ژن هەبوونا ژیانێ یە و کلیلا مالان و جڤاکانە، ژن ب هەستێن خۆ یێن نازک و پری دلوڤانی و دلپاکژی و خوشتڤیاتی زۆر یا هەستیار و کاریگەرە، راستگو و وەفادارە، دگەل زەلامی رۆلەکێ بەرچاڤ هەیە د جڤاکی دا، هەم ب ئەرک و کریارێن خوە و د پەروەردە و فێرکرنا زارۆکان دا چ وەکو کابانیا بەرمالێ یان وەکو خاتینا کوچک و دیوانا، ژن ب رەوشت و مالداریێ تایبەتمەندیا خۆ هەیە، گەلەک ب هشیاری و بباشی و یا هووربینە د کار و کریار و خەباتا خۆ دا و هەم کاروبارێن مالێ و سەرەدەریکرن دگەل زەلامی و فێرکرن و پەروەردەکرن و خودانکرنا زارۆکان دا خوراگر بوویە.
ژنا کورد رۆلەکی هەری مەزن و ئەکتیف د جڤاکێ دا هەیە، ژ قوناغێن دیرۆکێ یێن دێرین و ناڤین و هەڤچەرخ، بۆ نموونە د قوناغێن شورەشگێریێ دا مل ب ملێ زەلامی د قادا خەبات و خزمەتکرنا گەل و وەلاتی بوویە، خەبات و کارکریە د رۆلێ خەباتا رێکخستنا نهێنی دا و رۆلێ خۆ گێرایە، ب دلسوزانە و ب هەستەکا بەرزا کوردپەروەری حەز ژ ئاخ و ولاتێ خۆ کرییە و پارێزڤانی لێ کرییە، ب شەڤ و رۆژان دکارێن خوە دا پێگر بووینە، خەمخورێن رژد بوون دکارێن خۆ دا .. واتە ژن د هەمی شورەش و سەرهلدان و بزاڤێن ئازادی خوازێن کوردی دا رۆلەکێ مەزن هەبوویە، ب‌ هەمی شیانێن خۆ ڤە هاریکار و پشتەڤانێن پێشمەرگەیان و زەلامان بووینە.

ژن نیڤا جڤاکییە، ژن ب کەساتی و رۆل و پێگەهێ خۆ کێمتر نینە ژ رۆلێ زەلامی، چونکی کار و ئەرکێن گەلەک گران و ماندیبوون د هەمی بواراندا کەڤتینە رێکا وێ و دیتینە، ب درێژاهیا مێژوویێ ئافرەت هەڤپشک بوویە دگەل زەلامی ژ لایێ جڤاکی و ئابووری و خێزانی و پەروەردەیی و تا رادەیەک د سیاسەت و شورەشێ دا ژی رۆل و ئەرک هەبووینە و گێراینە، گەر بهێن و دیڤچونەکا بابەتیانە بکەین د مالا بێ ژن یا لەنگە و پەریشانی دیار دبیت، هەبوونا ژنێ مال و مالداری یا ئاڤایە، ئەو ئەرکێن رۆژانە ژن د مال و خێزانێ دا دبینت بۆ زەلامی یا گرانە کو بشێت وی رۆلی بگێریت.

ژن یا بەشدارە د خەبات و بەرخودان و تێکوشیێ دا، ئافرەت قوتابخانە و زانکۆیە د بوارێ خوێندنێ دا، ژلایێ سایکولۆژی و دەرونیڤە زێدەتر ڕژدن و گرنگی ب‌خواندنێ دەن، لەورا ژ زەلامان پێشتر و سەرکەڤتی ترن .. دێ بە رێخودانەکێ د قادا خەباتا شورەشگێریێ دا کەین، دێ دوو نموونەیێن دیار و بەرچاڤ دەنە دیارکرن:
شەهید ( لەیلا قاسم) ل رێکەڤتی ( ۱۹۷٤/۵/۱۲ ) هاتە سێدارە دان ..
شەهید( قومری ئیسماعیل) ل رێکەڤتی ( ۱۹۸۷/۱۲/۱۰ ) دگەل دووازدە قەهرەمانێن باژێرێ خۆ زاخۆ هاتینە سێدارەدان و گوللە بارانکرن ژلایێ ڕژێما بەعس ڤە ... هەر دوو شەهیدێن قەهرەمان ژی ئەندام و رێکخستیێن پارتی دیمۆکراتی کوردستانێ بوون.

