رەونەق ئانکۆ رووناھی و برسقین ، رەونەق نە تنێ ل ئاگری و رۆژ و ھەیڤێ و کارەبێ و ئالاڤێن دیتر دچیت ، زانایێ ئایینی یێ خزمەتا ئایینی و مرۆڤایەتیێ بکەت ، رەونەقا جڤاکی یە ، داھێنەرێن د بواریێن زانست و تەکنولۆژیایێ ، ڕەونەقێن جڤاکی نە ، تۆرەڤان و رەوشەنبیر ، ڕەونەقن ، وەرزشڤانێ زیرەک و ژێ ھاتی ، رەونەقا جڤاکێ وەرزشی یە ، سەرۆکێ دادوەر و ئازادیخواز ، ڕەونەقا گەل و وەلاتی یە و ...ھتد . چونکی ئەڤ کەسایەتیە د بووار و تایبەتمەندیێن خودا ، دبنە کەسایەتیێن بکێرھاتی و گشتی دناڤ جڤاکێ خودا ، کاریگەری بسەر تاکێن جڤاکی و وەلاتی ھەیە و تەم و مژ و تاریاتیا جڤاکی د بووژینن و دبینە ستێرەگا گەش و رەونەقێ ددەنەڤ گشت جڤاکی . چەوا بارزانی نەمر ب شارەزایی و عەدالەتێ بوویە ستێرەکا ھەرە گەش و رەونەق دایەڤ تەڤایا جڤاکێ کوردستانێ مینا ستێرا گلاڤێژی د ئەسمانی داو بسەر ھەمی ئاستەەنگا بسەرکەفت ، یان سەرۆک مەسعوود بارزانی ب ھەما شێوە رێکا بارزانی نەمر گرت و رەونەقەکا گەشا کوردستانێ . وەسا نێچیرڤان بارزانی وەک کەسایەتیەکێ سیاسی و کارگێری و ئابووری دناڤ سالان دا بوویە ستێرەکا گەش و رەونەقا کوردستانێ .

ئەگەر رەوش و کاودانێن دەسھەلاتداریا رێزدار نێچیرڤان بارزانی سەرۆکێ حکومەتا ھەرێما کوردستانێ یێن ڤێ دووماھیێ بخونین و شرۆڤەبکەین ، بێ ئێکو دوو و بێ پابەندیێن حزبی و کەسی و حەژێکرنەکا تایبەت ، ئەڤ کەسایەتیە ب کەسایەتیەکێ کاریزما و ڕەونەقدار دێ ھێتە دیتن .
ژبەرکۆ لسەردەستێ وی ھەرێما کوردستانێ سەرەرای ھەولێن بەردەوامێن دوژمن و داگیرکەرا و دیڤەلانکێن وان بۆ تێکدانا رەوشا ئاراما کوردستانێ ، ھەڵوەشاندن و کوردستان وەک ئێک ژ ئارامترین دەڤەرێن رۆژھەتا ناڤین پاراست .
ژلایێ ئابووری ژی سەرەرای گەماروویا دژوارا حکومەتا عیراقێ بسەر ھەرێما کوردستانێ و بڕینا مۆچە و بۆدجێ خەلکێ کوردستانێ ، شیا بسەر قەیرانێ دا زاڵ ببیت و بەرەڤ چارەسەریا ئێکجاری بچیت .
ھەروەسا شیا پیلانا حکومەتا عیراقێ ب پاڵپشتیا وەلاتێن جیران بۆ گەماروودانا ھەرێما کوردستانێ ژلایێ سیاسی و دبلۆماسی ب ھەڵوەشینیت و پشتەڤانیا وەلاتێت زلھێز دابین بکەت و داخازا ھەرێمەکا بھێز بۆ کوردستانێ بکەن .
نێچیرڤان بارزانی نە تنێ شیا خەونا وان حزبێن ترسنووک و بێ ھەڵویست بن ئاخ بکەت ، ئەوێن د ڕەشەکا دژواردا خۆ ل حکومەتا ھەرێما کوردستانێ ڤەکێشای ژبووی ھەلوەشاندنا ڤێ حکومەتێ ، بەلکی حکومەتا ھەرێما کوردستانێ ب ھێزتر کر .
بەشداریا وی یا ئەکتیڤ وەک جێگرێ سەرۆکێ پارتی دیموکراتی کوردستانێ ل کەرنەڤالێن ھەوێن بنگەھشێن ھەلبژاردنێن جڤاتا نوونەرێن عیراقا فیدرال بۆ سەرئێخستنا لیستا ١٨٤ یا پارتی دیموکراتی کوردستان ، کاریگەریەکا ھەرە زۆر کرە سەر دەنگدەرێ کوردستانی و لیستا پارتی دوور ل ھەر پێشبینیەکێ سەرئێخست و جارەکا دی بوویە پێشەنگا حزبێن کوردستانی .
بڤان کار و سەرەدەریێن ئەرێنی و ئەکتیڤێن رێزدار نێچیرڤان بارزانی کاریگەریەکا ھەرە زۆر کریە سەر جڤاکێ کوردستانێ و ھەرێما کوردستانێ ل سیبەرێن درندەیا و پیلانێن داگیرکار و خۆفرۆشا پاراستی یە و لجھێ سیبەرا وان ، شەفەق دایەڤ تەڤایا ھەرێما کوردستانێ و ئەڤ شەفەقە بوویە رێ خۆشکەرا رێکا بەختەوەریا خەلکێ کوردستانێ و ڤەوژاندنا ھەرێما کوردستانێ ژلایێ سیاسی و ئابووری و کارگێری .
بێ شک ئەڤ لێزانین و حیکەمەتێن ڤی کەسایەتیێ ڕەونەقدار ، نابیت ببنە جھێ حیبەتیێ ، چونکی کەسایەتیا وی د قوتایبخانەیەکا ھەردەم ڕەونەقدار پێگەھشتیە ، ئەوژی قوتابخانە و رێبازا پیرۆوا بارزانی نەمرە و پاشان ، ئامۆژگاری و رێنمایی یێن سەرۆک مەسعوود بارزنی .
گرنگە نھو وێڤە خەلکێ کوردستانێ زێدەتر ڤێ ڕەونەقێ بکار بینن بۆ بەرەڤ بەختەوەرەکا خۆشتر و دەسکەفتێن مەزنتر یێن سیاسی و ئابووری بۆ کوردستانێ .