(چار سال دەربازبوون ل سەر کارەساتا شنگالێ ئەوا کوردێن ڕەسەنێت ئیزیدی کریە ئامانج )
August 3, 2018
وتار و بیروڕا
![(چار سال دەربازبوون ل سەر کارەساتا شنگالێ ئەوا کوردێن ڕەسەنێت ئیزیدی کریە ئامانج )](https://gulanmedia.com/public/old_images/nusaran/DLOOOBAVAAN.jpg )
ئەگەر ئەم بچینە سەر ئەسل و ئەساسێ کوردان دێ دیرۆك بومە دیارکەت کو ژ ئیزیدیاتیێ یا هاتی ، لەوما دڤێت رێز ل هەبوونا وان بهێتە گرتن .
ــ ئەڤە ( ٤ ) چار سال بسەر کارەساتا شنگالێ دا دەربازبوون ، کو ب دڕندەترین و داخبارترین کارەساتە بسەرێ مللەتێ مەیێ ئێزیدی دا هاتی ، بێ شك ژی ئەڤ برینا کور چ جارا د دلێ مە و هزرا مەدا دەرناکەڤیت دێ هەر مینیت برینەکا کور ، چونکی چجارا ل پێش چاڤێن مە ناچیت ئەڤ تاوانا دژێ مرۆڤاییەتیێ .
ــ هێرشا دەولەتا ئیسلامی یا ب ناڤێ " داعش " بۆ سەر شنگالێ و ب دڕندەترین کارەسات دهێتە هژمارتن کو دڤان سالا دا هاتینەکرن ، دڤی دەمی دا جیهان د بلندیا پێشکەفتن و پێشڤەچوونان دا بوو .
لێ مخابن ئەڤ هووڤ و درندە ب ناڤێ ئیسلامێ هاتن و ئەو بخوە ژی دویر و دژێ ئیسلامێ بوون ، هەولدان ناڤێ ئیسلامێ ژی کێم بکەن و ئەم هەمی دزانین کا کویلێت دەستێ کێ بوون و چ دەولەت بوون .
هەر ل دەستپێکا هاتنا وان بۆ کوردستانێ بوو ، چونکی هاتن و هەولا هەمی دەولەتێن جیران و ئەوێن دی یێن رۆژهەلاتا ناڤەڕاست " شرق الٲوسط " ژناڤبرن و قیرکرنا کوردانە ب ئێکجاری ، ئەگەر ب وان بیت یێ کوردبیت لسەر روویێ عەردی نامینیت بەس هزر و بیرێن وان د بەتال و فاشلن ، چونکی کورد چجاران خەلاص نابن هندی دنیا ژی هەبیت کورد دێ هەر هەبن .
ــ لێ وان ڤێجارێ کوردێن مە یێن ئێزیدی کرنە ئارمانج وان دڤیا کوردێن ئیزیدی نەهێلن و ب تەمامی ژناڤ ببەن بتنێ ژبەر هندێ کو کوردن و ئیزیدینە .
بێ شك ژی ئەڤا بسەرێ کوردێن ئیزیدی دا هاتیەکرن جینۆسایدە ، ئەگەر ئەم بەحسێ هێرشا لسەر شنگالێ بکەین دڤێت بێژین جینۆسایدکرنا کوردێن ئیزیدی ژلایێ دەولەتا ئیسلامی ڤە یا ب ناڤێ " داعش " .
ب راستی ئەو تشتێ ئەم کوردستانی هەمی ئێشاندین و بریندارکرین کو هندی د ژیانێ دابین ئەڤ برینە د دلێ مەدا ساخ نابیت دێ هەر یا ئازریایی و کیربیت ئەو ژی برنا کچ و ژنێن کوردێن مەیێن ئیزیدی بوون . ژبلی کوشتن و ژناڤبرنا چەندین زەلام و زارۆیان ب ساخی بن ئاخکرن و ب دڕندەترین شێوە ئەشکەنجە دان ، ب زۆری دینێ ئیسلامێ بسەردا د سەپاند ، هەتا وی ڕادەی ئەو کەسێ نەببا موسلمان دکۆشتن و سەر ژێ دکرن .
هەروەسا ب زۆری و زۆرداریێ شەهدە پێ دئینا و نڤێژ پێ دکرن ، گورینا دیانەتەکێ ب دارێ زۆریێ ب راستی ئەو بخوە ژی کارەساتەکا گەلەکا مەزنە د دیروکا جیهانی دا .
ــ هەروەسا چەندین هەزار زاروك و گەنج و پیر د چیایێ شنگالێ دا مان بێ نان و ئاڤ ژ برسان و ترسان و تێهنی بوونێ دا مرن و بوونە قوربانی ، هەتا هێزێن پێشمەرگێن قارەمان گەهشتینێ و رزگارکرین .
لەوما پێدڤیە لسەر مە کو بەحسا کارەساتا شنگالێ دکەین قارەمانی و مەردایەتیا پێشمەرگا ژبیرنەکەین کو وان هەمی هەولێن خودان بۆ ئازادکانا کوردێن ئیزیدی ئەوێن ل چیایێ دا مای و شیان ب زیترین دەم وانا رزگار بکەن ب هەر ڕەنگەکێ هەبیت .
ــ هەروەسا دڤێت ئەم خەلکێ هەڕێما کوردستانێ ب گشتی و کوردێن ئیزیدی ب تایبەتی هەردەم سۆپاسیا دەڤەرا بادینان و خەلکێ دهوکێ و دەوروبەر بکەین و چجاران باشی و ئەرکێ وانێ مرۆڤایەتیێ ژبیرنەکەین ، چونکی وان ب هەمی ڕەنگان دەرگەهێت مالێن خوە و دلێ خوە بۆ ئاوارێن شنگالێ و دەوروبەر ڤەکرن و هەروەسا دەرگەهێت خاندنگەهان و مزگەفتان ژی هاتنە ڤەکرن .
زۆرا ب زحمەتە راستی مللەتەکێ لسەر ئاخا وان وەلاتێ وان زێدێ باب و باپیرێن وان دەربەدەر بکەن و ل مال و حالێ وان بکەنە دەرێ و مال و ملکێ وان تالان بکەن ، یا ژ هەمیێ نەخوشتر دناڤ وەلاتێ خوەدا ببنە ئاوارە و ئەو بخوە خودانێت ڤی وەلاتی و ئاخێ بن .
ــ ئەز بخوە سەرێ رێز و تەقدیرێ و بەژنا خوە دچەمینم بۆ هەمی خێزانێن سەربلندێن شەهید و قوربانیێن کارەساتا شنگالێ ، بۆ وان هەمی خەباتکار و قەهرەمانا و هەمی پێشمەرگا و شەرڤانا ئەڤێن کو هەمی هەولێن خودایی و شەڤ و رۆژێن خوە کرینە ئێك بۆ رزگارکرنا کەس و کارێن مەیێن ئیزیدی .
ئەڤان کورد بوونا خوە سەلماند ، کورد هەمی ئێکن بێ جوداهیا دین و نەتەوە ، ئەم هەمی دڤێ کوردستانێ دا وەکی برایان بووینە و دێ هەر مینین برا ژی .
سەر شوری و شەرمەزاری ژی دێ هەر بەهرا دۆژمن و نەحەز و نەیارێن کوردستانێ بیت ....