ـ ئەنجومەنێ سەرکردایەتیا پارتا دیموکراتا کوردستانێ ل دوماهیک کۆمبونا خۆ نێچیرڤان بارزانی بۆ سەرۆکایەتیا هەرێما کوردستانێ و مەسرور بارزانی بۆ سەرۆکایەتیا حکومەتێ بەربژێر کر .

بەر بژێرکرن و یەک ئالی کرنا هەردوو پۆستان د ئێک دەمدا بوون .ئەڤەژی رامانا هندێ دگەهینیت ، کو پارتا دیموکراتا کوردستانێ دڤێت ب زوترین دەم سەرۆکایەتیا هەرێمێ کارا بکەت و ڤان هەردوو پۆستان پێکڤە دگەل هەڤپەیمانێن داهاتی د حکومەتێدا ئێک ئالی بکەت .

ئانکو هەر ئالیەکێ سیاسی بڤێت دگەل پارتا دیموکراتا کوردستانێ حکومەتەکا هەڤبەش پێک بینیت ؛ پێدڤیە دپرسێن گرنگ مینا چاکسازیێ و دەستورێ هەرێما کوردستانێ روو ب روو بونا گەندەلیێ ... ئەگەر بۆچونێن وان وەکهەڤ ژی نەبن ، لێ د خولا داهاتویا پەڕلەمانیدا هەڤدەنگ و هەڤپەیمان بن .

پشتی بەربژێر کرنا رێزدار نێچیرڤان بارزانی بۆ پۆستێ سەرۆکایەتیا هەرێما کوردستانێ ،پرسیار ئەوە ، ئەرێ نێچیرڤان بارزانی دشێت چ بکەت ؟ دەسهەلاتێن وی چنە ؟ بکارئینانا دەسهەلاتا سەرۆکێ هەرێمێ دگەل پەرلەمانێ کوردستانێ ، حکومەتا هەرێمێ ، حکومەتا عیراقێ ، پەیوەندیێن دەرڤە ... چاوایە ؟

دڤێ گوتارا خوە دا دێ بزاڤێ کەین بکورتی بەرسڤا ئەڤان پرسان بدەین .

خوەیایە سەرۆکایەتیا هەرێما کوردستانێ پێکهاتەکێ سیاسی ، ئیداری و یاساییە . لدویڤ مادەیێن ( ئێکێ و دووێ و سێ یێ ) ل یاسایا ژمارە ( ئێک ) یا سالا ( ٥۲۰۰ ) ێ کو هاتیە سەرڕاست کرن . سەرۆکێ هەرێمێ ، سەرۆکێ بلندترین دەسهەلاتا جێبەجێ کرنێ یە ل هەرێما کوردستانێ ، و هەروەسا فەرماندەیا گشتییا هێزێن چەکدارە ل هەرێما کوردستانێ.

سەرۆکێ هەرێمێ ب دەنگدانا گشتی و نهێنی ، ب شێوەیەکێ راستەوخۆ بۆ ماوێ چار سالان ژلایێ هاولاتیێن هەرێما کوردستانێ ڤە دهێتە هەلبژاردن و دشێت بۆ جارا دووێ خوە هەلبژێریتەڤە .

هەر لدویڤ ماددێ ( ئێکێ ) ل یاسایا ژمارە ( ئێک ) یا سالا ( ٥۲۰۰ ) ێ ، سەرۆکێ هەرێمێ دێ جێگرەک هەبیت کو هەڤکارێ وییە د راپەڕاندنا کاروبارێن وەلاتیدا . هەروەسا لدەمێ ئامادەنەبونا سەرۆکێ هەرێمێ جهێ وی دگریت . هەر بخوە ژی دبیتە جێگرێ فەرماندا گشتی یێ هێزێن چەکدار .

