پشتی کو سەرکردایەتیا پارتا دیموکراتا کوردستانێ بڕیاردای پۆستێ سەرۆکایەتیا هەرێما کوردستانێ کارا بکەت ، و رێزدار نێچیرڤان بارزانی بۆ وی پۆستی بەربژێرکری ، کارڤەدانێن نافخۆیی و نێڤدەولەتی ژێ دروست بوون .
لسەر ئاستێ نافخۆییا هەرێما کوردستانێ و عیراقێ وژلایێ هەمی ئالیێن سیاسیڤە پێشوازیەکا گەرم لڤێ بڕیارێ هاتەکرن ، و ب بەربژێرەکێ هەژی بۆ برێڤەبرنا پۆستێ سەرۆکێ هەرێمێ هاتە بناڤ کرن . هەروەسا لسەر ئاستێ وەلاتێن دەرڤە دیسان پێشوازی ل وێ بڕیارێ هات کرن ، چونکی رێزدار نێچیرڤان بارزانی د چەند سالێن بوریدا دەمێ سەرۆکێ حکومەتا هەرێما کوردستانێ بویە ،شیایە پەیوەندیەکێ بهێز دناڤبەرا هەرێما کوردستانێ و وەلاتێن دەرڤە دروست بکەت .
ئەگەر ئەم بپرسین ، ئەرێ بۆچی هەمی ئالیێن سیاسیێن کوردستانێ ب یار و نەیارێن پارتا دیموکراتا کوردستانێ لسەر بەربژێرکرنا رێزدار نێچیرڤان بارزانی بۆ پۆستێ سەرۆکایەتیا هەرێما کوردستانێ هەڤدەنگ بوون ؟
نێچیرڤان ئیدریس بارزانی وەک سیاسیەکێ بهێز هاتیە ناسین . چەندین سالە شوین تپلێن وی د پرسێن چارەنڤیس سازێن سیاسی و ئابوری دا دیارە ، ئەگەرێ کۆ دەنگیا ئالیێن سیاسی لسەر کەسایەتیا نێچیرڤان بارزانی بۆ هندێ دزڤریت کو ئەو هەردەم جودا ژ سیاسیێن دن یێن کورد دەرکەفتیە و دفکریت ، و باوەڕەکێ تەمام ب قەبولکرنا جوداهیان هەیە ، هەر وەکی هزرمەندێ عەرەب ( حەسەن عەلەوی ) دەربارەی نێچیرڤان بارزانی دبێژیت: ( سیاسەتا نەرم وتەندروستێ نێچیرڤان بارزانی ، هند وەرار کریە کو خەلکێ بیانیژی هەست پێ دکەن . نێچیرڤان بارزانی ئاڤێ ب هەر ئاگرەکی دا دکەت . ) ئەگەرێ ئەڤێ گۆتنا عەلەوی ئەوە کو نێچیرڤان بارزانی هەردەم ڕێگر بویە ل تەشەنەکرن ئالۆزبونا دۆخێ سیاسی و سەربازیا هەرێما کوردستانێ و عیراقێ . هەر دەمێ گرفتێن کویر دناڤبەرا ئالیێن سیاسی دروست بوینە و بەرەڤ توندوتیژیێ چوینە ، نێچیرڤان بارزانی وەک سەرۆکێ حکومەتا هەرێمێ بزاڤکریە ئەوێ دۆخێ هێمن بکەت و نەهێلایە ئالۆزی زێدەببن .
ئەو هەردەم جوداتر ژ سیاسیێن دن دەرکەفتیە و گرنگیەکا زۆر ب ڤەژاندنا وەلاتی و ئابوری و هەمی سێکتەرێن دن یێن وەلاتی دایە .
بارزانی ب کارەکتەرەکێ سەرەکی دهێتە دانان بۆ چەسپاندنا پێگەهێ هەرێما کوردستانێ لسەر نەخشێ ئابوریا جیهانێ و ب تایبەت د بوراێ نەفت و گاز و سامانێن خوەزای .
هەروەسا ژبلی رێ خۆشکرن بۆ ئینانا کۆمپانیێن وەلاتێن جیران بۆ،کوردستانێ ، دەورەکێ بالا و بەرچاڤ هەبوو ژ را کێشانا کۆمپانیێن مەزنێن جیهانێ بۆ ناڤ هەرێما کوردستانێ.
نێچیرڤان بارزانی ب زەلامێ رۆژێن تەنگاڤیا دهێتە دانان ، ئەڤەژی ژ هندێ هاتیە کو هەردەمێ کاودانێن هەرێما کوردستانێ دگەل حکومەتا ناڤەند و وەلاتێن دەورو بەر بەرەڤ؟ئالۆززیێ ڤە چۆبیت،هەردەم کلیلا چارەسەریێ لجەم نێچیرڤان بارزانی هەبویە . دێ شێین ئاسایی کرنا دۆخێ سیاسی و ئابوریێ هەرێما کوردستانێ ل پشتی ریفراندۆمێ دگەل حکومەتا ناڤەند و وەلاتێن جیهانێ وەک نمونەیەکێ بەرچاڤ وەرگرین و بەحس بکەین .
نێچیرڤان بارزانی د کارکرن و بریاردانێدا گەلەک جدییە ، لێ کەسایەتیەکێ ئارام و لسەرخۆیە . هەردەم ب گرنژینڤە د کەنالێن راگەهاندنێدا دەرکەفتیە .
هەر چەندە پۆستێ سەرۆکایەتیا هەرێما کوردستانێ د ماوێ بوریدا هەردەم خالا ناکۆکیێ بویە دناڤبەرا ئالین سیاسی دا . ب تایبەت نەیارێن پارتی.
د چەند سالێن بوریدا ئەڤ ناکۆکیە کویرتر بوو ، هەتا کار گەهشتە وێ چەندێ کو سەرۆک بارزانی بریارا دەست ژ کارکێشانێ دا ، و دەسهەلاتێن سەرۆکایەتیا هەرێمێ بسەر هەرسێ دامەزراوەیێن دن دا هاتنە دابەش کرن .
لێ نها کاودانێن سیاسیێن هەرێما کوردستانێ و ئەو گوهۆرینێن سیاسی کو پێشبینی دهێنە کرن ر بدەن ، پێدڤی ب کارا کرنا سەرۆکایەتیا هەرێما کوردستانێ یە ، هەر ژبەر هندێ ئەڤ تێگەشتنە لجەم هەمی ئالیان دروست بویە کو پۆستێ سەرکایەتیا هەرێمێ ب دانوستاندن و رێککەفتنێ دووبارە بهێتە کارا کرن .
بەشەکێ زۆر ژ چاڤدێرێن سیاسی د وێ باوەڕێ دانە کو پۆستێ سەرۆکایەتیا هەرێمێ چەند گرنگە ، هندژی پڕ ئەرک و بزەحمەتە ، سەرۆکایەتیا هەرێمێ پۆستەکێ سیادی و گرنگ و کاریگەرە . پێدڤیە کەسەک بۆ ڤی پۆستی بهێتە بەر بژێرکرن کو خودان ئەزمونەکێ سیاسی بیت و ل پرۆسەیا سیاسی رۆلێ خۆ هەبیت .
هەر ژبەر هندێ دێ شێین بێژین کو بەربژێر کرنا نێچیرڤان بارزانی بۆ پۆستێ سەرۆکێ هەرێمێ بڕیارەکێ دروست بوو ، و لەوا ژلایێ هەمی ئالیێن سیاسی هاتە پێشوازی کرن .