ژن ب رەفتار و کاروبارێن خۆ یا شیایی هاریکار و پشتەڤانێ زەلام و مالا خوە بیت و بۆ خاک و وەلاتی خوە جانفیدا بکەت، لەوما د قوناغێن شورەشێ دا چەندین قوربانی داینە داکو هەست ب هەبوونا خۆ بکەت، د ناڤ جڤاکی دا رۆل هەبیت د هەمی قوناغێن ژیانێ دا و بەردەوام ژنێ بەرەڤانی ژ ئازادی و مافێن خۆ کرییە، هەردەم د هەول و بزاڤکرنێ دا یا شیایی جهێ خۆ بکەت و دناڤ رێزێن شورەشێ و پێشمەرگایەتیێ دا و دناڤ هەمی دام و دەزگەهێن حکومەتێ دا، یا شیایی رۆلەکێ باش بگێریت دناڤ رێزێن حزبی دا، ب شیانێت خۆ و ب بسپوری و ژیرمەندی و بەهرەمەندیێن خۆ شیاییە خۆ بگەهینت پلەیێن مەزن و ئاستێن بەرز و بلند، نموونە ژی وەکو پەرلەمانتار ورێڤەبەر و وەزیر .. ئەڤە ژی جهێ سەربەزی و پویتەپێدانێ یە، کو ب‌ رەنگەکێ دیموکراسیانە و تا رادەیەکا باش رێ ل هەمبەر ژنێ ڤەکرییە، کو بشێت ئازادیا خۆ یا تاکە کەسی و مافێن خۆ ب دەستڤە بینیت، خوشبەختانە دڤێ قوناغا ئەم تێدا و سەر دەمێ تەکنەلۆژیا و پێشکەڤتنێ رێ خوشکەر بوویە ژنا کورد بشێت دگەل سەردەمی ب رێڤە بچیت، خۆ پێ بگەهینیت و زۆر یا هوشیار و هەستیار بیت و خۆ رەوشەنبیر بکەت مل ب ملێ زەلامێ خۆ، هەبوونا خۆ موکم بکەت و شیانێت خۆ بکار بینیت د بەرژوەندیا جڤاکێ خۆ دا و د خزمەتکرن و پێشڤەبرنا وەلاتی دا .. تا رادەکێ باش ژنا کورد ب‌ تێگەهشتن و پێگەهشتنێ شیایە خۆ بگەهینیتە رێزا وەلاتێن پێشکەڤتی.

یا پێدڤی و هەژییە بەحسێ رۆلی (مەلا موستەفا بارزانیێ نەمر) بهێتە کرن، کو گرنگی و پویتەپێکرنەکا زۆر ب ژنێ دا یە، ئەوە کو ل ( ۱۹۵۲/۱۲/۱۱ ) ئێکەتییا ئافرەتێن کوردستانێ دامەزراندییە، وەکو رێکراوەکا جەماوەری و پیشەیی، کو خەبات و خزمەت و بزاڤ و چالاکی و رۆل هەبووینە دناڤ رێزێن پارتی دا، کو ئەڤرۆ ٦٦ سالێن پری خەبات و خزمەتکرنا نەتەوی و نیشتیمانی کرییە، رۆلێن کارا گێراینە د یەکسانی و جڤاکێ کوردەواری و کوردستانێ دا.

یا ژ هەژییە بێژین ئەڤرۆ ژنا کورد ب هەمی ڕەنگا ژ جاران ئازادترە و زێدەتر دشێت خزمەتا مالێ و خێزانێ و جڤاکی و وەلاتی بکەت، ب رەفتار و کار و شیانێت خۆ پێگەهێ خۆ بهێز‌ بکەت، دناڤا هەمی رێکخراو و دام و دەزگەهان دا بێ جێوازی و ب شێوەیەکێ دیمۆکراسیانە و ب یەکسانی خودان ئەرک و پلە و وەزیفە و رۆل بیت .. د هەمی تەخ و چینێن جڤاکی دا ژن یا دیارە و خودان رۆلە و جهێ شانازیێ یە و سەربڵندیە بۆ مە، کو ژنێ شیایی هەبوونا دووپات و ئیسبات بکەت د هەمی بواران دا و ناڤ و دەنگ و رەنگێ خۆ هەبیت.