تاقیکردنه‌وه‌ی سارۆخه‌کانی سوپای پاسداران و ئه‌گه‌ری وێرانبوونی کرماشان!
سالار حيسامى
له چه‌ند ڕۆژی ڕابردوودا و له کاتی تاقیکردنه‌وه‌ی سارۆخێکی "بالستیک"دا له پایه‌گای مووشه‌کیی "ئه‌زگه‌له"ی سه‌ربه سنووری پارێزگای کرماشان، ته‌قینه‌وه‌یه‌کی گه‌وره ڕوویدا، که شاری کرماشانی به ته‌وای هه‌ژاند. به‌پێی سه‌رچاوه‌کانی هه‌واڵ، کاکڵی ئه‌و سارۆخه له ناو توێکڵه‌که‌یدا (لانچه‌ر) ته‌قیوه‌ته‌وه و به‌شێکی زۆری توونێل و کۆگه‌کانی ژێر زه‌ویی سوپای پاسدارانی له "ئه‌زگه‌له" ئاگر تێبه‌رداوه، ئه‌وه‌ش له حاڵه‌تێکدایه که ئه‌و توونێلانه زیاتر له 3000 سارۆخیان له ناو هه‌ناوی خۆیاندا حه‌شار داوه! به‌ڵام سوپای پاسداران له به‌ر ئه‌وه‌ی ئه‌و شوێنه ئاشکرا نه‌کرێ، ئاماده نه‌بووه هاووڵاتییانی دانیشتووی کرماشان ئاگادار بکاته‌وه. بۆیه هه‌موو هێزه‌کانیان بۆ کووژاندنه‌وه‌ی ئاگره‌که به‌سیج کرد، به‌ڵام ئاماده نه‌بوون، له ترسی ئاشکرابوونی به هۆی که‌شتییه هه‌واڵگرییه ئاسمانییه‌کانی وڵاتانی زلهێزه‌وه، سارۆخه‌کان بۆ تونێله‌کانی دیکه‌یان له ژێرزه‌وی بگوازنه‌وه، ئاگاداریش بوون له‌وه‌ی که ئه‌گه‌ر ته‌قینه‌وه‌یه‌کی دیکه ڕووی بدابا، ئه‌وا کرماشان و دانیشتووانی ئه‌و شاره و هه‌ر گیانله‌به‌رێکی ده‌بوون به سووتوو..
زانیارییه‌کان ئاشکرایان کردووه، له‌و ته‌قینه‌وه‌یه‌دا هه‌شت که‌س له فه‌رمانده باڵاکانی سوپای پاسداران کوژراون و هاوکات له کۆبوونه‌وه‌ی به‌په‌له‌ی "شورای عالی امنیت ملی"ی ئێراندا، داوا کراوه به‌په‌له باری نائاسایی بۆ ئه‌و دۆخه تایبه‌ته ڕابگه‌یه‌ندرێ و خه‌ڵکی کرماشان له شاره‌که دوور بخرێنه‌وه، به‌ڵام فه‌رمانده‌ی گشتیی سوپای پاسداران(محه‌مه‌د عه‌لی جه‌عفه‌ری) وتوویه‌تی: "له ئه‌گه‌ری ته‌قینه‌وه‌ی دیکه‌دا چه‌ند هه‌زار کورد گیانیان له‌ده‌ست ده‌ده‌ن، ئه‌وه زۆر له‌وه باشتره که به ده‌ستی خۆمان زانیارییه نهێنییه‌کانمان بۆ ماهواره‌کانی ئه‌مریکا و ئیسڕائیل ئاشکرا بکه‌ین."
له دوماهیدا پێوسته بپرسین: کۆمه‌ڵگه‌ی جیهانی و وڵاتانی زلهێزی دونیا، تا که‌ی ئه‌م سه‌رکێشییانه‌ی سوپای پاسدارانی کۆماری ئیسلامیی ئێران قبووڵ ده‌که‌ن، که له سه‌ر حیسابی گیان و ماڵی گه‌لانی بنده‌ستیان له ئێران، هه‌وڵی ده‌ستخستنی چه‌کی ناوکی بۆ پشتیوانی له هه‌نارده‌کردنی مه‌زهه‌بگه‌رایی و تیرۆریسم ده‌ده‌ن؟!
