کاودانێن سیاسی و ئابووری جڤاکی یێن عیراقێ لسەردەمێ عادل عەبدولمەھدی سەرۆک وەزیرێن نوو یێ حکومەتا عیراقا فیدرال کۆ ھێشتا ژبەر ناکۆکیێن لایەنێن سیاسی نەشیایە تمامیا کابینا خۆ یا حکومی رابگەھینیت ، تا رادەیەکی وەک ھەڤیەک دگەل رەوش و کاودانێن ڤان سێ چار سالێن ھەرێما کوردستانێ ھەنە یێن لسەر دەمێ سەرۆک وەزیریا نێچیرڤان بارزانی .
ژوانا ناکۆیێن دناڤبەرا ئالیێن سیاسی و رەوشا ئابووری و جڤاکی و ئێمناھی ، لسەردەمێ نێچیرڤان بارزانی لسالا ٢٠١٤ ھەتا ٢٠١٨ ، ھەرێما کوردستانێ د رەوشەکا تایبەت و دژوار دا بوو ، ژلایەکێ گەماروویێن ئابووی یێن عیراقێ و بڕینا بۆدجە و مۆچێ ھەرێمێ ، کۆ ھەرێم ئێخستە د رەوشەکا دژوارا ئابووری و دارایی دا و ڤێ ڕەوشێ کاریگەری لسەر رەوشا جڤاکی ژی کر ، ژلایەکێ دی شەرێ تیرۆرستێن داعش و خەرجیێن پێشمەرگەھێن کوردستانێ بەرامبەر ڤێ مەزنترین و درندەترین گرۆپ و رێکخستنا تیرۆرستیا جیھانی کۆ جیھانی شلەژان و حیبەتی کربو ، رەوش و مەترسیێن لسەر ھەرێما کوردستانێ مەزنتر و دژوارتر کر ، ژ ئالیەکێ دیتر دووەم بھێزترین حزبا کوردستانی ( ئێکەتیا نشتیمانیا کوردستانێ ) ل ١٦ ئکتۆبەرا سالا ٢٠١٧ ب خیانەتەکا مەزنا نەتەوی و نشتیمانی ، خیانەت ل ھەرێم و حکومەتا کوردستانێ و پارتی دیموکراتی کوردستان کر ، دەمێ چوویە بەرەیێ داگیرکارێن کوردستانێ و ھەلگرێن پەیاما ژناڤبرنا قەوارێ سیاسی و ئیداریێ ھەرێما کوردستانێ ، دڤان کاودانان دا پڕانیا حزبێن ھەڤپشکێن پارتی ل حکومەتا ھەرێما کوردستانێ ، لجھێ پشتەڤانیا سەرۆکێ حکومەتا ھەرێما کوردستانێ بکەن بۆ تێپەراندنا ڤان ھەکی قەیران و ئاڵۆزیان ، ژبووی ھەڵوەشاندنا حکومەتا ھەرێما کوردستانێ ، شیانێن خۆ راگریێ نەبوون و خۆ ل حکومەتا ھەرێما کوردستانێ ڤەکێشا ..!
دێ شێین بێژین ، بارێ رێڤەبرن و پاراستنا ھەرێما کوردستانێ لسەر ملێن پارتی و سەرۆکێ حکومەتا ھەرێما کوردستانێ ھێلا .
نێچیرڤان بارزانی سەرۆکێ حکومەتا ھەرێما کوردستانێ ب سەرفیرازی و برەنگەکێ حیبەتی ئەڤ ھەمی رەوش و کاودانێن دژوار دەرباز کرن ، ھەرێم ل مەترسیێن ناڤچونی و شەرێ ناڤخۆیی پاراست ، رەوشا ئابووری ژی ھێدی ھێدی چارەسەرکرن و رێ لبەر مەزنترین کارەساتا جڤاکی گرت .
بدەربازکرنا ڤێ رەوشێ نێچیرڤان بارزانی بوویە مەزنترین کەسایەتیێ رۆژێن بەرتەنگ و تەحەدایا ئاستەنگ و ئاریشەان کر و لسەر ئاستێ جیھانێ ژی دەنگ ڤەدا .
عادل عەبدولمەھدی سەرۆک وەزیرێ نوو یێ ژی د رەوشەکا دژواردا ئەڤ ئەرکە وەرگرت و عیراق د رەوشەکا دژوارا سیاسی و ئابووری و جڤاکی و کارگێری دایە ، ھەرچەندە کەسایەتیەکێ میانڕە و خۆدان ئەزمۆنەکا دوور و درێژە د وارێ سیاسی دا و ھەتا راددەیەکی پشتەڤانیا نیڤ دەولەتی و ھەرێمی ژی ھەیە .
لێ ئەز نابینم ئەزمۆنا سەرکەفتیا نێچیرڤان بارزانی سەرۆک وەزیرێن حکومەتا ھەرێما کوردستانی ، لسەر وی ژی بھێتە بجە ئینان ، ژبەرکۆ چ لایەنێن سیاسیێن بھێزێن عیراقێ لپشت نینە و لسەر ئاستێ جەماوەری ژی ب ھەمان شێوە ، چونکی جادا عیراقی لسەر حزبێن سیاسی و لێڤەگەرێن ئایینی دابەش بوونە ، ناکۆکیێن ناڤ مالا شیعی ژی ب عادل عەبدولمەھدی چارە نابن و ئەڤ ناکۆکیە ئاستەنگێن دژوارن لھەمبەر حکومەتا عەبدولمەھی . ب دیتنا من حکومەتا نوو یا عیراقێ نە د شێت ببیتە جھێ باوەریا جادا عیراقی ، نەژی ئالیێن سیاسی ، چونکی دژبەرێن وەی دێ مەزنترین رێگر بن لھەمبەر پلان و بەرنامێن وی بتایبەت یێن بەرھنگاربوونا گەندەلیێ و چاکسازیێن ئیداری .
ناکۆکیێن وان یێن نھو لسەر دەست نیشانکرنا وەزیرێن نافخۆ و بەرگری ، نیشانێن تەمەن کورتیا حکومەتا نوو یا عیراقێ نە ، ئەگەر سازیێن نیڤ دەولەتی و وەلاتێن مەزن و لێڤەگەرێن شیعی گڤاشتنا لسەر ئالیێن ناکۆک نەکەن .
ب کورتی ، عادل عەبدولمەھدی بۆ چارەسەرکرنا قەیرانێن عیراقێ ، بەختەوەریا عیراقیان نابیتە نێچیرڤان بارزانی ، چونکی نێچیرڤان بارزانی خودان ئەزمۆنەکا سەرکەفتی یە و پشتەڤانیەکا زۆرا جادا کوردستانی و سیاسی ل پشتە نەخاسمە پارتی دیموکراتی کوردستان کو مەزنترین حزبا کوردستانی و عیراقی یە و لسەر ئاستێ نیڤ دەولەتی ژی کەسەکێ باوەر پێکریە ، یا لڤێ ھەمیێ مەزنتر سەرۆک بارزانی پشتەڤانە .