ھەڤپەیمانەتی و ھەڤگونجاندن و دوژمنایەتی ل سەر بناغەکێ کەتواری دھێتە ئاڤا کرن. ژبەرھندێ کەتوارێ سیاسەتێ ب بەرژەوەندیا دەمی ڤە ھاتیە گرێدان و ماف دھێتە ستاندن، لێ ناھێتە پێش کێشکرن. ژبەرھندێ چ رومانسیەت د سیاسەتێ دا نینە.
پلان دێ ھەر بەردەوام بن، بو ھەر کارەکێ ئەنجام ددەین، ئەرێ دشیێن بەرسێنگێ وان پیلانا بگرین؟
نێچیرڤان بارزانی، شیا وان سالانە دژی ھەر پیلان و پیلانگیریەکێ کو دژی نەتەوەی کورد ھاتیە ئەنجام دان راوەستیت و ب دیتنا وێ، ھەر مللەتەکێ توخمێن ھێزێ ھەنە، ئەو ژی پێکھاتیە ژ ھێزا رەوشەنبیری و ئابوری و جڤاکی و لەشکەری. ھەر چوار پێکڤە ھاتینە گرێدان ب شێوەیەکێ دیالکتیکی. خورتکرنا ڤان ھێزا دێ بیتە بەربەست کو پیلانێن رەش ل سەر بێنە شکەستن.
ب وێرەکی و بێ دو دلی دا دشیێن خو ژ شاشیان قورتال بکەین و چ جارا دوبارە نەبیتەوە.
رەوشەنبیری پێدڤی یە خودان دەست پێشخەر بیت و کارخانا ھزروبیرا بیتن. ھەروەسا دگەل خۆ و جڤاکی و دەسەلاتێ پێکھاتی بیتن ل سەر شەنگستا پرەنسیپێن نەگھور کو ببیتە ستراتیجیەکا گشتی و ھەمی ل دور خرڤە بن وروژ بۆ روژێ زەنگین بکەین. ئاسایشا جڤاکی پێدڤیەکا زور گرنگە بو یەکسانی و دادوەری و تەناھی دبیتە بەرێ قولاچی بۆ دابین کرنا وێ.
یا ژ ھەمیا فەرتر کو نێچیرڤان بارزانی گرنگیێ ددەتێ: ئەڤە پالپشتا مللەتێ و خەلکێ ھەرێما کوردستانێ یە. نە دەستورەکێ تەق و لەق، نە پەیمانێن دگەل بایێ دھێـ و دچیت و نە ھندی رێزێن مە قایم بن، بژوین بن، ئێکگرتی بن، دێ سێنگێ مە پوولایی بیتن بەرامبەر ھەمی پیلانا.
چونکی ھزروبوچونا دوژمنی دھێتە دارێتن و پروگرام کرن و مروڤ ھەست ب ھەبونا دژایەتیێ دکەت و مروڤ دشێت وان پیلانان ھەست بکەت و ب ھزرێن سیاسی دشێت وان پیلانا سەرکوب بکەت
گەلەک گرنگە ھندەک تێگەھا وەربگرین و ل سەر راوەستین و بو پاشەروژێ کار بینین:
١. ژلایێ تیوری و ھزری و زانستی ڤە درێیا ئورگانێن بسپوردا کادرێن ئەکادێمی و شارەزا بێنە پێگەھاندن و پەروەردە و رەوشەنبیر کرن.
٢. سەر پێکھاتێن نەتەوا کورد و بزاڤا کوردایەتیێ وەکو کەلتورەکێ دەولەمەند مفا ژێ بێتە وەرگرتن دڤی واری داو بێتە دەستنیشانکرن و ڤەکولین و شروڤە کرن.
٣. ڤێتن ھزر بکەین د دیروکا پیلان و پیلانگێریێ دا ب چ ھزر و ب چ رەنگ دوژمنایەتیا مە کریە و ھەتا ئەڤرو ژی بەردەوامن، لێ رەنگە ب شێواز و رێکخستن و بەرنامەکێ نویتر و د ھەمی بوارێن سیاسی و دبلوماسی و ئابوری و دەرونی و جڤاکی و فەرھەنگی و ئیداری و یاسایی دا و ل بن چەندین پەردا و گەلەک جاران بێ شەرمانە ژی ب ئاشکرایی پیلانا دگێرینن.