ھەرێما کوردستانێ پشتی ھەرفاندنا رژێما دکتاتۆریا بەعسی ل عیراقێ لسالا ٢٠٠٣ و پاشان دامەزراندنا سازیا سەرۆکاتیا ھەرێما کوردستانێ ل سالا ٢٠٠٥ ، ب ھیمەتا جەنابێ سەرۆک مەسعود بارزانی وەک سەرۆکێ ھەرێما کوردستانێ ، ئاستێ پەیوەندیێن ھەرێما کوردستانێ برنە قۆناغەکا دیتر یا دبلۆماسیەتێ ، و پەیوەندیێن ھەرێما کوردستانێ دگەل جیھانێ گەھشتنە کۆپیتکێ ، ڤان پەیوەندیان خزمەتەکا مەزن گەھاندە ھەرێمێ و زۆر بەرژەوەندێن ھەرێما کوردستانێ پاراستن و دابینکرن .
پشتی ڕاپرسیا سەرخۆبوونا کوردستانێ ل ئیلۆنا ٢٠١٧ و خیانەتا شازدێ ئکتۆبەرا ھەمان سال یا دەسھەلاتدارێن ئێکەتیا نشتیمانی کوردستانی ، دەرفەت بۆ حکومەتا عیراقێ ب سەرۆکاتیا حەیدەر عەبادی خۆش بوو ، ھەولێن بڕینا پەیوەندیێن ھەرێما کوردستانێ دگەل جیھانێ بدەت ، ب بەھانەیا ھەولا جودابوونێ ،
ژ بەر پالپشتیا ھژمارەکا کەسایەتی و ئالیێن سیاسی یێن کوردستانی لڤێ سیاسەتا دۆژمنانە یا حکومەتا عیراقێ ، ھەتا رادەیەکی کاریگەری لسەر پەیوەندیێن ھەرێما کوردستانێ دگەل جیھانێ کر ، لێ پیلان و مەبەستا عیراقێ و دیڤەلانکێن وان بجهـ نەھاتن و پەیوەندی نەھاتنە بڕین .
فاکتەرێ سەرەکیێ ھەلوەشاندنا ڤان پیلانێن عیراقێ ، رێزدار نێچیرڤان بارزانی سەرۆکێ حکومەتا ھەرێما کوردستانێ و لڤان دووماھیا پشکەکا دەسھەلاتێن سەرۆکێ ھەرێمێ ژی پێ ھاتبوونە راسپاردن ، پشتی جەنابێ سەرۆک بارزانی ب درێژکرنا دەمێ سەرۆکاتێ رازی نەبووی .
چونکی دوان کاودانان دا ژلایێ سەرۆکێ فرەنسا کۆ ئێکە ل وەلاتێن زلھێز و مەزنێن جیھانێ ھاتە پێشوازیکرن ، ھەروەسا سەرەدانێن وی بۆ ژمارەکا وەلاتێن ھەرێمی .
پشتی ڤان سەرکەفتنێن دبلۆماسی ، رێزدار نێچیرڤان بارزانی سەرۆکێ حکومەتا ھەرێما کوردستانێ وەک سیاسی و دبلۆماتکارەکێ ھەرە سەرکەفتی و بلیمەت و دووربین لسەر ئاستێ جیھانێ ھاتە نیاسین و لسەر ئاستێ راگەھاندنا عەرەبی و جیھانی و ھەرێمێ دەنگڤەدانەکا مەزن دایەڤە ، نێچیرڤان بارزانی ب ئەندازیارێ شکاندنا گەماروویێن سیاسی و ئابووری یێن لسەر ھەرێما کوردستانێ ھاتە نیاسین .
نھۆ ژی جەنابێ وی بۆ سەرۆکاتیا ھەرێما کوردستانێ ژلایێ پارتی دیموکراتی کوردستان ھاتیە کاندیدکرن ،
ئەڤە گاڤەکا گرنگ و پێتڤی بۆ پارتی ھاڤێتی ، ژبەرکۆ ھەرێما کوردستانێ دڤان کاودانا و داھاتی دا ھەرێما کوردستانێ پێتڤی ب قۆناغەکا نوو یا پەیوەندیێن سیاسی و دبلۆماسی ھەرەیە دگەل عیراقێ و ھەرێمێ و جیھانێ ، چونکی عیراقی و دەڤەر بەرڤ گۆرانکاریێن نەدیارە و پێتڤی یە ھەرێما کوردستانێ خۆ دگەل گۆرانکاریێن داھاتی بگۆنجینیت کۆ د بەرژەوەندا ھەرێمێ و خەلکێ کوردستانێ دابن .
ژبەرکۆ سەرۆکێ ھەرێما کوردستانێ بلندترین دەسھەلاتدارێ جێبجێ کارە و لسەر ئاستێ نیڤ دەولەتی ژی نوونەرایەتیا ھەرێما کوردستانێ دکەت ، نێچیرڤان بارزانی وەک سەرۆکێ ھەرێما کوردستانێ ، ھەلگرێ وان سالۆخەت و سیاسەت و دووربینیا یە دوارێن دبلۆماسیەتێ دا ، ئەوێن مەدیار کری و دێ شێت ل قۆناغێن داھاتی دگەل رەوش و گۆرانکاریێن دەڤەرێ و نیڤ دەولەتی بگۆنجیت و بێخیتە د خزمەت و بەرژەوەندێن ھەرێما کوردستانێ ، ئەز باوەرم لسەر ئاستێن سازیێن نیڤ دەولەتی و وەلاتێن مەزنێن جیھانێ و دەڤەرێ ژی دێ پێشوازیەکا گەرم ل بریارا دەست نیشانکرنا نێچیرڤان بارزانی وەک سەرۆکێ ھەرێما کوردستانێ کەن و پشتەڤانێن وی بن بۆ بھێزکرنا کوردستانێ و ئەداکرنا ئەرکێن خۆ و ئاستێ پەیوەندیێن ھەرێما کوردستانێ دگەل پرانیا جیھانێ دێ گەھنە کۆپیتکێ و بەرژەوەندێن ھەرێما کوردستانێ یێن نەتەوی و نشتیمانی و ئابووری پێ ھێنە پاراستن .
گرنگە خەلکێ کوردستانێ و ھەمی ئالیێن سیاسی ژی ڤێ راستیێ بزانن و بۆ بەرژەوەندێن کوردستانێ ، پشتەڤانیا نێچیرڤان بارزانی وەک سەرۆکێ داھاتی یێ ھەرێما کوردستانێ بکەن و خۆ ل رکەبەری و بەرژەوەندێن حزبایەتی دوور بکەن .