بۆیە بەژداری لە هەڵبژاردن دەکەم چون پێم وایە دەستەواژەی دیموکراسی لەڕێی هەڵبژاردنەوە بۆ وێناکردنی شێوازێکی حوکمکردن و حوکمڕانیەکی دروست بەکاردەبرێت و دەستەبەر دەبێت کە تیایاندا بڕیارەکان بە پێی رێنماییەکانی زۆرینەی ھاوڵاتیان بەھۆی پرۆسەیەکی ھەڵبژاردنی پاک و بێگەرد وەردەگیرێن، وە پەیرەوکردنی دیموکراسیەت و هەبوونی هەڵبژاردن لە ئان و ساتی خۆیدا مانای هەنگاونانە بەرەو کۆمەڵگای شارستانی، خۆ ئەگەر خوانەکا بە بێ دیموکراسی و دوور لە هەڵبژاردن و بەبێ گەڕانەوە بۆ ڕای هاوەڵاتیان بەردەوامی بە حووکمڕانی و سەرۆکایەتی کوردستان بدرێت ، ئەوا گومان لە وەدانیە کە هەنگاونانە بەرەو حوکمڕانیەکی دیکتاتۆری، یان تۆتالیزم، یاخوود ئوتوکراسیە... هەربۆیەش جەنابی سەرۆک بارزانی بۆ جێگیرکردنی چەمکی دیموکراسی لە کوردستان بە پەرۆشەو هەمیشە پێداگری لە سەر گەڕانەوە بۆ ڕای گەل دەکات و ڕای هاوەڵاتیانی پێ لەسەرووی هەموو شتێکەوەیە.
هەروەها ئێمە ئیدیعای بە دیموکراسی کردنی کوردستان دەکەین، دیمۆکراسیش بەبێ هەڵبژاردن هیچ مانایەک نابەخشێت بە هۆکاری ئەوەی کە حوکومەتێکی دیمۆکراتیک دەبێت پایەکانی لە سەر ویست و دەنگی هاووڵاتیانەوە بنیاتبندرێت. هەروەها هەر لە ڕێگەی هەڵبژاردنەوەیە کە دەستەڵات لە کەشوهەوایەکی ئاشتییانە و هێمنانەدا دەستاو دەست دەکرێت.
وە هەڵبژاردن بەشێکە لە دیموکراسی و لێی جیا ناکرێتەوە،
کەواتە لێرەدا گرنگی هۆشیاری تاکەکان و بەژداریکردنیان زەڕووڕیەتێکەو حاشا هەڵنەگرە لە پێناو بەلاڕێدا نەبردن و فریونەدانیان بە تایبەت لە قۆناغی سەرەتای بانگەشەی هەڵبژاردن، لەسەر بنەمای تێفکرین و هەڵسەنگاندنی کردەوەو گوفتاری حیزبە سیاسییەکان بڕیاری خۆیان بدەن و دەنگ بدەن بەو قەوارەیەی کە بە واقعی هەڵگری پەیامی بەرەی میللەتە بۆ خۆشگوزەرانی و ئاوادانی و سەربەخۆبوون و ئازادی خەڵک و ووڵاتەکەمان.
هەروەها زۆر بە گرنگی دەزانم لەو هەڵبژاردنەی کە 30/9/2018 دەکرێت، لیست و قەوارە سیاسیەکان کە بەدەنگی ئێمە دەچنە پەرلەمان، ئەوە مهامی ئێمەیە کە بتوانیین پابەندیان بکەین بەبەڵێنەکانیانەوە هەرلە بەسەروەری کردنی یاساو چەسپاندنی بنەماکانی دیموکراسی و کارکردن بۆ گێڕانەوەی شکۆی شکاوی مرۆڤی کورد لە کەرکوک و تەواوی ناوچە داگیرکراوەکانی کوردستان و چاودێرێکی ئەکتیڤی دەسەڵاتبن و هاوکاربن بۆ باشترکردنی، نەک ببن بە بەشێک لە جێبەجێکردنی پلانە گڵاوەکانی دووژمن بۆ تێکدانی باری ئاسایشی هەرێمی کوردستان و لەباربردنی ئەزموون و دەستکەوتەکانی کوردستان، هەروەها پابەندیان بکەین بە پاڵپشتی کردن و کارکردنیان لە پێناو سەربەخۆیی و بۆ بە ئەنجامگەیاندنی ئامانجی ڕێفراندۆمی خەڵکی کوردستان بۆ سەربەخۆیی.