پشتی بوورینا نێزیکی ھەشت سالان بسەر ھەوڵێن جەماوەریێن ژمارەکا وەلاتێن عەرەبی بۆ گۆھرینا گەش و ھەوایێ سیاسی ، ل وەلاتێن مینا تونس و مسرێ ب تمامی ھاتە گۆرین و ل وەلاتێن لیبیا و یەمەن ھەرچەندە رژێن ھاتینە گۆرین لێ ھێشتا رەوش د کەڤلۆژانکەکێ دژوار دایە . ل وەلاتێ سووریا ژی ڕەوش دژوارترە ، چونکی بەرژەوەندێن زۆر وەلاتا دگەل تێکەل بوونە و سووریا ل گۆرەپانا شەرەکێ دژوارێ ب نوونەرایەتیا وەلاتا لسەر پاراستنا بەرژەوەندێن ژمارەکا وەلاتان بەرەڤ شەرەکێ راستەوخۆ دناڤبەرا وەلاتان دژیت ، د شێین بێژین بەرەڤ شەرەکێ نیڤ دەولەتی چوویە ، ژلایەکێ ئیران ب میلیشیایێن خۆ ڤە وەک حزب و اللە و حەشدا شیعی و پاسدار و.. ھتد چەندین سالە بۆ بەرژەوەند و شیعەگەریێ راستەوخۆ بەرەڤانیێ ل مانەڤا رژێما بەشار ئەسەدی دکەت . تورکیا ژی ئەڤ ڕەوشا نھو یا سووریا ب دەلیڤە زانی جارەکادی خەونا ب ئمبراتووریەتا ئۆسمانی ببینیت و دەڤەرێن رۆژئاڤایێ کوردستانێ دناڤ وەلاتێ سووریا داگیر کرینە و ھەول دبەردەوامن بۆ بەرفرەھکرنا سنوورێ داگیرکاریێ . رووسا ژی ئێکە ل وەلاتێن زلھێزێن جیھانێ دڤێت پشتی لاوازیەکا سیاسی ل دەڤەرا رۆژھەلاتا ناڤین ھەول ددەت شوون پێن خۆ بھێز بکەت و رێگریێ ل بەرفرەھبوونا روولێ ئەمریکا و ھەڤپەیمانێن وێ بگریت ب تایبەت ل سووریا و بەرەڤانیەکا راستەوخۆ ل رژێما سووریا دکەت . دڤان چەندی رۆژێن بووری دا وەلاتێن ئێکگرتیێن ئەمریکا و ھەڤپەیمانێن وێ بریار لسەر گۆرینا کەش و ھەوایێ سیاسی ل سووریێ دایە و دڤێت رژێما ئەسەری بھێزا چەکی بگۆھریت ، ئەڤێ چەندێ ژی پشتەڤانێن وەلاتێن رژێما سووریا ب رووسیاڤە دلگران کرینە .
ژبەرکۆ کوردان پانتایەکا بەرفرەە دناڤ ڤێ ھەڤکێشا سیاسی یا نیڤ دەولەتی لڤێ دەڤەرێ ھەیە و ئەڤ گاڤا ئەمریکا و وەلاتێن ھەڤپەیمانێن وێ وەک بریتانیا و فەرەنسا دەربارەی سووریا دبەرژەوەندا گەلێ کورد و کوردستانێ دایە , ل رۆژئاڤایێ کوردستانێ کۆ ژ ئەنجامێ داگیرکاریا ھندەک دەڤەرێن کوردستانێ وەک عەفرین و دەوروبەر ژلایێ وەلاتێ تورکیا ، پێدڤی یە ئالیێن سیاسی یێن رۆژ ئاڤایێ کوردستانێ ڤێ دەلیڤێ بدەرفەت وەربگرن و سەربوورێن خۆ یێن ڤان سالێن بەرێ دووبارە نەکەن و ئێک رێزیا ناڤ مالا خۆ بھێز بکەن و ب ئێک گۆتاریا ھەمی حزبێن کوردستانێ ، بەرژەوەندێن خۆ یێن نەتەوی و نشتیمانی دگەل بەرژەوەندێن ئەمریکا و ھەڤپەیمانا بگۆنجینن و ئایدیولۆژیێن ئێک حزبی بکەنە قوربانی ئایدیولۆژیەکا نەتەوی و نشتیمانی ، بۆ رزگاری و ئازادیا وی بەشێ کوردستانێ .
