۆرستێن داعش ، سەرەرای بڕینا مۆچە و بۆدجێ ھەڕێمێ ژلایێ حکومەتا عیراقێ .
برەنگەکێ گشتی حکومەتا ھەڕێما کوردستانێ ، بۆ پاراستن و بھێزکرنا ئەزمۆنا سیاسی و ئیداری و ئێکرێزیا مللەتی د ھەمی قوناغان دا بسەر کەفت و پاشەرۆژەکا گەش بەرامبەر ھەرێما کوردستانێ ڤەکرن و باوەری بۆ خەلکێ کوردستانێ دروست کرن .
لێ رۆژ ئاڤایێ کوردستانێ ، ژبەر بێ ئەزمۆنیێ د وارێن سیاسی و کارگێری دا ، دڤان حەفت سالێن دەربازبوویی دا نەشیان خۆ دگەل سەردەمی بگونجینن و دەرگەھێن پێشڤەچۆنێ و بەختەوەریێ ل وی بەشێ کوردستانێ ڤەکەن ، ھەرچەندە پشتی رژێما سووریێ ھاتیە سەرنافچوونێ دەرفەتەکا زێرین بۆ ھەلکەفت ، لێ سیاسەتا پەکەکێ ( پە یە دێ) یا سەپاندنا ھێزێ و ئیرادا ئێک حزب و ڕێگرکرنێ ل حزبێن نەتەوی و نشتیمانی د ئاڤاکرنا ھەرێمەکا ئازاد و دیموکراس دا و لادانا وان ل بنەمایێن نشتیمانیبوونێ و پێکڤە ژیانێ و نەبۆنا سیاسەتەکا دیار و دارشتی یا دەرڤە و نافخۆ .
ئەڤ دەرفەتا زێرین لدەست دا و پاشەرۆژا رۆژ ئاڤایێ کوردستانێ بەرەڤ ئاقارەکێ تاری و نەدیار بر .!
ڕێگریا وان ل پشکداریا حزبێن کوردستانی ل پرۆسا سیاسی و کارگێری دا و نەبۆنا شێوازەکێ دیارکی یێ دەسھەلاتێ کو ھەر جار ژێر ناڤەکی بۆ ، ل کوردستانەکا مەزن ، بۆنە کانتۆنا کانتۆن ، پاشان فیدرالیا باکۆرێ سووریا ... دانپێنەکرن ب ئالایێ کوردستانێ و لادانا پەیڤا کوردستان لسەر شێوازێ کارگێریێ و نەبۆنا ئازادیا دید و بۆچوون و راگەھاندنێ ، ھەمی خالێن لاوازێن دەسھەلاتداریا پەکەکێ بۆن .
ژلایێ دبلۆماسی ژی نەشیان پەیوەندیا لسەر بنەمایێ پاراستنا بەرژەوەندا گرێبدەن ، ئەو پەیوەندیێن ھەی ژی د دەمەکی بۆن و تنێ د بەرژەوەندا لایەنێ دیتر دا بۆن .
ھەچەنە ھەرێما کوردستانێ ھەمی شیان تەرخان کرن بۆ سەرکەفتنا وێ ئەزمۆنێ و مفا وەرگرتن ل ئەزمۆنا ھەڕێما کوردستانێ .
لێ خۆ پەرێسیا وان گوھداریا گاڤێن سەرۆک مەسعود بارزانی و سەرۆکێ حکومەتا ھەڕێمێ نەکرن و ھەردوو رێکەفتنێ ھەولێر و دھوک یێن دناڤەرا ئالیێن سیاسی یێن رۆژ ئاڤا بۆ چارەسەرکرنا پرسێن وان و پاراستنا ئێک ڕێزیێ بجھـ نەئینان . سەرەرای ھایدارکرنێ ژلایێ ڕێزدار نێچرڤان بازرانی بەری دوو سالا لسەر مەترسیێن لسەر رۆژ ئاڤا ھەی .
ب شێوەیەکێ گشتی پەکەکە وەک پارتەکا سەپێنەرا ئیرادا خۆ و لادان ل بنەمایێن نەتەوی ونشتیمانی و فەرامۆشکرنا روولێ پارت و ئالیێن دیتر یێن سیاسی ، ڕەوشا سیاسی وجڤاکی ل رۆژ ئاڤا بەرەڤ پاشەرۆژەکا نەدیار بر و ئەو لێ بەرپرسە .
ئەگەر گۆھداریا ھەرێما کوردستانێ کربا و مفا ل ئەزمۆنا سەرکەفتیا ھەرێما کوردستانێ وەرگرتبا ، ئەڤ رەوشا دژوار وتاری بسەر نەدھات .
نە عەفرین دھاتە داگیرکرن ونەژی بێ ھەڤپەیمانێن ستراتیژی دمان . ئەز باوەرم ئەگەر نھو ژی دان ب خەلەتیێن خۆ بکەن و بزڤرنەڤ سەر گیانێ ئێکتر قەبۆلکرنێ و ئاشتی ودیموکراسیەتێ و پەیەدە ببیتەحزبەکا کوردستانی یا سەربەخۆ و بریار و ڕێنمایی یان ل جھێ قەندیلێ ل رێزدار نێچیرڤان بارزانی وەربگرن ، ڕەوشا وان دێ ھێتەڤ گۆرین و بەرەڤ ئاسۆیێن گەش چیت . ھەر وەکی لسەر دەستێ جەنابێ وی ، پشتی خیانەتا شازدێ ئکتۆبەرێ ، ھەرێما کوردستانێ قۆناغێن دژوار دەرباز کری و دەرگەھێن بەختەوەریێ بۆ کوردستانێ ڤەبۆی .