سەرۆکایەتیا هەرێما کوردستانێ لسەر ئاستێ لسەر ئاستێ نافخۆیی و دەرڤە ، نوینەرایەتیا پێکهاتە و هاولاتیێن جودا جودایێن کوردستانێ دکەت ، و نوینەرایەتیا گەلێ کوردستانێ دکەت ل ئەنجومەنێ بالایێ ناڤەندا سیاسیا عیراقێ کو ل ( سەرۆک کۆمار ، سەرۆک پەڕلەمانی ، سەرۆک وەزیران ) پێک دهێت .

سەرۆکێ هەرێما کوردستانێ ب مەبەستا پاراستنا مافێ گەلێ کوردستانێ کو دناڤ دەستورێ عیراقێدا هاتیە ، بناڤێ گەلێ کوردستانێ دانوستاندنان دگەل ئالیێ عیراقی دکەت و هەماهەنگیێ دناڤبەرا دەسهەلاتا فیدرالی و دەسهەلاتا هەرێمێ دکەت .

لسەر ئاستێ پەیوەندیێن دناڤبەرا سەرۆکایەتیا هەرێما کوردستانێ و سەرۆکایەتیا پەڕلەمانێ کوردستانێ . سەرۆکێ هەرێمی لدویڤ بڕگا ( ئێکێ ) ل ماددێ (۱۰) ل یاسایا ژمارە ( ۱ )ٚ یا سالا ( ٥۲۰۰ ) ێ کو هاتیە سەرڕاست کرن . سەرۆکێ هەرێمێ دەسهەلاتا دەرکرنا وان یاسایان هەیە کو ل پەڕلەمانێ کوردستانێ دهێنە پەسەند کرن ل ماوێ ( ٥۱ ) رۆژان ، هەروەسا دشێت تانەیێ ل گشت یاسایێ یان بەشەک ژ وێ یاسایێ بدەت و بۆ پەڕلەمانێ بزڤڕینیتەڤە هەتا دووبارە پێداچونێ تێدا بکەن .

رێزدار نێچیرڤان بارزانی کو جێگرێ سەرۆکێ پارتا دیموکراتا کوردستانێیە و سەرۆکێ پتریا کابینێن حکومەتێن بوری بویە ، خودان ئەزموونەکێ باشە د بڕێڤەبرن و پەیوەندیێن دبلوماسی و ئیدارەدانا ئالیێن هەڤدژ .

خوەیایە ئەرکێ داهاتویا سەرۆکایەتیا هەرێما کوردستانێ ئەرکەکێ گرانە ، لێ نەک ژبۆ کەسەکێ وەک نێچیرڤان بارزانی.

چونکی پارسال پشتی کو سەرۆک بارزانی دەست ژ پۆستێ سەرۆکایەتیا هەرێمێ ڤەکێشای ، پتریا دەسهەلاتێن سەرۆکایەتیا هەرێمێ بۆ نێچیرڤان بارزانی سەرۆکێ حکومەتێ هاتنە ڤەگوهاستن و شیا ب شێوەیەکێ سەرکەفتیانە ئەرکێ سەرۆکایەتیا هەرێمێ دگەل دگەل سەرۆکایەتیا حکومەتێ بڕێڤە ببەت . هەلبەت ئەڤە زێدەباری کو هەرێما کوردستانێ ب دژوارترین دۆخێ سیاسی و ئابوری و جڤاکیدا دەربازدبوو .

هەر ژبەر هندێ پۆستێ سەرۆکایەتیا هەرێمێ بۆ نێچیرڤان بارزانی گران و بزەحمەت نابیت ؛ چونکی د سالێن بوریدا پشتی کو هەرێما کوردستانێ ژلایێ حکومەتا عیراقێ ڤە ب ئابلوقەیەکا سیاسی و ئابوری هاتە دۆرپێچ کرن . رێزدار نێچیرڤان بارزانی شیا ئەوێ ئابلوقەیا سیاسی و ئابوری بشکینیت و ب بکارئینانا پەیوەندیێن دبلوماسی شیا پیلانێن دوژمنان پوچەل بکەت و قەوارەیا سەربەخۆیا هەرێما کوردستانێ بپارێزیت .