ئیسلامیەکان دەڵێن: ئێمەی ئیسلامی زۆرمان هاوار کرد کورد نابێ دۆستایەتی ئەمەریکای کافر و ئیسرائیلی سەهیۆنی بکات، ئەو گوتنەی ئیسلامیەکان وایکرد گەشتێک بەناو مێژووی پڕ کارەساتی کورددا بکەم، لەو گەشتەدا زۆر کارەساتی وەک دابەش کردنی کوردستان لە ساڵی ١٥١٤و ئەنفال و کیمیاباران و هەڵپەی لەناوبردنی کوردم بینی، لە باشوور و باکوور و رۆژهەڵات و رۆژئاوا چەندین کۆمەڵکوژی کوردم بینی، لەسەر کوردبوون و داواکردنی مافە سەرەتاکانی کورد، لە سێدارەدانی شێخ عەبدولسەلامی بارزانی و شێخ سەعیدی پیران و سمایلاغای سمکۆ و پێشەوا قازی و لەیلا قاسم و، تیرۆر کردنی دکتۆر قاسملو و دکتۆر شەرەفکەندی و کوشتنی دەیان هەزار گەنج و لاوی کوردم بینی, هەموو ئەو کارەساتانە و دەیان کارەساتی تراژیدیا ئامێزی تر لەسەر دەستی تورک و عەرەب و فارسی برای دینی بوون، نەک لەسەر دەستی ئەمەریکای کافر و ئیسرائیلی سەهیۆنی.
ئیسلامیەکان و هەموو ئەوانەش کە وەک ئیسلامیەکان لە درزی بەرژەوەندی کەسی و حزبی لە کوردبوون و چارەسەری کێشەی کورد دەڕوانن، لە پێناوەشدا ئامادن جاشایەتی بۆ تورک و فارس و عەرەب بکەن، هەڵوێست گۆڕینی ئەمەریکای کافر و ئیسرائیلی سەهیۆنی بە تاوان دەزانن، ئاخر ئەوان بە دوای بەرژەوەندی خۆیاندا دەگەڕێن، بەڵام کوشتن و لە سێدارەدان و کۆمەڵکوژی کورد و کاولکردنی کوردستان بە دەستی تورک و فارس و عەرەبی برای دینی بە خەڵات دەزانن.
ئاخر ئێوە خۆتان بە برای دینی تورک و فارس و عەرەب دەزانن، ئەگەر براکانتان کورد کوژی نەکەن و وڵاتی کوردان داگیر نەکەن، هیچ کوردێک چاوەڕوانی ئەوە نییە ئەمەریکای کافر بیپارێزێ، ئەوە لە ترسی برا شمشێر بەدەستەکانی ئێوەیە کورد ناچار بووە پەنا بۆ کافر بەرێ و داوای لێ بکات لە زوڵم و ستەم و کوشتاری براکانی دینی بیپارێزێ.