کە پارتی و بارزانی لە ٤٦ەوە داوای حوکمی زاتیان دەکرد زۆری خەڵک هەر نەیدەزانی چیەو بە خەیاڵیشیاندا نەدەهات کە گەلی کورد بۆی هەبێت داوای شتی وا بکات و مەلیکی عێراق سەیدەو ئەولادی پێغەمبەرە سەلامی خوای لەسەر بێ چۆن دەبێ ڕوبەڕوی ببینەوەو ململانێی لەگەڵ بکەین، مەلیک و وەسی و نوری سەعیدو دارو دستەکەیان پێچرانەوەو جمهوریەت هات و زۆرێک پێی شاگەشکە بون دیسان بارزانی و پارتی هەروازیان لە ستراتیژیەتی داواکردنی حوکمی زاتی نەهێنا و بەبێ هیچ پشیوانیەکی دەرەکی و بە بێ چەک و چۆڵ و تفاق بە دەستی خاڵی هەر بەردەوام بون لە خەبات و بەرخۆدان بۆ بەدەستهێنانی ئەو داخوازیە ڕەوایە.
دوژمنانی بەغداو بەشێکی خۆییەکان و هاوڕێیانی چەکوچ و داس پێکەوە دژی وەستانەوە.

چەندین گۆڕانکاری و ئینقیلاب ڕویانداو زۆر دەم و چاو گۆڕان و ئەنجام هەر ئەوەبو کە ئیرادەی گەلی کورد بە ڕابەرایەتی بارزانی نەمر سەرکەوت و ناچار بون لە یازدەی ئازاری ساڵی حەفتا بەفەرمی دان بە حوکمی زاتیدا بنێن.

دواتر ساڵ هاتن و چون و ڕاپەڕین کراو پەرلەمانی کوردستان یەک لایەنە بڕیاری لە فیدرالی داو لە دو هەزارو سێ خەریک بو فیدرالیەتەکە بگۆڕن و بیکەنە فیدرالیەتی پارێزگاکان و دیبلۆماسیانە لەناوی بەرن ئەگەر پێداگری سەرۆک بارزانی نەبا و شەڕی دونیای لەسەر نەکردبا ئەنجام هەموانی ناچار کرد دان بە فیدرالی جوگرافی و مێژوویی کوردستان بنێن و کەرکوک و ناوچە کوردستانیەکانی دەرەوەی هەرێمیش خرایە ناو دەستوری کاتی و هەمیشەیی و نەخشە ڕێگای گەڕانەوەیان بۆ سەر هەرێم بۆ دانرا.

قۆناغی فیدرالیش چەسپاو نۆرەی دوا قۆناغی مافی کورد داهات کە بریتیە لە سەربەخۆیی وەکو هەمو گەلێکی زیندوی ئەم جیهانە، پارتی و بارزانی دەستیان بۆ ئەو کارە گەورەیەش بردو خۆیان بۆ بەدەست هێنانی هاویشتە سەر چەقۆ لە کاتێکا ئەوانی تر لە دورەوە زراویان چوبوو پێیان سەیر بو پارتی و بارزانی چۆن دەوێرن باسی شتی وا بکەن، بەڵام کراو ڕای سەرجەم گەلی کوردستانیشی بۆ وەرگیرا لە ڕێگەی ڕیفراندۆمێکی بێ خەوش بە شایەدی دۆست و دوژمن سەدا نەوەدو سێی خەڵکی کوردستان دەنگی بەڵێی بۆ داو هەمو دونیا شۆک بون لەبەرامبەر ئەو پێداگریەی پارتی و بارزانی لە سەر مافە ڕەواکانی گەلی کورد و دونیا تێگەیشت کە نیوەی ڕێگەی سەربەخۆیی یەکجاری کورد بڕاو ئەوەندە ڕێگەی ماویشە تەنیا لەسەر کات و بارودۆخی گونجاو وەستاوە.

ئەو مێژووە پڕ لە قوربانی و بەرخۆدان و پێداگریەی پارتی و بارزانی کە کەمێکی لەسەرەوە باسکرا دەیسەلمێنێ کە پێداگریان بئ ئەنجام نابێ و وازیشی لێناهێنرێ، ئەگەر زۆرینەی گەلی کورد لە دەوری پارتی و بارزانی کۆببنەوە سەربەخۆییش بەدەست دێو لە کۆتاییدا هەمو تاکێکی ئم نیشتمانە سەرفرازو شکۆمەند دەبێت، بە پێچەوانەوە ئەمجارە نابێ لۆمەی کەس بکەن خۆیان نەبێ....