ھەرچەندە ل ھەرێما کوردستانێ ، ئانکۆ باشوورێ کوردستانێ ڕەوشەکا جودایە دگەل رۆژ ئاڤا ، لێ پێلێن ڤان گۆرانکارای راستەخۆ دێ کاریگەری لسەر ھەبیت ، چونکی خودان قەوارەیەکێ سیاسی و ئیداریێ فەرمی یە د چارچۆڤێ دەستوورێ عیراقێ دا ، و ھەرێما کوردستانێ ژبلی وەک قەوارەکێ سیاسی و ئیداریێ دیموکراسی و دگەل بەرژەوەندێن ئەمریکا و ھەڤپەیمانا و سازیێن نیڤ دەولەتی دگۆنجیت ، ژلایێ جوگرافی و ئابووری ژی پێگەھەکا گرنگە بۆ ڤان وەلاتان ، ژلایێ جوگرافی فاکتەرێ بڕینا دەستێ ئیرانێ یە ژلایێ زەمینی بۆ گەھشتن ب سووریا , کۆ چەندین سالە ئیران ڤێ ھەولێ ددەت و گڤاشتنا لسەر حکومەتا ھەرێما کوردستانێ دکەت . ژلایێ سیاسی باشترین ھەلکەفتە بۆ ھەرێما کوردستانێ ڤێ چەندێ ب دەلیڤە بزانیت ، بۆ زڤراندا پێگەە و شکۆمەدنا ھەرێمێ بۆ بەری راپرسیا ٢٥ ێ ئیلۆنا سالا ٢٠١٧ و دیلێتکرنا کارڤەدان و زیانیێن سیاسی و ئابووری و جڤاکیێن ھەرێمێ یێن ژ ئەنجامێ گرۆپێ خیانەتکاریێن ( ١٦ ) ێ ئکتۆبەرێ پاخۆ ھێلای و کرینە بارگرانیەک بۆ حکومەتا ھەرێما ھەرێما کوردستانێ ، ھەرچەندە دڤان چەند ھەیڤێن کێم دا سەرۆکێ حکومەتا ھەرێما کوردستانێ ب سیاسەتەکا شارەزا شیا پێگەھێ کوردستانێ بپارێزیت و شکۆیا خەلکێ کوردستانێ بزڤرینیت ، لێ پێدڤی یە بۆ ڤان گۆرانکاریا زێدەتر خۆ بەرھەڤ بکەن و ل ئێک رێزیا سیاسی دەستپێ بکەن و پێدڤی خەلکێ کوردستانێ ژی ڤێ راستێآ بزانیت و دەستا ل بەرژەوەندێن حزبایەتی بەردەن و ب ئێک گۆتاری بێنە بن وێ رەشمالا نشتیمانی و نەتەوایەتیا کوردستانی ئەوا پارتی دیموکراتی کوردستان ھەلدایەڤە و پارێزگاریێ لێ دکەت و سەرۆک مەسعود بارزنی دارێژەرێ وێ یە و رێزدار نێچیرڤان بارزانی ب نوونەرایەتیا پارتی و سەرۆک بارزانی ئالیێ جێبجێکارێ ڤێ سیاسەتا بەرژەوەندێن گشتی و میانڕەوا کوردستانێ یە .
چونکی ھەرفاندنا رژێما ئەسەدی ل سووریا نە تنێ گۆرینا سووریا یە ، بەلکی لاوازکرنا پێگەھێ رژێما ئیرانێ یە ل دەڤەرێ و عیراقێ ، لاوازبوونا روولێ ئیرانێ ل عیراقێ د ڤان کاودانان دا دەرفەتەکا زێرینە بۆ ھەرێما کوردستانێ ، چونکی دەولەتا عیراقێ لڤان دووماھیا بوویە ویلایەتەکا وەلاتێ ئیرانێ و دەست بسەر ھەمی سازیێن سیاسی و لەشکری و ئیداری و ئابووریێن عیراقێ گرتیە و ئەگەر پشتەڤانی و بەشداریا رژێما ئیرانێ و دیلبوونا ھندەک سەرکردێن ئێکەتیێ بن دەستێ ئیرانێ نەبا ، چ جارا حکومەتا عیراقێ شیانێن داگیرکرنا کەرکووکێ و دەڤەرێن دیتر یێن کوردستانی و گەماروودانا کوردستانێ ژلایێ سیاسی و ئابووری نەدبوون و پێگەھێ کوردا پشتی راپرسیا سەرخۆبوونا کوردستانێ لسەر ئاستێ جیھانی نەک لاواز دبوو بەلکی دا پێشڤەچوونێن بەرچاڤ بخۆڤە بینیت و ئارمانجا دووماھیێ یا ئازادی و رزگاریا خەلکێ کوردستانێ زۆرا نێزیک بوو . لەوما دبێژین بلا ئەم پشتەڤانێن سیاسەتا پارتی و حکومەتا ھەرێما کوردستانێ بین ، بۆ خۆ گونجاندنێ دگەل گۆرینا ڤی کەش و ھەوای و ب ئۆمێدەما گەشبین پێشوازیێ لێ بکەن و خۆ بۆ دەسکەفتێن مەزنتر بەرھەڤ بکەین .